ޓެކްސްއަށް މަކަރު ހެދިކަމުގެ ތުހުމަތުގައި ރެއާލް މެޑްރިޑްއަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ މައްޗަށް އުފުލާފައިވާ ދައުވާގައި އޭނާ ޖަލު ގޮޅި އިހުތިޔާރު ކުރާނަމަ އަދަބު ލުއިކޮށްދިނުމަށް ސްޕެއިންގެ ޓެކްސް އޭޖެންސީއިން ވިސްނަމުންދާ ކަމަށް އެ ގައުމުގެ މީޑިއާއިން ބުނެފިއެވެ.

ސްޕެއިންގެ އެންމެ މަޝްހޫރު އެއް ނޫސްކަމަށްވާ އެލް މުންޑޯއިން ރިޕޯޓުކޮށްފައިވާ ގޮތުގައި ރޮނާލްޑޯގެ މައްޗަށް ހަތަރު ދައުވާއެއް އުފުލާފައިވެއެވެ. އެ ދައުވާތަކަށް އޭނާ އެއްބަސްވެ ޖަލު ހުކުމެއް ތަންފީޒުކުރުމަށްފަހު 10 މިލިއަން ޔޫރޯ ދެއްކުމާއެކު އޭގެތެރެއިން އެއް ދައުވާ އަނބުރާ ގެންދިޔުމަށް އެ އިދާރާއިން ވިސްނަމުންދާ ކަމަށް ވެސް ރިޕޯޓުތައް ބުނެއެވެ.

ހަމައެހެންމެ މި ތިން ދައުވާ ވެސް ގަބޫލުކޮށް 6.25 މިލިއަން ޔޫރޯ ދެއްކުމާއެކު ވެސް ޝަރީއަތުން ބޭރުން މައްސަލަ ހައްލުކުރުމަށް ސްޕެއިންގެ ޓެކްސް އެޖެންސީ ތައްޔާރަށް އޮތް ކަމަށް ވެސް ބައެއް ރިޕޯޓުތައް ބުނެއެވެ. ހަމައެހެންމެ ޖޫރިމަނާގެ ގޮތުގައި އޭނާ 30 މިލިއަން ޔޫރޯ ދައްކަން ޖެހުމަކީ ވެސް އެކަށީގެންވާ ކަމެއް ކަމަށް ރިޕޯޓުތައް ބުނެއެވެ. ޝަރީއަތުން ބޭރުން މައްސަލަ ހައްލުނުވެއްޖެނަމަ ހުކުމަކާ ހަމަޔަށް ރޮނާލްޑޯ ދާން ޖެހޭނެ ކަމަށް ވެސް ރިޕޯޓުތައް ބުނެއެވެ.

ރޮނާލްޑޯގެ މައްޗަށް ސްޕެއިންގެ ޓެކްސް އޭޖެންސީއިން ފެންމަތިކުރި ރިޕޯޓަކަށް ބިނާކޮށް ސްޕެއިންގެ ޕްރޮސެކިއުޓަރުން ދައުވާ އުފުލާފައިވަނީ 14.7 މިލިއަން ޔޫރޯ ހޯދުމަށެވެ. ޓެކްސްއަށް މަކަރު ހެދިކަމުގެ ވަކިވަކި ހަތަރު ދައުވާއެއް އޭނާގެ މައްޗަށް އުފުލާފައިވާއިރު އެ ކުށްތައް ސާބިތުވެއްޖެނަމަ ޖަލު ހުކުމެއް އޭނާ ތަންފީޒުކުރަން ޖެހޭނެއެވެ. ހަމައެހެންމެ ޖޫރިމަނާގެ ގޮތުގައި 100 މިލިއަން ޔޫރޯ ވެސް އޭނާ ދައްކަން ޖެހޭނެއެވެ. ރޮނާލްޑޯގެ މައްޗަށް ކުށް ސާބިތުނުވި ނަމަވެސް އެޑްމިނިސްޓްރޭޓިވް ފީގެ ގޮތުގައި އޭނާ 30 މިލިއަން ޔޫރޯ ދައްކަން ޖެހޭނެއެވެ.

ސްޕެއިންގެ ޓެކްސް އޭޖެންސީއިން ތުހުމަތުކުރާ ގޮތުގައި ރޮނާލްޑޯގެ އިމޭޖް ރައިޓސް ސިއްރުކުރުމުގެ ގޮތުން އޭނާ 2010 ވަނަ އަހަރު ކުންފުންޏެއް އުފައްދާފައިވެއެވެ.

މިދިޔަ އަހަރުގެ ތެރޭގައި ރޮނާލްޑޯ ވަނީ ކޯޓަށް ހާޒިރުވެ މައްސަލައިގައި ޖަވާބުދާރީ ވެސް ވެފައެވެ. އޭނާ ވަނީ މި ތުހުމަތުތަކަށް އިންކާރުކޮށްފައެވެ. އޭނާ ބުނެފައިވަނީ އޭނާ ދައްކަން ޖެހޭ ހުރިހާ ފައިސާއެއް ދައްކާފައިވާނެ ކަމަށާއި އަދި އޭނާ ކަންކަން ކުރަނީ އަބަދުވެސް އެންމެ ރަނގަޅު ގޮތަށް ކަމަށެވެ.

ރޮނާލްޑޯގެ މައްޗަށް ޓެކްސްއަށް މަކަރު ހެދުމުގެ ދައުވާ އުފުލާފައިވާއިރު އޭނާގެ ޓީމަށް ކުޅެމުން އަންނަ ބްރެޒިލްގެ ޑިފެންޑަރު މާސެލޯގެ މައްޗަށް ވެސް ވަނީ އެ ކުށް ސާބިތުވެފައެވެ. މީގެ ކުރިން ސްޕެއިންގައި ޓެކްސް އަށް މަކަރު ހެދި ކަމުގެ ތުހުމަތު ކުރެވުނު ކުޅުންތެރިންގެ ތެރޭގައި ބާސެލޯނާ އަށް ކުޅޭ އާޖެންޓީނާގެ ފޯވާޑް ލިއޮނެލް މެސީ، އަދި ޑިފެންޑަރ ހާވިއޭ މަޝަރާނޯގެ އިތުރުން ބާސެލޯނާ އަށް ކުޅުނު ބްރެޒިލްގެ ފޯވާޑް ނޭމާ އަދި ރެއާލް މެޑްރިޑަށް ކުޅޭ ޕޯޗުގަލްގެ ފޯވާޑް ކްރިސްޓިއާނޯ ރޮނާލްޑޯ ހިމެނެ އެވެ.