ޖަލު ހުކުމުން ސަލާމަތްވުމަށް ޑިމަރިއާ އަށް 1.7 މިލިއަން ޕައުންޑުގެ ޖޫރިމައިނާއެއް
ޑިމަރިއާ އަށް ވަނީ ހަ މަސް ދުވަހުގެ ޖަލު ހުކުމެއް އިއްވާފައި
ޕީއެސްޖީއަށް ކުޅެމުން އަންނަ އެންހަލް ޑިމަރިއާ
ޓެކްސް އަށް މަކަރު ހެދިކަމަށް އެއްބަސްވެފައިވާ ޕެރިސް ސެއިންޓް ޖާމަން (ޕީއެސްޖީ) ގެ އެޓޭކިން މިޑްފިލްޑަރު ޖަލުހުކުމުން ސަލާމަތްވުމަށް 1.7 މިލިއަން ޕައުންޑުގެ ޖޫރިމައިނާއެއް ދައްކަން ޖެހިއްޖެ އެވެ.
ޑިމަރިއާއަށް ހަ މަސްދުވަހުގެ ޖަލު ހުކުމެއް އައިސްފައިވާއިރު، އޭނާ ވަނީ ރެއާލް މެޑްރިޑްގައި ހޭދަކުރި ދުވަސްކޮޅު ސްޕެއިންގެ ސަރުކާރަށް ދައްކަންޖެހޭ 1.14 މިލިއަން ޕައުންޑުގެ ޓެކްސް އަށް މަކަރުހަދާފައެވެ.
ފާއިތުވެދިޔަ ދުވަސްކޮޅު މަޝްހޫރު ގިނަ ފުޓުބޯޅަ ކުޅުންތެރިންނަށް ވަނީ ޓެކްސް އަށް މަކަރު ހެދިކަމަށް ތުހުމަތުކޮށްފައެވެ. އަދި ބައެއް ކުޅުންތެރިންނަށް ވަނީ އަދަބުވެސް ދެވިފައެވެ.
ޓެކްސްއަށް މަކަރު ހެދިކަން ސާބިތުވި ކުޅުންތެރިން ތެރޭގައި ބާސާ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީވެސް ހިމެނެއެވެ. އެގޮތުން އޭނާ 21 މަސްދުވަހަށް ޖަލަށް ލުމަށްވެސް ސްޕެއިންގެ ކޯޓުން ވަނީ ހުކުމްކޮށްފައެވެ. މެސީ ވަނީ އޭނާ ޓެކްސް އަށް މަކަރު ނަހަދާކަމަށް ބުނެފައެވެ.
މީގެއިތުރުން ޓެކްސް އަށް މަކަރު ހެދިކަމުގެ ތުހުމަތު ރެއާލް މެޑްރިޑަށް ކުޅެމުން އަންނަ ކްރިސްޓިއާނޯ ރޮނާލްޑޯއަށްވެސް ކުރެވިފައިވެއެވެ. ރޮނާލްޑޯއަށް ކުރެވޭ ތުހުމަތުގައި އޭނާ 14.7 މިލިއަން ޔޫރޯގެ ޓެކްސް ފައިސާއަށް މަކަރު ހެދިކަމަށްވެއެވެ. އެހެންނަމަވެސް އޭނާވެސް މިކަމާ ދެކޮޅު ހަދައެވެ.
