ބޮޓްސްވާނާގެ އައު ރައީސް މަސީސީ މަގާމުގެ ހުވާ ކުރައްވައިފި

ވަޒީފާ ނެތް މީހުންގެ އަދަދު މަދު ކުރައްވާނެ ކަމުގެ ވައުދާއެކު، ބޮޓްސްވާނާގެ އައު ރައީސް މޮގްވީޓްސީ މަސީސީ މަގާމުގެ ހުވާ ކުރައްވައިފި އެވެ.

ބޮޓްސްވާނާގެ ރައީސްގެ މަގާމަށް މަސީސީ އައްޔަން ކޮށްފައިވަނީ، 5 އަހަރުގެ ރިޔާސީ ދެ ދައުރު ފުރިހަމަ ކުރެއްވުމަށް ފަހު ކުރީގެ ރައީސް އިއާން ޚާމާ މަގާމުން ވަކިވެވަޑައިގަތުމާއި ގުޅިގެންނެވެ.

ބޮޓްސްވާނާގެ ގާނޫނު އަސާސީގެ ދަށުން އެގައުމުގައި އެކަކަށް ވެރިކަން ކުރެވޭނެ އެންމެ ދިގު މުއްދަތަކީ 10 އަހަރެވެ.

ކުރީގެ ރައީސް ޚާމާގެ ދައުރު ހަމަވުމާއެކު، ކުރިން ނައިބު ރައީސްގެ މަގާމުގައި ހުންނެވި މަސީސީ އޮޓޮމެޓިކުން ރައީސް ކަމުގެ މަގާމަށް އައްޔަން ކޮށްފައިވާއިރު، އަންނަ އަހަރުގެ އޮކްޓޯބަރު މަހު ބޭއްވުމަށް ހަމަޖެހިފައިވާ އެގައުމުގެ އާއްމު އިންތިޚާބު ކާމިޔާބު ކުރައްވާ، އެގައުމުގައި ވެރިކަން ކުރާ ބޮޓްސްވާނާ ޑިމޮކްރެޓިކް ޕާޓީ (ބީޑީޕީ) އަށް އިތުރު ފަސް އަހަރުގެ ދައުރެއް ހޯއްދަވާނެ ކަމަށް ބެލެވެއެވެ.

އެފްރިކާ ބައްރުގެ އެންމެ ސުލްހަވެރި ގައުމުތަކުގެ ތެރޭގައި ހިމެނޭ ބޮޓްސްވާނާ އަކީ، އެ އެސަރަހައްދުގެ ގައުމުތަކުގެ ތެރެއިން ހެޔޮ ވެރިކަމާއި ގާނޫނުގެ ވެރިކަން ނެގެހެއްޓުމުގައި ނަމޫނާ ގައުމެކެވެ. އަންނަ އަހަރު ބޭއްވުމަށް ހަމަޖެހިފައިވާ އެގައުމުގެ އާއްމު އިންތިޚާބުގެ 18 މަސް ކުރިން، އެގައުމުގެ ވެރިކަން ބަދަލުވުމުގެ ކަންކަން ހިނގާ ގޮސްފައިވަނީ އަމާން އޮމާން ކަމާއެކުގައެވެ.

ބޮޓްސްވާނާ އަކީ އެފްރިކާ ގައުމުތަކުގެ ތެރެއިން ކޮރަޕްޝަން އެންމެ މަދު ގައުމުގެ ގޮތުގައި ޓްރާންސްޕޭރަންސީ އިންޓަރނޭޝަނަލް އިން ކޮންމެ އަހަރަކު ނެރޭ ދުނިޔޭގެ ކޮރަޕްޝަން އިންޑެކްސްގައި ލިސްޓު ކޮށްފައިވާ ގައުމެކެވެ.

