މާފުށީ ޖަލަށް ބަދަލުކޮށް، އުއްތަމަ ފަނޑިޔާރު އަބްދުﷲ ސައީދު ބަހައްޓާފައި ހުންނަނީ އެއްވެސް އިންސާނެއް ނުފެންނަ ގޮތަށް، ސޮލިޓަރީ ކޮންފައިންމަންޓެއްގައި ކަމަށާއި، އެއީ ޓޯޗަރގެ އަމަލެއް ކަމަށް ޤާނޫނީ ވަކީލުން ވިދާޅުވެއްޖެއެވެ. 

އުއްތަމަ ފަނޑިޔާރު އަބްދުﷲ ސައީދު ހައްޔަރުކުރިތާ 50 ދުވަސްވުމާ ގުޅިގެން، ޤާނޫނީ ވަކީލުންގެ ހުރި ކަންބޮޑުވުންތައް ހާމަކޮށް ނެރުނު ބަޔާނެއްގައި ވަކީލުން ވިދާޅުވެފައި ވަނީ ކޯޓުތަކުގެ ފަނޑިޔާރުންނަކީ މައްސަލަތަކާ ގުޅިގެން އެބޭފުޅުން ނިންމާ ނިންމުންތަކުގެ ސަބަބުން އަދަބު ދެވޭނެ ބައެއް ނޫން ކަމަށް ކަނޑައަޅައި ރައްކާތެރިކަން ޤާނޫނީ ގޮތުން ލިބިދީފައިވާ ބައެއް ކަމަށެވެ. ނަމަވެސް، 1 ފެބްރުއަރީގައި ސުޕްރީމް ކޯޓުގެ ފަސް ފަނޑިޔާރުން ސޮއިކުރައްވައި ނެރުއްވި ކޯޓު އަމުރާ ގުޅިގެން  ޤާނޫނުއަސާސީއާ ޚިލާފަށް އުއްތަމަ ފަނޑިޔާރު ބަންދުކޮށް ޖަލުގައި ބަހައްޓައި، ނުޙައްގުން އެތައް އަނިޔާތަކެއް އެމަނިކުފާނަށް ދެމުން ގެންދާތާ މިއަދަށް 50 ދުވަސްވެފައި ވާކަމަށް ވަކީލުންގެ ބަޔާނުގައި ވިދާޅުވެފައި ވެއެވެ. 

ވަކީލުން ވިދާޅުވީ ރައީސުލްޖުމްހޫރިއްޔާ ކުއްލި ނުރައްކަލުގެ ޙާލަތު އިޢުލާނުކުރައްވައި، އުއްތަމަ ފަނޑިޔާރު ޤާނޫނާ ޚިލާފަށް ހައްޔަރުކުރުމަށް ފަހު، އެމަނިކުފާނު ބަންދުގައި ބެހެއްޓުމަށް ހިންގާފައި ވަނީ ޣައިރު ދުސްތޫރީ ބާޠިލު އިޖުރައާތުތަކެއް ކަމަށް އެމަނިކުފާނު ދެކެވަޑައިގަންނަވާ ކަމަށެވެ. އެގޮތުން، ސަލާމަތީ ޚިދުމަތްތަކުގެ ފަރާތުން 6 ފެބްރުއަރީގައި ޤަނޫނާ ޚިލާފަށް އެމަނިކުފާނު ހައްޔަރު ކުރުމަށް ފަހު، އެމަނިކުފާނުގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމަށް މޯލްޑިވްސް ޕޮލިސް ސަރވިސްގެ ފަރާތުން އިއުތިރާޒްކޮށް، އެމަނިކުފާނުގެ ކިބައިން އެޙައްޤު ނިގުޅައިގެންފައި ވަނީ ރައީސުލްޖުމްހޫރިއްޔާ ނެރުއްވި ކުއްލި ނުރައްކަލު ޙާލަތު ޢިއުލާނުކުރި ޤަރާރުން އެޙައްޤު ހިފަހައްޓާފައި ވާތީ ކަމަށް ފުލުހުން ވަނީ އެއިރު އުއްތަމަ ފަނޑިޔާރަށް އަންގާފައި ކަމަށް ވަކީލުންގެ ބަޔާނުގައި ވިދާޅުވެފައި ވެއެވެ. ނަމަވެސް، ކުއްލި ނުރައްކަލުގެ ހާލަތު ނިމުމަކަށް ނާންނަނީސް، އުއްތަމަ ފަނޑިޔާރުގެ ބަންދާ މެދު ގޮތެއް ނިންމުމަށް ކަމަށް ބުނެ ފުލުހުން ވަނީ އެމަނިކުފާނު ކްރިމިނަލް ކޯޓަށް ޙާޒިރުކޮށްފައިކަން ވަކީލުންގެ ބަޔާނުގައި ފާހަގަކޮށްފައި ވެއެވެ. 

