ސްޕެއިންއާ ދެކޮޅަށް އަންގާރަ ދުވަހުގެރޭ ކުޅޭ ރަހުމަތްތެރިކަމުގެ ބައިނަލްއަޤްވާމީ މެޗުގައި އާޖެންޓީނާގެ ކެޕްޓަން ލިއޮނެލް މެސީ ފެނުމުގެ ފުރުޞަތު އޮތް ކަމުގެ އިޝާރާތެއް އާޖެންޓީނާގެ ކޯޗު ޖޯޖް ސަމްޕައޯލީ ބުނެފިއެވެ.

މަސްގަނޑަށް ލިބުނު އަނިޔާއާ ގުޅިގެން މިދިޔަ ހުކުރު ދުވަހު އިޓަލީއާ ދެކޮޅަށް ކުޅުނު ރަހުމަތްތެރިކަމުގެ ބައިނަލްއަޤްވާމީ މެޗުގައި މެސީ ކުޅެފައެއް ނުވެއެވެ.

އަންގާރަ ދުވަހުގެރޭ ސްޕެއިންއާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން އާޖެންޓީނާގެ ކޯޗު ޖޯޖް ސަމްޕައޯލީ ބުނީ، ހޯމަ ދުވަހު ބޭއްވި ފަރިތަކުރުންތަކުގައި ބައިވެރިވެ، ޓީމާއެކު އާއްމު ފަރިތަކުރުންތަކުގައި މެސީ ބައިވެރިވެފައިވާ ކަމަށެވެ.

ސްޕެއިންގެ އެތުލެޓިކޯ މެޑްރިޑްގެ ވާންޑާ މެޓްރޮޕޮލިޓާނޯ ސްޓޭޑިއަމްގައި ބޭއްވި ނޫސްވެރިންގެ ބައްދަލުވުމުގެ ކުރިން ވާހަކަ ދައްކަމުން ސަމްޕައޯލީ ބުނީ، އިޓަލީއާ ދެކޮޅަށް ކުޅުނު މެޗުގެ ކުރިން، އެ މެޗުގައި ނުކުޅެވޭނެ ވާހަކަ މެސީ ބުނި ކަމަށާއި، އެހެންނަމަވެސް ފާއިތުވި ދެ ދުވަހު ބޭއްވި ފަރިތަކުރުންތަކުގައި ބައިވެރިވެ، އޭނާ މިހާރު ރަނގަޅު ކަމަށް މެސީ ބުނެފައިވާ ކަމަށެވެ.

ސްޕެއިންއާ ދެކޮޅަށް ކުޅޭ މެޗުގައި، މެސީއާ އެކު ބާސެލޯނާ އަށް ކުޅޭ ޑިފެންޑަރ ޖެރާޑް ޕީކޭ އަދި ޖޯޑީ އަލްބާ ފަދަ ކުޅުންތެރިންނާ ދެކޮޅަށް ކުޅޭ މެޗަށް މެސީ ނުކުންނާނެ ކަމަށް ބެލެވެއެވެ.

މެސީއަކީ އާޖެންޓީނާގެ ގައުމީ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާއެވެ.

އާޖެންޓީނާ އަދި ސްޕެއިން ބައްދަލުކުރާ ރަހުމަތްތެރިކަމުގެ ބައިނަލްއަޤްވާމީ މެޗަށް ނުކުތުމަށް ތައްޔާރުވެފައިވާއިރު، ހުކުރު ދުވަހުގެރޭ ޖަރުމަނުގެ ޑުސަލްޑޯފްގައި ޖަރުމަނުގެ ގައުމީ ޓީމާ ދެކޮޅަށް ސްޕެއިންގެ ގައުމީ ޓީމް ކުޅުނު ރަހުމަތްތެރިކަމުގެ މެޗު ނިމިފައި ވަނީ 1-1 އިން އެއްވަރު ވެގެންނެވެ. މިނަތީޖާއާ އެކު ސްޕެއިންގެ ކޯޗު ޖުލެން ލޮޕެޓެގީގެ އިރުޝާދުގެ ދަށުން އެޓީމް ދަމަހައްޓަމުން އަންނަ ބަލިނުވުމުގެ ރެކޯޑް ވަނީ 17 ވަނަ މެޗަކަށް ދެމިގެންގޮސްފައެވެ.

ހުކުރު ދުވަހުގެރޭ އިނގިރޭސިވިލާތުގެ މެންޗެސްޓަރގައި އިޓަލީއާ ދެކޮޅަށް އާޖެންޓީނާ ކުޅުނު ރަހުމަތްތެރިކަމުގެ މެޗު ސްޕެއިން ކާމިޔާބު ކޮށްފައިވަނީ 2-0 ންނެވެ.