ހައްގުން ކަމަކާ ނުލައި މީހުން ހައްޔަރުކޮށް ބޭ އިންސާފުން މީހުނަށް އަނިޔާ ނުދިނުމަށް ކުރީގެ ޕޮލިސް ޕޮލިސް ކޮމިޝަނަރު އަހްމަދު އަރީފް ގޮވާލައްވައިފިއެވެ.
ފުލުހުންގެ 85 ވަނަ އަހަރީ ދުވަހާ ގުޅުވައިގެން އަރީފް ނެރުއްވި ބަޔާނުގައި ގާނޫނު އަސާސީ އާއި ގާނޫނުތަކަށް ތަބާވުމަށް ހުރިހާ ފުލުހުން ނަސޭހަތްތެރިވެވަޑައިގެން އެމީހުންގެ ޒިންމާ ހަނދާންކޮށްދެއްވާފައިވެއެވެ. ދޫނިދޫގައި ހައްޔަރުކޮށްފައި ހުންނެވި އަރީފް ނެރުއްވި ބަޔާނުގައި އިސްލާމްދީނުގައި ކުށްވެރިންނަށް އަދަބު ދިނުމުގެ މަގުސަދުގެ މަފްހޫމަކަށް ވެފައި ވަނީ ކުށްތަކުން އެބަޔަކު ދުރުކުރުމާއި މުޖުތަމައު އެ ކުށެއްގެ ވަބާއިން މިންޖުކުރުން ކަމަށްވާއިރު ބަޔަކު ހައްގަކާ ނުލައި ހައްޔަރުކޮށް ބޭއިންސާފުން އަދަބު ދީގެން ނުވާނެ ކަމަށެވެ. އަދި ފުލުހުން އަބަދު ވެސް ތިބެން ޖެހޭނީ ގާނޫނުން ލިބިދީފައިވާ ބާރާއި އިހްތިޔާރުގެ ތެރޭގައި ރައްޔިތުންނަށް ރައްކާތެރިކަން ހޯދަދިނުމާއި ގާނޫނު އަސާސީ ނެގެހެއްޓުމާ އެކު ގާނޫނުއަސާސީގައި ދައުލަތުގެ ވަކި ބާރުތައް ކަމަށް ކަނޑައަޅާފައިވާ ބާރުތަކަށް ހިމާޔަތާއި ރައްކާތެރިކަން ފޯރުވައިދިނުމުގައި ސާބިތުވެ ކަމަށް ވެސް ވިދާޅުވެފައިވެއެވެ.
މި ވަގުތު މުޖުތަމައު އޮތް ގޮތް ސިފަކޮށް އަރީފް އެ ބަޔާނުގައި ވިދާޅުވެފައި ވަނީ އެހެން މީހުންގެ މިނިވަން ކަމާއި އެހެން މީހުންގެ ހައްގަށް ނުބަލައި އެއްބަޔަކު ކުރިއަށްދާއިރު އަނެއް ބަޔަކު ދަނީ ފައިސާގެ ތަނަވަސްކަން ހޯދަމުން ކަމަށާއި އަދި އަތުޖެހުނު ގޮތަކަށް އެތަނަވަސްކަން ހޯދާއިރު ދީނަކަށް އަދި މުޖުތަމައުއަކަށް ބެލުމެއް ނެތް ކަމަށެވެ. އެކަން ކަން ހަމަމަގަށް އެޅުވުމުގެ ފުރިހަމަ އިހްތިޔާރާއި ބާރުވެރިކަން ލިބިފައިވާ ފަރާތްތަތަކުން ޒިންމާ ނުނަގާ ނަމަ ހަޑިވެ ކިލަނބުވެގެންދާނީ ފުލުހުންގެ ސާފު ޔުނީފޯމް ކަމަށް އެ ބަޔަނުގައި ފުލުހުންނަށް ހަނދާންކޮށްދީފައިވެއެވެ. އެ މޭރުމުން އޭނާ އިތުރަށް ވިދާޅުވެފައި ވަނީ ފުލުހުންނާ ހަވާލުވެފައިވާ ޒިންމާ އަދާކުރުމުގައި ބަލަން ޖެހޭނީ ކުށްކުރާ މީހާގެ ހައިބަތާއި ބޮޑު ކަމަކަށް ނޫން ކަމަށާއި ބަލަން ޖެހޭނީ އެ ކުށުގެ ބޮޑުމިނަށް ކަމަށެވެ.
"ކޮންމެ ފަރާތަކުން ކުރިއަސް އެކުށަކާ ގުޅިގެން ހިންގަން ޖެހޭ ތަހްގީގެއް ހިންގެވުމަށާއި ކަނޑައެޅިފައިވާ އަދަބެއް އޮންނަ އުސޫލުތަކާއި ހަމަތަކުގެ މަތިން އެ ފަރާތްތަކަށް ދިނުމުގައި ފަސްޖެހިގެން ނުވާނެ އެވެ،" އެ ބަޔާނުގައިވެއެވެ.