ވަކީލުން ވިދާޅުވީ ޝަރީޢަތުގެ މަޖިލީހަށް ވެންނެވުމުން، އެމަނިކުފާނުގެ މައްޗަށް ޓެރަރިޒަމްގެ ދަޢުވާ އުފުލައި، ޝަރީޢަތް ނިމެންދެން ބަންދުގައި އެމަނިކުފާނު ބެހެއްޓުމަށް ކްރިމިނަލް ކޯޓުން އަމުރުކޮށްފައިވާ ކަމަށެވެ. އެދުވަހުގެ ޝަރީޢަތް ކުރިއަށް ގެންގޮސްފައި ވަނީ ކުއްލި ނުރައްކަލުގެ ހާލަތު އިޢުލާނުކުރި ޤަރާރުން ރައީސުލްޖުމްހޫރިއްޔާ ހިފަހައްޓާފައިވާ ޙައްޤުތަކާއި ޤާނޫނުތަކުގެ ތެރެއިން ޕްރޮސިކިއުޓަރ ޖެނެރަލް އާއި ކްރިމިނަލް ކޯޓުން ބޭނުން ޤާނޫނުތައް އުއްތަމަ ފަނޑިޔާރުގެ މައްޗަށް ހިންގަން ޤާނޫނުއަސާސީއާ ޚިލާފަށް ނިންމުމަށް ފަހުގައި ކަމަށް ވަކީލުންގެ ބަޔާނުގައި ވިދާޅުވެފައިވެއެވެ. އަދި ކުއްލި ނުރައްކަލު ޙާލަތު އިޢުލާނުކޮށްފައިވާ ޤަރާރުން ހިފައްޓާފައިވާ ޙައްޤުތަކާއި ޤާނޫނުތަކަށް ބަދަލު ގެންނަން ނިންމުމުގެ ބާރު ޤާނޫނުއަސާސީގެ ދަށުން ލިބޭ ހަމައެކަނި ފަރާތަކީ ރައީސުލްޖުމްހޫރިއްޔާއަށް ވެފައި، ރައީސުލްޖުމްހޫރިއްޔާ އެފަދަ ނިންމުމެއް ނިންމަވައި ޢިއުލާނުކުރައްވާފައި ނުވަނީސް، ޕްރޮސިކިއުޓަރ ޖެނެރަލަށް ނުވަތަ ދަށު މަރުޙަލާގެ ކޯޓަކަށް އެފަދައިން އެޤަރާރަށް ނުސީދާކޮށް ބަދަލުގެނެވިދާނެ ކަމަކަށް އުއްތަމަ ފަނޑިޔާރު ޤަބޫލުފުޅެއް ނުކުރައްވާ މަށްވެސް ބަޔާނުގައި ވަކީލުން ވިދާޅުވެފައި ވެއެވެ. 

ޖަލުގައި އުއްތަމަ ފަނޑިޔާރަށް ގިނަ އަނިޔާތަކެއް ދެމުން އަންނަކަން ފާހަގަކޮށް ވަކީލުންގެ ބަޔާނުގައި ވިދާޅުވެފައި ވަނީ، އުއްތަމަ ފަނޑިޔާރު މާފުށި ޖަލަށް ބަދަލުކުރުމަށް ފަހު އެމަނިކުފާނު އެތަނުގައި ބަހައްޓާފައި ހުންނަނީ އެހެން އެއްވެސް އިންސާނެއް ނުފެންނަ ގޮތަށް ސޮލިޓަރީ ކޮންފައިންމަންޓްގައި ކަމަށެވެ. އަދި އެމަނިކުފާނު ބަންދުކޮށްފައި ހުންނަތަނަށް އިންސާނެއްގެ އަޑުވެސް އިވިވަނޑައިނުގަންނަވާ ކަމަށް އެމަނިކުފާނު މަޢުލޫމާތު ދެއްވާ ކަމަށާއި، މިއީ، ދިވެހިރާއްޖޭގައި ޢަމަލުކުރަމުންދާ އެންޓި-ޓޯރޗަރ ޤާނޫނު 2013 ގެ 14 ވަނަ މާއްދާގެ (ށ)ގައި ބަޔާންކޮށްފައިވާ ފަދަ ޓޯޗަރގެ ޢަމަލެއް ކަމަށް ވަކީލުން ވިދާޅުވިއެވެ. އަދި، މިއީ ޤަޞްތުގައި އުއްތަމަ ފަނޑިޔާރަށް އަނިޔާ ދިނުމުގެ ނިޔަތުގައި ހިންގާ ލާއިންސާނީ ޢަމަލެއް ކަމަށާއި، އެމަނިކުފާނުގެ ޤާނޫނީ ވަކީލުން އިންތިހާއަށް ކަންބޮޑުވާ ކަމެއް ކަމަށް ބަޔާނުގައި ވެއެވެ. 

ވަކީލުން ވިދާޅުވީ މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުގައި ދިވެހިރާއްޖޭގެ އުއްތަމަ ފަނޑިޔާރު ހުންނަވާއިރު، އެމަނިކުފާނާ މެދު ޤާނޫނާ ޚިލާފު އެއްވެސް ޢަމަލެއް ނުހިންގުމަށް ދިވެހިސަރުކާރަށް އިލްތިމާސްކުރައްވާ ކަމަށެވެ. އަދި ޤާނޫނުއަސާސީ އާއި ފަނޑިޔާރުންގެ ޤާނޫނުން ފަނޑިޔާރުނަށް ލިބިދީފައިވާ ރައްކާތެރިކަމާއި އިމްތިޔާޒުތަކަށް އިޚްތިރާމްކޮށް، ދިވެހިރާއްޖޭގެ އުއްތަމަ ފަނޑިޔާރު ވަގުތުން ވަގުތަށް ދޫކޮށްލުމަށް ވެސް ދިވެހި ސަރުކާރަށް ވަކީލުން ވަނީ ގޮވާލައްވާފައެވެ.