ކޮމްޕިއުޓަރުތައް ހަލާކުވެގެން ފިނޭ ކައުންސިލް ހުއްޓިފައި!

ކޮމްޕިއުޓަރުތައް ހަލާކުވެގެން ހދ. ފިނޭ ކައުންސިލްގެ މަސައްކަތް ހުއްޓިއްޖެ އެވެ.

ފިނޭ ކައުންސިލްގެ މެމްބަރަކު ވިދާޅުވި ގޮތުގައި އެ ކައުންސިލްގެ ކޮމްޕިއުޓަރުތައް ހަލާކުވަމުން ގޮސް، އެންމެ ކޮމްޕިއުޓަރަކަށް ވެފައިވާއިރު، މިހާރު ހުރި ކޮމްޕިއުޓަރު ވެސް ރަނގަޅަށް މަސައްކަތް ނުކުރެ އެވެ.

ކޮމްޕިއުޓަރުތައް އާ ނުކުރެވުނީ އަދި މަރާމާތު ވެސް ނުކުރެވުނީ ކައުންސިލް މެމްބަރު ވިދާޅުވި ގޮތުގައި، ކެޕިޓަލް ހަރަދަށް ބަޖެޓް ނުލިބުމުންނެވެ.

"ވޭތުވެދިޔަ ދެ އަހަރު ވެސް އަޅުގަނޑުމެންގެ ކައުންސިލްގެ ކެޕިޓަލް ހަރަދަށް ފައިސާއެއް ދީފައެއް ނުވޭ. ކައުންސިލްގެ މަސައްކަތް ހުއްޓިފައި އޮތުމުން އަޅުގަނޑުމެން މިއައީ ސަރުކާރުގެ މުއައްސަސާތަކާ ބައްދަލުކުރަން. ނަމަވެސް ފިނޭންސް މިނިސްޓްރީން ބައްދަލެއް ނުކުރޭ،" ކައުންސިލް މެމްބަރު ވިދާޅުވި އެވެ.

ގާތްގަނޑަކަށް 570 މީހުންގެ އާބާދީއެއް އޮންނަ ފިނޭގެ ރައްޔިތުންނަށް ހިދުމަތް ދިނުމަށް ކައުންސިލުގައި އެކަށީގެންވާ އަދަދަށް މުވައްޒަފުން ނެތް ކަމަށް ވެސް ކައުންސިލް މެމްބަރު ވިދާޅުވި އެވެ. ކައުންސިލްގެ ތިން މެމްބަރުންގެ އިތުރުން، ކައުންސިލްގެ ވަޒީފާގައި ތިބީ ޒިންމާދާރު ވެރިޔާ އާއި އެންމެ އިދާރީ މުވައްޒަފެކެވެ.

އެހެންވެ، މުވައްޒަފަކު ޗުއްޓީއަށް ދިޔަސް ނުވަތަ ސަލާމް ބުންޏަށް ކައުންސިލްގެ ހިންގުމަށް ދަތިތައް ކުރިމަތިވާ ކަމަށް އޭނާ ވިދާޅުވި އެވެ.

"އެހެން ރަށްރަށުގައި ކައުންސިލްގެ މުވައްޒަފުންގެ އަދަދު ވެސް އިތުރު. އަޅުގަނޑުމެން މުވައްޒަފަކު ހޯދަން ހުށަހަޅައިގެން އުޅޭތާ ވެސް އެތައް ދުވަހެއް ވެއްޖެ. ނަމަވެސް އެކަމެއް ނުވޭ،" ކައުންސިލް މެމްބަރު ވިދާޅުވި އެވެ.