މެޑަމް ނަސްރީނާ އިބުރާހިމްގެ ނަމުގައި ހިންގަނީ ފޭކް ޓްވިޓާ އެކައުންޓެއް!
އެ އެކައުންޓަކީ އެކަމަނާގެ ނަމުގައި ހަދައިގެން އުޅޭ ފޭކް އެކައުންޓެއް
ރައީސް މައުމޫނު ކޯޓަށް ހާޒިރުކުރި ދުވަހު އެކަމަނާ މާރުކޭޓް ސަރަހައްދުގައި އާއިލާއާއި ބައެއް ސަޕޯޓަރުންނާއި އެކު
ކުރީގެ ރައީސް މައުމޫނު އަބުދުލް ގައްޔޫމްގެ އަނަބިކަނބަލުން މެޑަމް ނަސްރީނާ އިބުރާހިމްގެ ނަމުގައި ހިންގަނީ ފޭކް ޓްވިޓާ އެކައުންޓެއް ކަމަށް ޕިޕީއެމް ރައީސް މައުމޫނު ފެކްޝަނުގެ ސެކްރެޓަރީ ޖެނެރަލް އަބުދުލް އަލީމް ވިދާޅުވެއްޖެއެވެ.
އަލީމް ވިދާޅުވީ، މެޑަން ނަސްރީނާ އިބްރާހީމް އެއްވެސް އިރެއްގައި ޓްވިޓާ ނުގެން ގުޅުއްވާ ކަމަށެވެ. އެހެންކަމުން ޓްވިޓާގައި މިހާރު އެކަމަނާގެ ނަމުގައި ހަދާފައިވާ ޓްވިޓާ އެކައުންޓަކީ އެކަމަނާގެ ނަމުގައި ހަދައިގެން އުޅޭ ފޭކް އެކައުންޓެއް ކަމަށެވެ. އަދި އެކަމަށް ރައީސް މައުމޫނާއި އެކަމަނާއާއި އެ އާއިލާއަށް ތާއީދު ކުރައްވާ ބޭފުޅުން ސަމާލުވުމަށް އެސްޖީ އަލީމް އެދި ވަޑައިގަންނަވައެވެ.
@MadamNasreena ގެ ނަމުގައި އުޅޭ ފޭކް އެކައުންޓްގައި 700 އަށް ވުރެ ގިނަ ފޮލޯވާސް ތިބިއިރު، އެ އެކައުންޓުން ތާއީދުކޮށް ލިޔެފައި ހުންނަނީ ސަރުކާރާއި އިދިކޮޅު ވާހަކަތަކެވެ. އަދި ސަރުކާރާއި އިދިކޮޅު ފަރާތްތަކުގެ މުހިއްމު ޓްވީޓްތައް ރީ ޓްވީޓްވެސް ކޮށްފައި ހުރެއެވެ.