މި ގައުމުގައި ދިމުކުރާތީ ވެރިކަމެއްގެ ނިޒާމް ހޯދޭނީ ސިޔާސީ ނުފޫޒުތަކުން އެއްފަރާތްވެ މިނިވަންކަމާއި އަމިއްލަ ބާރުގައި ކަންކަން ކަނޑައެޅުމުގެ ބާރު އޮތް މުވައްސަސާއެއްގެ ގޮތުގައި ފުލުހުންގެ މުވައްސަސާ ބޭއްވިގެން ކަމަށް އަރީފްގެ ބަޔާނުގައި ވަނީ ވިދާޅުވެފައެވެ. އަދި އެ އިހްތިޔާރާ ބާރު ގެއްލިފައިވާ ނަމަ މާޒީގެ އިބްރަތްތެރި ފިލާވަޅުތަކުން ފިލާވަޅު ލިބިގަނެ ކަންކަން އިސްލާހް ކުރުމަށް ތިބޭނީ މިއަދު ފުލުހުންގެ މުވައްސަސާގައި ތިބި މީހުން ކަމަށާއި އެ ޒިންމާ ކުރިން ފުލުހުންގެ މުވައްސަސާގައި ތިބި މީހުންނާ ހަވާލު ނުކުރެވޭނެ ކަމަށް ވެސް ވަނީ ވިދާޅުވެފައެވެ.
"އަދި އެހެންމެ ފުލުހުންގެ މުވައްސަސާއަށް މާދަމާ ގުޅުމަށް އަންނަ ފަރާތްތައް އަންނަންދެން މަޑުކޮށްފައި ބޭއްވޭނެ ކަމަށް ވެސް އަޅުގަނޑު ނުދެކެމެވެ. ޓެކްނޮލޮޖީގެ ކުރިއެރުންތަކާއި އިލްމީ އަލިކަމުގެ ތެރެއިންލާފައި ފަހަތަށް، އަދި ހާލަތަށް ބަލާކަށް އެންމެ ސިކުންތަކަށް ވެސް މަޑުޖެހުމެއް ނެތި މުވައްސަސާ ނަގަހައްޓައި ކުރިއަށް ގެންދިއުމުގެ ހިތްވަރާއި ފަންވަރު އަދި ވަރުބަލިވުމެއް ނެތް ބުންވަރު ތިޔަ ބޭކަލުންގެ ހުންނަވާނެ ކަމާ މެދު އަޅުގަނޑު ޝައްކެތް ނުކުރަމެވެ."
ފުލުހުންގެ އަހަރީ ދުވަހާ ގުޅުވައިގެން އަރީފް ވަނީ ހުރިހާ ފުލުހުންނަށާއި އެމީހުންގެ އާއިލާތަކަށް ތަހްނިޔާ ފޮނުއްވާފައެވެ. އަރީފް ވިދާޅުވެފައި ވަނީ މި ވަގުތު އޭނާ އާއި އޭނާގެ އާއިލާ އުނދަގޫ އަދި ދަތި ކަންތައްތަކެއްގެ ތެރޭގައި އުޅެން ޖެހުނު ނަމަވެސް ފުލުހުންގެ މުވައްސަސާގެ ކުރިއެރުމަށް އެދޭ ކަމަށެވެ. އަދި ކޮންމެ އިންސާނީ މުޖުތަމައުއެއްގައި ވެސް އަދުލު އިންސާފު ގާއިމު ކުރުމަކީ އެ މުޖުތަމައުއެއްގައި ސުލްހަ މަސަލަސްކަމާއި ހަމަޖެހުން ދެމެހެއްޓުމަށް އެންމެ މުހިންމު ކަންތައްކަން ފާހަގަކޮށް އޭނާ ވަނީ ކޮންމެ ފުލަހަކު ވެސް ހަވާލުވެފައިވާ އަމާނާތައް ރައްކާތެރިވުމަށް ނަސޭހަތްތެރިވެވަޑައިގެންފައެވެ.
ހަމަ އެހެންމެ ރައްޔިތުންގެ ފަރާތުން ކަންކަމާ ހަވާލުވެ ހުންނަ ކޮންމެ މީހަކީ ވެސް އެމީހެއްގެ ވާޖިބު އަދާކުރި ގޮތާ މެދު ރައްޔިތުންގެ ކުރިމަތީ ޒިންމާވާން ޖެހޭ މީހެއް ކަމަށާއި ކޮންމެ ފުލުހަކީ ވެސް މާތްﷲ ހަޒްރަތަށް ބިރުވެތިވެ ހުރެ ހުވާކޮށްގެން ތިބި ފުލުހެއްކަން ވެސް އަރީފްގެ ބަޔާނުގައި ހަނދާންކޮށްދެއްވާފައިވެއެވެ. އަދި އިސްލާމީ ރިވެތި އުސޫލުތަކާއި އިހްސާންތެރިކަމާއި ހިތްހެޔޮކަމާއި އަޅާލުމާއި ލޯތްބާއި އޯގާތެރިކަމަށާއި ހެޔޮ ކުލުނު އެންމެމަތީ ދަރަޖައިގައި ކޮންމެ ފުލުހެއްގެ ކިބައިން ފެންނަން ޖެހޭނެ ކަމަށް އަރީފް ވިދާޅުވެފައިވެއެވެ.
