ފެންބޮޑުވުމުގެ ހާދިސާގައި ހާލުގައި ޖެހިފައި ތިބި މީހުނަށް އެހީވުމަށް އާމިރު ގޮވާލައިފި
އައްސާމާއި ގުޖުރާތުގައި ފެންބޮޑުވުމުގެ ހާދިސާއެއް ހިނގާފައި
އާމިރު ޚާން
އައްސާމާއި ގުޖުރާތުގައި ފެންބޮޑުވުމުގެ ހާދިސާގައި ހާލުގައި ޖެހިފައި ތިބި މީހުނަށް އެހީވުމަށް އާމިރު ޚާން ގޮވާލައިފި އެވެ.
މަޝްހޫރު ބޮލީވުޑުގެ ތަރި އާމިރު ޚާނަކީ އިޖްތިމާއީ ގިނަ ކަންކަމުގައި އިންޑިޔާއަށް އެކި ގޮތް ގޮތުން އެހީތެރިވަމުން އަންނަ ފަންނާނެކެވެ.
އޭގެ ތެރޭގައި "ސަތްޔަމެވް ޖަޔަތީ" އަކީ އިންޑިޔާގެ ގައުމީ ޓީވީން ގެނެސްދިން ވަރަށް މަޤްބޫލު ޝޯވްއެކެވެ. އާމިރު ހާން ގެނެސްދިން މިޝޯވްގައި އިޖްތިމާއީ ގިނަ މައްސަލަތަކާ ގުޅިގެން ވާހަކަދައްކާފައިވެއެވެ.
އާމިރު ޓުވިޓާގައި ޕޯސްޓްކޮށްފައިވާ ވީޑިއޯގައި ބުނެފައިވަނީ އައްސާމާއި ގުޖުރާތުގައި ހިނގި ފެންބޮޑުވުމުގެ ހާދިސާއާއި ގުޅިގެން ހާލުގައި ޖެހިފައިތިބި މީހުންނަށް އެހީތެރިވުމަށެވެ.
އާމިރު ޚާންގެ "ތަގްސް އޮން ހިންދޮސްތާން" ގެ ޝޫޓިން މިވަގުތު މޯލްޓާގައި ކުރިއަށްދާ ކަމަށް ހަބަރުތައް ބުނެއެވެ.
ވިޖޭ ކްރިޝްނާ ޑައިރެކްޓް ކުރާ މިފިލްމުގައި އަމީތާބު ބައްޗަން، ފާތިމާ ސަނާ ޚާން އަދި ކެޓްރީނާ ކައިފްވެސް ފެނިގެންދާނެ އެވެ.
މީގެ އިތުރުންވެސް އާމިރު ހާން ދެން ފެނިގެންދާނީ "ސިކްރެޓް ސުޕަރސްޓާރ" އިންނެވެ. މިއީ އާމިރުއާއި އޭނާގެ އަންހެނުން ކިރަން ރާއޯ ޕްރޮޑިއުސްކުރާ ފިލްމެކެވެ. މިފިލްމު ޑައިރެކްޓް ކުރަނީ އަދްވައިތް ޗަންދަންއެވެ. އަދި މިފިލްމުގެ ލީޑް ރޯލުން ފެނިގެންދާނޯ ޒާއިރާ ވާސިމް އެވެ.
