މިސްރުގެ މުހައްމަދު ސަލާހުގެ ސަބަބުން ލިވަޕޫލް ދޫކޮށްލި ބްރެޒިލްގެ މިޑްފީލްޑަރު ފިލިޕޭ ކުޓީނިއޯ މަތިން ސަޕޯޓަރުން ހަނދާން ނެތިއްޖެ ކަމަށް އެ ޓީމުގެ ލެޖެންޑް އަދި ކުރީގެ ކޯޗު ކެނީ ޑަލްގްލިޝް ބުނެފިއެވެ.
މިދިޔަ ޖެނުއަރީ މަހު ނިމުނު ފިނި މޫސުމުގެ ޓްރާންސްފާ މާކެޓުގައި ސްޕެއިންގެ ބާސެލޯނާއިން ވަނީ އޭރު ލިވަޕޫލްގައި ހުރި އެންމެ މޮޅު ކުޅުންތެރިޔާގެ ގޮތުގައި ގިނަ ބަޔަކު ދެކުނު ކުޓީނިއޯ އެ ޓީމަށް ގެންގޮސްފައެވެ. އޭނާ ބާސާއަށް ސޮއިކުރީ 160 މިލިއަން ޔޫރޯގެ ފީއަކަށެވެ. މިއީ ލިވަޕޫލްގެ އެންމެ މުހިންމު ކުޅުންތެރިޔާ އެ ޓީމު ދޫކޮށްލި ފުރަތަމަ ފަހަރަށް ނުވާއިރު ކޮންމެ ފަހަރަކު ވެސް އެހެން ކުޅުންތެރިޔަކު ވަނީ އެ ކުޅުންތެރިޔާގެ ބަދަލުގައި މޮޅު ކުޅުމެއް ދައްކައި ސަޕޯޓަރުން އެ ކުޅުންތެރިޔެއްގެ މަތިން ހަނދާން ނެތިކޮށްލާފައެވެ.
މިކަމާއި ގުޅޭގޮތުން ވާހަކަ ދައްކަމުން ޑަލްގްލިޝް ބުނީ ކުޓީނިއޯގެ މަތިން ސަޕޯޓަރުން ހަނދާން ނައްތާލީ ސަލާހު ކަމަށާއި އެފަދަ ކަމެއް ވާނެ ކަމަށް އޭނާ ދުވަހުކު ވެސް ނުދެކޭ ކަމަށެވެ. އޭނާ ބުނީ ކުޓީނިއޯ އަކީ ވަރަށް މޮޅު ކުޅުންތެރިޔެއް ކަމަށާއި އޭނާ މެޗެއްގައި މޮޅަށް ކުޅެފިނަމަ އެ މެޗަކުން ލިވަޕޫލް އަބަދުވެސް މޮޅުވި ކަމަށެވެ. ކޫޓީނިއޯ ލިވަޕޫލް ދޫކޮށްލުން ވާނީ ފޫނުބެއްދޭ ވަރުގެ ގެއްލުމެއް ކަމަށް ގަބޫލުކުރި ކަމަށާއި އެހެން ނަމަވެސް އެގޮތަށް އެކަން ހިނގާފައިނުވާތީ ވަރަށް ހިތްހަމަޖެހޭ ކަމަށް ޑަލްގްލިޝް ބުނެފައިވެއެވެ.
އޭނާ ބުނީ ހަމައެގޮތަށް ސަލާހު ވެސް ލަނޑު ޖެހުމަށް އެތަކެއް ފުރުސަތުތަކެއް ތަނަވަސްކުރާ ކަމަށާއި މިއީ ކުޓީނިއޯ ބަދު ބަހެއް ނޫން ކަމަށެވެ. ކުޓީނިއޯ އަކީ ވެސް ލިވަޕޫލްއަށް އެއް ޒަމާނެއްގައި ވަރަށް މުހިންމު ކުޅުންތެރިޔެއް ކަމަށާއި ހަމައެގޮތަށް މިހާރު ސަލާހުއަކީ ލިވަޕޫލްއަށް ތަފާތު ދައްކާ ކުޅުންތެރިޔެއް ކަމަށް ޑަލްގްލިޝް ބުނެފައިވެއެވެ.
ޑަލްގްލިޝް ބުނީ ފުރަތަމަ ސީޒަނުގައި އޭނާއާ އެއްވަރަށް ޕާފޯމް ކުރި އެހެން އެއްވެސް ކުޅުންތެރިޔެއް މީގެކުރިން ނުދެކޭ ކަމަށާއި ސަލާހުގެ ފުރަތަމަ ސީޒަނުގައި ވެސް އޭނާ ވަނީ ސަޕޯޓަރުންގެ ހިތްތައް އަތުލާފައި ކަމަށެވެ. އޭނާ ބުނީ ސަލާހުގެ މޮޅު ކުޅުމުގެ ސަބަބުން ޓީމުން ވެސް އެއްވެސް ވަރަކަށް ތަފާތު ކަމެއް ނުފެންނަ ކަމަށާއި ޓީމުގެ ކުރިމަގު ވަރަށް އުޖާލާ ކަމަށެވެ.
އިޓަލީގެ ރޯމާގައި މިދިޔަ ސީޒަނުގައި ކާމިޔާބު ދުވަސްތަކެއް ހޭދަކުރުމަށްފަހު ސަލާހު ލިވަޕޫލްއަށް ބަދަލުވީ މިދިޔަ ހޫނު މޫސުމުގެ ޓްރާންސްފާ މާކެޓުގައި 36 މިލިއަން ޕައުންޑްގެ ފީއަކަށެވެ. ފުރަތަމަ ސީޒަނުގައި ސަލާހު ވަނީ މިހާތަނަށް ހުރިހާ މުބާރާތެއްގައި ލިވަޕޫލްއަށް 36 ލަނޑު ޖަހައިދީފައެވެ. މި އަދަދާއެކު އިއާން ރަޝްގެ ފުރަތަމަ ސީޒަނުގައި އޭނާ ހެދި ރެކޯޑު މުގުރާލުމުގެ ފުރުސަތު ސަލާހުއަށް އެބައޮތެވެ. ޕްރިމިއާ ލީގުގެ ލަނޑު ލިސްޓުގެ ކުރީގައި 28 ލަނޑާއެކު ވެސް އޮތީ ސަލާހުއެވެ.
ސަލާހު މި ސީޒަނުގައި ދައްކަމުންދާ މޮޅު ކުޅުމާއި ގުޅިގެން އޭނާ ހޯދުމަށް ސްޕެއިންގެ ރެއާލް މެޑްރިޑްއިން މަސައްކަތްކުރަމުންދާ ކަމަށް ރިޕޯޓުތައް ބުނެއެވެ. އެހެން ނަމަވެސް އޭނާ އެ ޓީމަށް ބަދަލުނުވާނެ ކަމުގެ އިޝާރާތެއް ވަނީ ދީފައެވެ.
