ބޮލީވުޑްގެ މަޝްހޫރު ޑައިރެކްޓަރު ސަންޖޭ ލީލާ ބަންސާލީ ދެން އުފައްދާ ފިލްމުން ފެނިގެން ދާނީ އައިޝްވަރިޔާ ރާއީ ކަމަށް މީޑިއާ ރިޕޯޓްތައް ބުނެފިއެވެ.
މީގެ ކުރިން އަޑުތައް ފެތުރިފައިވާ ގޮތުން ބަންސާލީގެ އާ ފިލްމުން ބަތަލާއެއްގެ ރޯލުން ފެނިގެން ދާނީ ދީޕިކާ ޕަދުކޯންއެވެ.
އެހެން ނަމަވެސް ދީޕިކާ ވަނީ އެކަން ދޮގުކޮށްފައެވެ.
އިންޑިއާގެ ނޫސްތަކުގައި ބުނެފައިވާ ގޮތުގައި ބަންސާލީ ހުރީ އައިޝްވަރިޔާއާ އެކު މަސައްކަތް ކުރަން ވަރަށް ބޭނުން ވެފައެވެ. އަދި އެ ފިލްމުގެ މަސައްކަތާ ބެހޭ ގޮތުން އައިޝްވަރިޔާ އާއި ބަންސާލީ މިދިޔަ ހަފްތާގައި އެ ވާހަކަ ދައްކާފައިވާ ކަމަށް ރިޕޯޓްތައް ބުނެއެވެ.
މިފިލްމާ ބެހޭ ގޮތުން ރަސްމީ ސިފައެއްގައި ވާހަކައެއް މިހާތަނަށް ދެކެވިފައެއް ނުވެއެވެ.
އައިޝްވަރިޔާ ކުޅެފައިވާ ބަންސާލީގެ ފިލްމުތަކުގެ ތެރޭގައި "ހަމް ދިލް ދޭ ޗުކޭ ސަނަމް"، "ދޭވްދާސް" އަދި "ގުޒާރިޝް" ހިމެނެއެވެ.
