ޤާނޫނު އަސާސީގައި ބުނާ ހަމަހަމަކަމާއި ހާމަކަމާއެކު ހިންގާ ޝަރީއަތެއް ކުރާތީއެއް ނުފެނޭ: މަހްފޫޒް
25 މާރިޗު 2018 | އާދީއްތަ 04:03ހަމައެކަނި ހުށަހަޅަނީ ދައުވާ ޝީޓް
މަހްފޫޒް ސައީދު
ޤާނޫން އަސާސީގައި ބުނާ ހަމަހަމަކަމާއި ހާމަކަމާއެކު ހިންގާ ޝަރީޢަތެއް ކުރާތީއެއް މިހާރު ނުފެންނަ ކަމުގައި ޤާނޫނީ ވަކީލް މަހްފޫޒް ސައީދު ވިދާޅުވެއްޖެއެވެ.
ސިޔާސީ ގިނަ ބޭފުޅުންގެ ޤާނޫނީ ވަކީލެއްގެ ހައިސިއްޔަތުން ހަރަކާތްތެރިވެވަޑައިގަންނަވާ ޤާނޫނީ ވަކީލް މަހްފޫޒް ސައީދު، ހޮނިހިރު ދުވަހުގެރޭ ރާއްޖެ ޓީވީގެ ފަލަސުރުޚީ ޕްރޮގްރާމްގައި ވިދާޅުވީ އިންސާފްވެރި ޝަރީތަކީ ޤާނޫނު އަސާސީގައި ބުނާ ހަމަހަމަ ކަމާއި ހާމަކަމާއެކު ހިންގާ ޝަރީއަތް ކަމަށާއި މިހާރު އެފަދަ ޝަރީއަތެއް ކުރާތީއެއް ނުފެންނަ ކަމަށެވެ.
މަހްފޫޒް ވިދާޅުވީ މިހާރު ޝަރީއަތްތަކަށް ހުށަހަޅާ ހެކިންނަކީ ސިއްރު ހެކިން ކަމަށާއި އެއީ އިންޓަރލިޖެންސް ރިޕޯޓްގެ މައްޗަށް ބިނާކޮށް ދޭ ހެއްކެއް ކަމަށެވެ. އަދި ތުހުމަތު ކުރެވޭ މީހާއަށް ލިބޭ ލިޔުންތަކުގައި ކުރެވޭ ދައުވާގައި އެތުހުމަތު ކުރެވޭ ތަފްސީލް ނުހުންނަ ކަމަށާއި އޭގައި އޮންނަނީ އެކަން ކުރިކަން ކަމަށެވެ.
އެކުށް ކުރަން ކުރި ކަމެއް ހާމަކޮށްފައި ނޯންނަކަން ފާހަގަ ކުރައްވަމުން މަހްފޫޒް ވިދާޅުވީ ކުށެއް ކުރަން ކުރިކަމެއް ނޭނގި އެކަމުން ސަލާމަތް ވެވޭނެ ގޮތެއް ނުވަތަ ދިފާއުގައި ކުރެވޭނެ ކަމެއް ނޯންނާނެ ކަމަށެވެ.
