އުމްޓީޓީ އަދި އިނިއެސްޓާ ބާސާގައި މަޑުކުރާނެ ކަމަށް ވަލްވާޑޭ އުއްމީދުކުރޭ

ބާސެލޯނާއަށް ކުޅެމުން އަންނަ ފްރާންސްގެ ޑިފެންޑަރު ސެމުއެލް އުމްޓީޓީ އަދި އެ ޓީމުގެ ކެޕްޓަން އަންދްރޭސް އިނިއެސްޓާ ވެސް އެ ޓީމުގެ މަޑުކުރާނެ ކަމަށް އެ ޓީމުގެ ކޯޗު އާނެސްޓޯ ވަލްވާޑޭ ބުނެފިއެވެ.

އުމުރުން 24 އަހަރުގެ ޑިފެންޑަރު ހޯދުމަށް ޔޫރަޕުގެ އެންމެ ބޮޑު ޓީމުތަކުން މަސައްކަތްކުރަމުން އަންނައިރު އޭނާ ވެސް ވަނީ އެހެން ކްލަބްތަކުން ހުށަހެޅުންތައް އަންނަމުންދާ ކަމަށް ބުނެފައެވެ. އޭނާ ހޯދުމަށް އެންމެ ބޮޑަށް މަސައްކަތް ކުރަމުން އަންނަނީ އިނގިރޭސިވިލާތުގެ މެންޗެސްޓާ ޔުނައިޓެޑް އިން ކަމަށްވާއިރު އޭނާ ހޯދުމަށް އެ ޓީމުން ބާސާއަށް 60 މިލިއަން ޔޫރޯގެ ފީއެއް ދައްކަންޖެހެއެވެ. އުމްޓީޓީގެ ރިލީސް ފީއަކީ 60 މިލިއަން ޔޫރޯއަށްވުމާއެކު އޭނާގެ ސޮއި ހޯދުމަކީ އެއްވެސް ޓީމަކަށް އުނދަގޫވާނެ ކަމެއް ނޫނެވެ. އެހެން ނަމަވެސް އާ ކޮންޓްރެކްޓަކާއެކު އޭނާގެ ރިލީސް ފީ މަތިކުރުމަށް ބާސާއިން މަސައްކަތް ކުރަމުންދާ ކަމަށް ރިޕޯޓުތައް ބުނެއެވެ.

ނޫސްވެރިންނާއި ވާހަކަ ދައްކަމުން ވަލްވާޑޭ ބުނީ އުމްޓީޓީގެ އެއްވެސް ވާހަކައެއް އަޑުއިވިފައި ނުވާ ކަމަށާއި ހަމައެކަނި އެނގޭ ކަމަކީ އޭނާ ހުރީ ޓީމުގައި ވަރަށް ހިތްހަމަޖެހިގެން ކަމަށެވެ. އަދި ޓީމުގެ އެންމެން ވެސް އުމްޓީޓީގެ ފަރާތުން ފެންނަމުންދާ ކުޅުމާމެދު ވަރަށް ހިތްހަމަޖެހޭ ކަމަށް ވަލްވާޑޭ ބުނެފައިވެއެވެ. އޭނާ ބުނީ އުއްމީދަކީ ކޮންޓްރެކްޓްގެ މަޝްވަރާތައް ރަނގަޅަށް ދިޔުން ކަމަށާއި އޭނާ އެ ޓީމުގައި ދިގު މުއްދަތެއް ވަންދެން މަޑުކުރުން ކަމަށެވެ.

ބާސާގެ ކެޕްޓަން އަންދްރޭސް އިނިއެސްޓާ ވެސް އެ ޓީމު ދޫކޮށްލަން އުޅޭ ކަމަށް އަޑުތައް ވަނީ ފެތުރިފައެވެ. އެގޮތުން އޭނާ ހޯދުމަށް ޗައިނީޒް ސުޕާ ލީގުގެ ޓީމުތަކުން ބޮޑެތި އަދަދުތައް ހުށަހަޅަމުންދާ ކަމަށް ރިޕޯޓުތައް ބުނެއެވެ. އިނިއެސްޓާ ބުނެފައިވަނީ އޭނާގެ ކުރިމަގާއި ބެހޭގޮތުން އެޕްރީލް މަސް ނިމުމުގެ ކުރިން ގޮތެއް ނިންމާނެ ކަމަށެވެ.

އިނިއެސްޓާއާ ގުޅޭގޮތުން ވަލްވާޑޭ ބުނީ އިނިއެސްޓާ ޓީމުގައި މަޑުކުރުވާނެ ގޮތަކާމެދު ވިސްނާފައިނުވާ ކަމަށާއި އެކަމުގެ އެއްވެސް ބާރެއް އޭނާގެ އަތްމަތީގައި ނެތް ކަމަށެވެ. ވަލްވާޑޭ ބުނީ އިނިއެސްޓާ ބޭނުންވާ ކަންކަން އެނގޭނީ އިނިއެސްޓާއަށް ކަމަށާއި މިއީ އޭނާގެ އަމިއްލަ ނިންމުމެއްގެ ގޮތުގައި ދެކޭ ކަމަށެވެ.

ބާސާގެ ޑިފެންސްގައި އުމްޓީޓީ ވަނީ ފާއިތުވެދިޔަ ދެ ސީޒަނުގައި މުހިންމު ދައުރެއް އަދާކޮށްފައެވެ. ހަމައެހެންމެ އިނިއެސްޓާއަކީ އެ ޓީމުގެ ކާމިޔާބުގެ މައިގަނޑު އެއް ސަބަބު ކަމަށްވާއިރު މި ދެ ކުޅުންތެރިން ޓީމުގައި މަޑުކުރުވުމަށް ބާސާގެ މެނޭޖްމަންޓުން ވެސް އަންނަނީ މަސައްކަތް ކުރަމުންނެވެ. ސްޕެނިޝް ލަލީގާގެ އެއްވަނައިގައި ބާސާ އޮތްއިރު މި ސީޒަނުގެ ސްޕެނިޝް ކޮޕާ ޑެލްރޭ އަދި ޔުއެފާ ޗެމްޕިއަންސް ލީގު ކާމިޔާބު ކުރުމުގެ ފުރުސަތު ވެސް އެ ޓީމަށް އެބައޮތެވެ.