ކޮރަޕްޝަނުގެ ތުހުމަތުގައި މަގާމުން ދުރުކުރެވިފައިވާ ދެކުނު ކޮރެއާގެ ކުރީގެ ރައީސް ޕާކް ގިއުން ހައިގެ މައްޗަށް އުފުލި މަގާމުގެ ނުފޫނު ބޭނުންކުރުމުގެ ދައުވާ ސާބިތުވާ ކަމަށް އެ ގައުމުގެ ކޯޓަކުން ހުކުރު ދުވަހު ހުކުމް ކޮށްފިއެވެ.
އުމުރުފުޅުން 66 އަހަރުފުޅުގެ ޕާކްގެ މައްޗަށް ކުރެވިފައިވާ ދައުވާތަކުގެ ތެރޭގައި، ކޮރަޕްޝަނާއި، މަގާމުގެ ބޭނުން ނާޖާއިޒު ގޮތުގައި ހިފުމާއި، ދައުލަތުގެ ސިއްރުތައް ބޭރުކުރުން ހިމެނެއެވެ.
ޕާކްގެ މައްޗަށް ތުހުމަތު ކުރެވުނީ އެކަމަނާގެ ގާތް އެކުވެރިއެއް ކަމަށްވާ ޗޮއި ސުން ސިލްއަށް ކުންފުނިތަކުން ފައިސާ ލިބޭ ގޮތަށް އެކުންފުނިތަކަށް ދައުލަތުން ކަންކަން ފަހިކޮށްދެއްވަން މަސައްކަތްކުރެއްވި ކަމަށެވެ.
މި މައްސަލައިގައި ޕާކްގެ އެކުވެރިޔާގެ މައްޗަށް ވަނީ ކޮރަޕްޝަނުގެ ކުށް ސާބިތުވެ, ތިން އަހަރަށް ޖަލަށް ލުމަށް 2017 ވަނަ އަހަރުގެ ޖޫންމަހު ހުކުމްކޮށްފައެވެ.
ޗޮއި ސޫން-ސިލްގެ މައްޗަށް ފުރަތަމަ ސާބިތު ކުރީ އޭނާގެ އަންހެން ދަރިފުޅަށް މަގުފަހިވާނެހެންް ދައުލަތުގެ ތެރެއިން ކަންތައްތަކެއް ކުރުމެވެ.
މިދިޔަ އަހަރުގެ މާޗް މަހުގެ 10 ވަނަ ދުވަހު ޕާކް މަގާމުން ވަކިކުރެވިފައިވާއިރު 2016 ވަނަ އަހަރުގެ ޑިސެމްބަރު މަހުން ފެށިގެން ޕާކް ހުންނެވީ މަގާމުން ސަސްޕެންޑްކުރެވިފައެވެ.
ޕާކް ގިއުން ހައި މަގާމުން ދުރުކުރުމަށް ފެންނަ ކަމަށް ގާނޫނު ހަދާ މަޖިލީހުން ނިންމިއިރު ކޯޓް މަރުހަލާގައި ފަނޑިޔާރުންގެ ބެންޗުން ވެސް އިއްތިފާގުވެފައި ވަނީ އެ ނިންމުމަށް ތާއީދުކުރުމަށެވެ.