ވަޒީފާ ނެތް މީހުންގެ ނިސްބަތް އިތުރުވުމާއި، އެއިޑްސްގެ ބަލިމަޑުކަން ފެތުރޭ ނިސްބަތް އިތުރުވުމަކީ އެގައުމަށް ދިމާވެފައިވާ އެންމެ ބޮޑު ގޮންޖެހުމެވެ.

ވެރިކަމުގެ ހުވާ ކުރެއްވުމަށް ފަހު ދެއްވި ރިޔާސީ ޚިތާބުގައި ރައީސް މަސީސީ ވިދާޅުވީ، ބޮޓްސްވާނާގެ ކާމިޔާބީގެ ސިއްރަކީ ކުރީގެ ވެރިން ދަމަހައްޓަމުން އައި ސުލްހަވެރިކަމާއި އަމާންކަން ކަމަށެވެ.

އަދި ރިޔާސީ ދައުރުގައި އެންމެ އިސްކަމެއް ދެއްވާނީ ޒުވާނުންގެ މެދުގައި ވަޒީފާ ނެތް މީހުންގެ މިންވަރު ކުޑަ ކުރުން ކަމަށް މަސީސީ ވިދާޅުވި އެވެ.

މީގެ އިތުރުން އޭނާ ވަނީ، އެގައުމުގައި އެއިޑްސް ފެތުރުން ހުއްޓުވުމާއި، އެޗްއައިވީ އަށް ދޭ ފަރުވާގެ ފެންވަރު ރަނގަޅު ކުރައްވާނެ ކަމަށް ވައުދުވެވަޑައިގެންފައެވެ.

އުމުރުފުޅުން 55 އަހަރުގެ މަސީސީ އަކީ ކުރީގެ ރައީސް ޚާމާގެ އަރިސް ބޭފުޅެކެވެ.

އެމެރިކާ އިން ތައުލީމް ހާސިލް ކުރައވާފައިވާ ކުރީގެ ޓީޗަރެއް ކަމަށްވާ މަސީސީ އެގައުމުގެ ގާނޫނު ހަދާ މަޖިލީހަށް އެންމެ ފުރަތަމަ އިންތިޚާބު ވެވަޑައިގެންފައި ވަނީ 2009 ވަނަ އަހަރު އެވެ. 2011 ވަނަ އަހަރުން ފެށިގެން 2014 ވަނަ އަހަރުގެ ނިޔަލަށް އެގައުމުގެ މިނިސްޓަރ އޮފް ޕްރެޒިޑެންޝަލް އެފެއަރޒް އެންޑް ޕަބްލިކް އެޑްމިނިސްޓްރޭޝަންގެ މަގާމު އަދާ ކުރައްވާފައިވާ މަސީސީ އަކީ 2014 ވަނަ އަހަރުން ފެށިގެން އެގައުމުގެ އެޑިއުކޭޝަން މިނިސްޓަރެވެ. އެގައުމުގެ ނައިބު ރައީސްގެ މަގާމަށް މަސީސީ އައްޔަން ކުރައްވާފައި ވަނީ 2014 ވަނަ އަހަރުގެ ނޮވެމްބަރު މަހު އެވެ.

ބޮޓްސްވާނާގެ އާއްމު އިންތިޚާބު 2019 ވަނަ އަހަރު ބޭއްވުމަށް ހަމަޖެހިފައިވާއިރު، އެގައުމުގެ އިދިކޮޅު ހަތަރު ޕާޓީ އަކުން ވަނީ އިންތިޚާބުގައި އިދިކޮޅު ޕާޓީތަކުން އިއްތިހާދެއްގެ ގޮތުގައި މަސައް ކުރާނެކަން ހާމަކޮށްފައެވެ. އިނގިރޭސިންގެ އަތްދަށުން 1966 ވަނަ އަހަރު ބޮޓްސްވާނާ މިނިވަންވި ފަހުން އެގައުމުގައި ވެރިކަން ކުރަމުން ދަނީ ބޮޓްސްވާނާ ޑިމޮކްރެޓިކް ޕާޓީ (ބީޑީޕީ) އިންނެވެ.