ރާއްޖެޓީވީ ޖޫރިމަނާ ކުރި މައްސަލާގައި ދައުލަތުން އެދުނީ ޝަރީއަތުން ގޮތެއް ނިންމުމަށް!
އާންމު ކޮންޓެންޓް ދެއްކުން މެދުކަނޑާލީ ފެބްރުއަރީ 8 ވަަނަ ދުވަހު
ރާއްޖެޓީވީގެ ކޮންޓެންޓް މެދުކަނޑާލުން
ބްރޯޑްކާސްޓް މެދުކަނޑާލި ކަމަށް ބުނެ ރާއްޖެޓީވީ 2،000ރ. އިން ޖޫރިމަނާ ކުރި މައްސަލައިގެ ޑިސްޕިއުޓް ރިޒޮލިއުޝަން މިއަދު ކުރިއަށް ގެންދިޔައިރު އެ މައްސަލާގައި ޝަރީއަތުގައި ގޮތެއް ނިންމުމަށް ދައުލަތުގެ ފަރާތުން އެދިއްޖެއެވެ.
ދައުލަތުން އެހެން އެދުނު ނަމަވެސް ރާއްޖެޓީވީގެ ފަރާތުން ހުށަހެޅީ ދެ ފަރާތުގެ ގެއްލުމެއް ނުވާ ކަމަކަށް ވުމުން އެ ޖޫރިމަނާގެ މައްސަލާގައި ފައިސާ ދެއްކުމުގެ މުއްދަތު ފަސްކުރުމަށެވެ.
ރާއްޖެޓީވީން އެގޮތަށް އެދުމުން ދައުލަތުން ބުނީ އެ މައްސަލައިގައި ވިސްނަން ޖެހޭ އިތުރު ކަންތައްތަކެއް އެބަހުރި ކަމަށެވެ. އެހެން ކަމުން ސިވިލް ކޯޓުން ވަނީ މާރޗް 28 ވަނަ ދުވަހުގެ 14:30 އަށް އިތުރު ބައްދަލުވުމެއް ތާވަލްކޮށްފައެވެ.
ރާއްޖެޓީވީ އިން ބުނެފައި ވަނީ ބްރޯޑްކާސްޓްކުރުމުގެ ގާނޫނުގައި "ބްރޯޑްކާސްޓްކުރުން" ކަމަށް ބުނެފައި އެވަނީ، އެއްވެސް ވަސީލަތެއް ބޭނުންކޮށްގެން އާންމުކޮށް ނުވަތަ ވަކި ބަޔަކަށް އަމާޒުކޮށް އަޑާއި މަންޒަރު ނުވަތަ އަޑު ނުވަތަ މަންޒަރު ދުރަށް ފެތުރުން ކަމަށާއި ރާއްޖެ ޓީވީން އެންމެ ހިނދުކޮޅަކަށް ވެސް މި ހިދުމަތް މެދުކަނޑާލާފައި ނުވާ ކަމަށެވެ.
އެ ސްޓޭޝަނުން ބުނި ގޮތުގައި އާންމު ކޮންޓެންޓް ބްރޯޑްކާސްޓް ކުރުން މެދުކަނޑާލީ ރާއްޖެޓީވީ އަށް ލިބެމުންދިޔަ އިންޒާރުތަކާ ގުޅިގެން، ބިރުވެރިކަމެއް ނެތި ނޫސްވެރިންނަށް މަސައްކަތް ކުރެވޭނެ މާހައުލެއް ރާއްޖޭގައި އޮތް ކަމަށް ގަބޫލު ނުކުރެވޭތީއެވެ.
އާންމު ކޮންޓެންޓް ބްރޯޑްކާސްޓްކުރުން ރާއްޖެޓީވީ އިން މެދުކަނޑާލީ ފެބްރުއަރީ 8 ވީ ބުރާސްފަތި ދުވަހުގެ ރޭ 10:45 އިން ފެށިގެންނެވެ.
މިކަމާ ގުޅިގެން ރާއްޖެޓީވީ އިން ނެރުނު ބަޔާނުގައި ބުނެފައި ވަނީ ރާއްޖެޓީވީގެ އާއްމު ކޮންޓެންޓް ދެއްކުން ހުއްޓާލަން މަޖުބޫރުވީ، ސްޓޭޝަންގެ ސަލާމަތާއި ރައްކާތެރިކަން ކަށަވަރު ނުވާ ދަރަޖައަށް ކަންކަން ގޯސްވެ، ލިބެމުން ދިޔަ އިންޒާރުތައް އިތުރުވެ، ސްޓޭޝަނަށާއި މުވައްޒަފުންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން ކުރެވޭނެ އިތުރު އެއްވެސް ކަމެއް ނެތުމުގެ ސަބަބުން ކަމަށެވެ.
ރާއްޖެޓީވީގެ އާންމު ކޮންޓެންޓް ދެއްކުން މެދުކަނޑާލުމާ ގުޅިގެން ގިނަ ބަޔަކު ކަންބޮޑުވުން ފާޅުކުރިއެވެ.
ބްރޯޑްކާސްޓިން ކޮމިޝަނުން ވަނީ މީގެ ކުރިން ވެސް ތަފާތު އެކި މައްސަލަތަކުގައި 1.7 މިލިއަން ރުފިޔާ އިން ރާއްޖެ ޓީވީ ޖޫރިމަނާކޮށްފައެވެ.
