ދޮށީ އުމުރުގެ މީހުންނާއި ގުޅޭ ގައުމީ ސިޔާސަތެއް ފުރަތަމަ ފަހަރަށް އެކުލަވާލައިފި
5 އެޕްރީލު 2018 | ބުރާސްފަތި 13:23މި ސިޔާސަތުގެ ދަށުން އިސްކަން ދެވޭނެ މުހިއްމު ކަންކަމާއި އަދި ހާސިލް ކުރަން ބޭނުންވާ ލަނޑުދަނޑިތައް ވަނީ ބަޔާންކޮށްފައި
ޖެންޑާ މިނިސްޓަރ ޒެނީޝާ ޝަހީދު ޒަކީ އިސް ރައްވެއްސަކާ އެކު | ޖެންޑާ މިނިސްޓްރީ
ދޮށީ އުމުރުގެ މީހުންނާ ގުޅޭ ގައުމީ ސިޔާސަތެއް ފުރަތަމަ ފަހަރަށް އެކުލަވާލައި އާއްމުކޮށްފިއެވެ.
މިނިސްޓްރީ އޮފް ޖެންޑާ އެންޑް ފެމިލީން އެކުލަވާލި މި ސިޔާސަތުގައި، ދޮށީ އުމުރުގެ މީހުންގެ ހައްގުތަކާއި، މި ސިޔާސަތުގެ ދަށުން އިސްކަން ދެވޭނެ މުހިއްމު ކަންކަމާއި އަދި ހާސިލް ކުރަން ބޭނުންވާ ލަނޑުދަނޑިތައް ވަނީ ބަޔާންކޮށްފައެވެ.
މިނިސްޓްރީން ބުނީ މި ސިޔާސަތުގެ މަގްސަދަކީ، ދޮށީ އުމުރުގެ މީހުންނަށް އިޖުތިމާއިީ ގޮތުންނާއި، އިގްތިސާދީ ގޮތުން ދިމާވާ ގޮންޖެހުންތައް ދެނެގަތުމާއި، ރައްކާތެރިކަން ހޯދައި ދިނުމާއި، މުޖުތަމައުގައި އެފަރާތުގެ ބައިވެރިވުން އިތުރު ކުރެވޭނެ ގޮތްތައް ހޯދައިދީ، އާއިލާގެ ތެރޭގައްޔާއި މުޖުތަމައުގައި ޒިންމާދާރު ބައެއްގެ ގޮތުގައި ފާގަތި އުފާވެރި ދިރިއުޅުމެއް އުޅެވޭނެ ގޮތްތަކަށް މަގުތައް ތަނަވަސްކޮސްދިނުން ކަމަށެެވެ.
ރާއްޖޭގައި ދޮށީ އުމުރުގެ އާބާދީ އިތުރުވަމުން އަންނަ އިރު އެފަރާތްތަކަށް އެކި ކަހަަލަ ގޮންޖެހުންތައް ކުރިމަތި ވާކަން ޖެންޑާ އިން ވަނީ ފާހަގަކޮށްފައެވެ. އަދި މުޖުތަމައުގައި އެފަރާތްތަކާ މެދު ތަފާތުކުރުންތައް ގެންގުޅޭކަން ވަނީ ފާހަގަކޮށްފައެވެ. އެހެންކަމުން މި ސިޔާސަތުގެ ދަށުން ދޮށީ އުމުރުގެ ފަރާތްތަކަށް އަބުރުވެރި ދިރިއުޅުމުގެ ހައްގާއި، ސިއްހީ ޚިދުމަތުގެ ހައްގާއި، މަސައްކަތް ކުރުމާއި، މުދަލާއި މިލްކިއްޔާތުގެ ހައްގު، އިޖުތިމާއީ ރައްކާތެރިކަމުގެ ހައްގުގެ އިތުރުން އެކި ބާވަތުގެ އަނިޔާއިން ރައްކާތެރިކަން ލިބުމުގެ ހައްގު ހޯދައި ދިނުމަކީ މި ސިޔާސަތުގައި ހިމެނޭ މައިގަނޑު ކަންކަމެވެ.
މި ސިޔާސަތު ބިނާވެފައިވަނީ، ދޮށީ އުމުރުގެ މީހުންނަށް ޚާއްސަކޮށްގެން އދ. އިން އެކުލަވާލާފައިވާ "ޔޫއެން ޕްރިންސިޕަލްސް ފޮރ އޯލްޑަރ ޕާސަންސް 1991" ގައި ދުނިޔޭގެ ސިއްހައްތު ޖަމިއްޔާއިން އެކުލަވާލާފައިވާ "ޑަބުލިއުއެޗްއޯ ގްލޯބަލް ސްޓްރެޓަޖީ އެންޑް ޕްލޭން އޮފް އެކްޝަން އޮން އޭޖިންގ އެންޑް ހެލްތް 2016-2020" އަދި ދެމެހެއްޓެނިވި ތަރައްގީގެ ލަނޑުދަނޑި ތައް (އެސްޑީޖީ) 2015-2030 ގެ މައްޗަށްކަމަށް ޖެންޑާއިން ހާމަކުރެއެވެ.
ދުނިޔޭގެ ސިއްހަތު ޖަމިއްޔާ ޑަބުލިއުއެޗްއޯގެ އެންމެ ފަހުގެ ތަފާސް ހިސާބުތައް ދައްކާ ގޮތުން 2015 ވަނަ އަހަރު ދުނިޔޭގައި ތިބޭނެ ކަމަށް ލަފާކުރާ 60 އަހަރުން މަތީގެ އާބާދީގެ ޖުމްލައަކީ 900 މިލިއަނެވެ. އަދި މި އަދަދު 2050 ގައި މިއަދަދު 2 ބިލިއަނަށް ގާތްކުރާނެކަމަށް ލާފާކުރެއެވެ. ދިވެހިރާއްޖޭގެ 2014 ވަނަ އަހަރުގެ ބޯހިމެނުމުގެ ތަފާސް ހިސާބުތައް ދައްކާގޮތުން 2045 ވަނަ އަހަރު އުމުރުން 45 އަހަރުން މަތީގެ އާބާދީ، އެއަށްވުރެ ދަށުގެ އުމުރުފުރާގެ އާބާދީއާ އަޅާބަލާއިރު، އިތުރުވާނެ ކަމަށް ވަނީ ލަފާކޮށްފައެވެ. އަދި ކުރިއަށް އޮތް 25 އަހަރުގެތެރޭގައި އުމުރުން 65 އަހަރުން މަތީގެ އާބާދީ 65،000 އަށް އަރާނެކަމަށް ވަނީ ލަފާކޮށްފައެވެ.
ޖެންޑާއިން ބުނީ، ދޮށީ އުމުރުގެ މީހުންގެ ހައްގުތައް ރައްކާތެރިކޮށް ކުރިއެރުވުމުގައި ރިއާޔަތްކުރާނީ މި ސިޔާސަތުގައި ހިމެނޭ ކަން ކަމަށެވެ.
