ހޮލީވުޑްގެ މަޝްހޫރު ދެމަފިރިން ކަމުގައިވާ ޗެނިންގ ޓޭޓަމްއާއި އޭނާގެ އަންހެނުން ޖެނާ ޑުވާން ވަރިވާން ނިންމައިފިއެވެ.

"މެޖިކް މައިކް" ފަދަ މަޝްހޫރު ފިލްމްތަކުގެ ލީޑް ރޯލުން ފެނިގެންދާ ޗެނިންގއާއި ޖެނާ ދިމާވެފައިވަނީ "ސްޓެޕް އަޕް" ފިލްމްގެ ޝޫޓިންގގެ ތެރެއިންނެވެ. މަޝްހޫރު "ސްޓެޕް އަޕް" ފިލްމް ފްރެންޗައިޒްގެ އެންމެ ފުރަތަމަ އަދި އެންމެ ކާމިޔާބު ފިލްމްގެ ލީޑް ރޯލުން ފެނިގެންދަނީ މި ދެތަރިންނެވެ. ދެ މީހުންނަކީވެސް ނެށުމުގެ ދުނިޔޭގައިވެސް ފާހަގަކޮށްލެވޭ ދެ މީހުންނެވެ.

ޗެނިންގއާއި ޖެނާ ކައިވެނިކޮށްފައިވަނީ 2009 ވަނަ އަހަރުގެ ޖުލައި މަހުއެވެ. އަދި އެމީހުންގެ ފުރަތަމަ އަދި ހަމަ އެކަނި ދަރިފުޅު، އެވަރލީ ޓޭޓަމް ކިޔާ އަންހެން ކުއްޖެއް، ލިބިފައިވަނީ 31 މޭ 2013 ގައެވެ.

13 އަހަރު އެކުގައި އުޅުމަށްފަހު ވަކިވާން ނިންމިކަން ޗެނިންގއާއި ޖެނާ އިއުލާންކޮށްފައިވަނީ އަންގާރަ ދުވަހު، ސޯޝަލް މީޑިއާ މެދުވެރިކޮށެވެ.

ސޯޝަލް މީޑިއާ މެދުވެރިކޮށް ހިއްސާކޮށްފައިވާ މެސެޖްގައިވާ ގޮތުން، ވަކިވާން ނިންމިއަސް ދެ މީހުން އެކަކު އަނެކަކު ދެކެވާ ލޯތްބަކަށް "އެއްވެސް ބަދަލެއް ނާދެ"އެވެ.

"މީގެ އެތައް އަހަރެއް ކުރިން ދިމާވެގެން ދެ މީހުން އެކަކު އަނެކަކު ދެކެ ލޯބިވީ. އެކަކު އަނެކަކު ދެކެ ވާ ލޯތްބަށް އެއްވެސް ބަދަލެއް ނާދޭ، އެކަމަކު ލޯތްބަކީ ރީތި އެޑްވެންޗަރއެއް، އަދި މިވަގުތު އަހަރެމެން މި ގެންދަނީ ދެ ދިމާލަކަށް،" ޗެނިންގއާއި ޖެނަރގެ މެސެޖްގައި ބުނެފައިވެއެވެ.

މި ނިންމުމުގައި އެއްވެސް ސިއްރެއް ނެތްކަމަށާއި، ދެ ގާތް އެކުވެރިން އެކަކު އަނެކަކަށް އެންމެ އުފާވެރި ދިރިއުޅުމެއް އުޅުމަށް ފުރުސަތު ދެނީކަމަށް އެ މެސެޖްގައި ފާހަގަކޮށްފައިވެއެވެ.

މީގެ އިތުރުން، މިފަދަ ވާހަކައެއް އެންމެނާ ހިއްސާ ކުރަން އުނދަގޫކަމަށާއި، ނަމަވެސް ހިއްސާ ކުރަން ނިންމީ "މިއީ އަހަރަމެން ދިރިއުޅެން ނިންމި ގޮތުގެ ނަތީޖާ"އެއް ކަމުން ކަމަށާއި، ހުރިހާ ފޭނުންނާ "ތެދު" ހިއްސާ ކުރަން ބޭނުންވީކަމަށް އެ މީހުން ބުންޏެވެ.

އަދި، މިކަމާ ގުޅޭ ގޮތުން ދެ މީހުން އިތުރަށް ކޮމެންޓް ނުކުރާނެކަމަށް މެސެޖްގައި ފާހަގަކޮށްފައިވެއެވެ.