އާނޯލްޑްގެ ހާލު ރަނގަޅު

މަޝްހޫރު އެކްޓަރ އާނޯލްޑް ޝްވާޓްޒްނިގާ ހިތުގެ އޮޕަރޭޝަނެއް ކޮށްފައި ވަނީ މިދިޔަ ބުރާސްފަތި ދުވަހުގައެވެ.

އެމެރިކާގެ ކެލެފޯނިއާގައި 2003 އިން 2011 ވަނަ އަހަރާ ހަމައަށް ގަވަރނަރުކަން ވެސް ކުރި އާނޯލްޑް ހިތުގެ އޮޕަރޭޝަނެއްކޮށްފައި ވަނީ އޭނާގެ ހިތަށް މީގެ ކުރިން ލައްވާފައިވާ "ވަލްވް" ޑިވައިސް ބަދަލުކުރުމަށެވެ.

އުމުރުން މިހާރު 70 އަހަރުގެ އާނޯލްޑްގެ ހިތަށް ވަލްވް ލައްވާފައި ވަނީ 1997 ވަނަ އަހަރު މެކްސިކޯގައެވެ. އާނޯލްޑް ނެރެފައިވާ ސްޓޭޓްމަންޓެއްގައި ބުނެފައި ވަނީ އޭނާ މިހާރު "ސްޓޭބަލް" ކަމަށެވެ.

"އަހަންނަށް ފީލް ވަނީ މީގެ 20 އަހަރު ކުރިން ހެދި ސާޖަރީ ގޮތަށް މާ ބޮޑު ތަފާތެއް ނެތް. އަހަރެން މިހާރު ސްޓޭބަލް" އަނޯލްޑްގެ ސްޓޭޓްމަންޓުގައި ބުނެފައިވެއެވެ.

އާނޯލްޑް ބުނެފައި ވަނީ އޭނާ މިހާރު ކުރިއެކޭ އެއްގޮތަށް ކަސްރަތުކޮށް ޖިމްއަށް ދާ ކަމަށެވެ.

" ކޮންމެ ދުވަހަކު ވެސް ފަތިހު 5 ޖަހާއިރު އަހަރެން ހޭލަން. ހޭލައިގެން ބައިސްކަލުގައި ދަނީ ޖިމްއަށް. ކޮންމެ ދުވަހަކު ވެސް އެއް ގަޑިއިރަށް ޖިމްއަށް ގޮސް ހިނގަން. ހެނދުނުގެ ސައި ބޮނީ އެއަށް ފަހު،" އާނޯލްޑް ޓީއެމްޒެޑްއަށް ދީފައިވާ އިންޓަވިއުއެއްގައި އޭނާ ބުނެފައި ވެއެވެ.

އޮސްޓްރިޔާއަށް އުފަން އާނޯލްޑްއަށް ވަނީ އޭނާގެ އުމުރުން 20 އަހަރުގައި މިސްޓަރ ޔުނިވާސްގެ މަގާމު ލިބިފައެވެ. މީގެ އިތުރުން މިދިޔަ މޭ މަހު ފްރާންސްގެ ސަރުކާރުން ތިމާވެށި ހިމާޔަތްކުރުމަށް މަސައްކަތްކުރާ މީހުނަށްދޭ އެންމެ ޝަރަފުވެރި މެޑަލް ވެސް އޭނާއަށް ވަނީ ލިބިފައެވެ. ހޮލީވޫޑްގައި އޭނާ ވަނީ މަޝްހޫރު ގިނަ ފިލްމަތަކެއް ކުޅެފައެވެ. އަދި ގަވަރުނަރުކަމާ ހަވާލުވުމަށް ފަހު ދުވަސްތަކެއްގެ މެދުކެނޑުމެއް ދިޔަ ނަމަވެސް އޭނާ ވަނީ އަލުން އެނބުރި އައިސް ފިލްމް ކުޅެން ފަށާފައެވެ.