" ޝަރީއަތްތަކުގެ އަސާސަކީ ހާމަކަން. ޝަރީއަތް ކުރެވެނީ އެންމެ ފަރުދަކާ ކަމުގައި ވީނަމަވެސް އެޝަރީއަތް ނިސްބަތް ކުރެވެނީ އަދްލު އިންސާފް ހޯދުމަށް އެދިއެދި ތިބި ހުރިހާ ރައްޔިތުންނަށް. އެހެންވީމާ ރައްޔިތުންނަށް ކަށަވަރުކަމެއް ދޭންޖެހޭ ޝަރީޢަތް ހިނގަނީ އިންސާފުވެރިކޮށްކަން. އެކަށަވަރުކަން ދޭނެގޮތަކީ ހާމަކުރުން. ހުޅުވާލުން. އެކަމަކު މިފަހުން ހިނގާދިޔަ ބޮޑެތި ޝަރީއަތްތަކުގައި ތުހުމަތު ބިނާކުރަނީ އިންޓަލިޖެންސް ރިޕޯޓަށް. މައްސަލައިގާ ހެކިބަސްދޭން ތިބެނީ އެރިޕޯޓްގައި އެބުނާ ހެކިން. އެއީ ސިއްރު ހެކިންތަކެއް. މައްސަލައިގެ ދިފާއީ ވަކީލުންނަށް ލިބެނީ މުވައްކިލުގެ މައްޗަށް ކޮށްފައި އޮންނަ ދައުވާގެ ޝީޓް އެކަނި. އޭގައި އޮންނަނީ ޓެރަރިޒަމްގެ ދައުވާ ކުރާކަން. އެހެންނަމަވެސް އެކަން ކުރިކަމަށް ބުނާ ހެކިން ކޮބައިތޯ؟، ކީއްވެތޯ މިކަން ކުރިކަމަށް މިބުނަނީ. ކާކުތޯ ދުށީ. ކާކުތޯ ދުށީ. ކިހިނެއް ހިނގައިދިޔަ ކަމެއްތޯ. މިއިން އެއްވެސް ކަމެއް ނޭނގި ދިފާއީ ވަކީލް ކުރާނީ ކީއްތޯ. ހަމައެކަނި އެނގޭ ކަމަކީ ވަކިކަމެއް ކުރިކަމަށް ބުނެ ދައުވާ އުފުލިފައިވާކަން. އެހެންވީމާ ޤާނޫން އަސާސީގައި އެބުނާ ހަމަހަމަކަމާ ހާމަކަން އަސާސެއްގެ މައްޗަށް ބަލައިގެން ޤާނޫން އަސާސީގައި އެބުނާ ޝަރީއަތެއް މިހާރަކު ނުފެނޭ" މަހްފޫޒް ވިދާޅުވިއެވެ.
މިހާރު ހުށަހަޅަނީ މުޅިންވެސް ސިއްރު ހެކިންކަން ފާހަގަ ކުރައްވަމުން މަހްފޫޒް ވިދާޅުވީ ބައެއް ހާލަތުގައި ހެކިވެރިޔާގެ ސަލާމަތައްޓަކައި ހެކިން ސިއްރު ކުރެވިދާނެ ކަމަށާއި ނަމަވެސް ރާއްޖޭގައި ހެކި ހާމަކަުރެވެނީ އިސްތިސްނާ ހާލަތެއްގައި ކަމަށެވެ. އުސޫލަކީ މިހިނގާ ހުރިހާ ޥަރީއަތްތަކުގައިވެސް ހެކި ސިއްރު ކުރެވިފައި އޮތުން ކަމަށް މަހްފޫޒް ވިދާޅުވިއެވެ.
މަހްފޫޒް ވިދާޅުވީ އެއްވެސް ސަބަބެއްނެތި ހެކިން ސިއްރު ކުރުމަކީ ހެކިވެރިޔާ އެދޭ ހެކިބަހާމެދު ސުވާލު އުފެއްދުމަށް ފުރުސަތު ލިބިގެންދާ ކަމެއް ކަމަށާއި އެކަންކަން ދިފާއީ ހެކިންނަށް އެނގެން ޖެހޭނެ ކަމަށެވެ.
މަހްފޫޒް ވިދާޅުވި ގޮތުގައި މިހާރު ސިޔާސީ ފަރާތްތަކާމެދު ކުރެވޭ ދައުވާ ތަކަކީ ބޮޑެތި ދައުވާ ތަކެއް ކަމަށާއި އެދައުވާ ސާބިތުވެއްޖެ ނަމަ ބޮޑެތި އަދަބުތަކެއް އަންނާނެ ދައުވާ ތަކެއް ކަމަށެވެ.
މަހްފޫޒް ވިދާޅުވީ އެހެކިތައް ހުށަހަޅަނީ ދައުވާ ސާބިތު ކުރުމަށް ކަމަށާއި އެހެންކަމަށްވާނަމަ އެހެކިތަކާމެދު ވާހަކަ ދެއްކުމުގެ ފުރުސަތު ދޭން ޖެހޭނެ ކަމަށެވެ. ނަމަވެސް މިހާރު އެފުރުސަތުވެސް ނުދޭ ކަމަށް މަހްފޫޒް ވިދާޅުވިއެވެ.
"ސާބިތު ކުރުމަށް ހުރި ހަމައެކަނި ވަސީލަތަކީ ސިއްރު ހެކިތަކާއި އިންޓަރލިޖެންސް ރިޕޯޓް ކަމުގައިވާނަމަ މިޝަރީއަތްތައް މިހެން ހިންގުމުގެ ބޭނުމެއްވެސް ނެތް." މަހްފޫޒް ވިދާޅުވިއެވެ.
