ސްޕެއިންގެ ރެއާލް މެޑްރިޑް ދޫކޮށް އެ ޓީމަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ޗައިނާގެ ޓީމަކަށް ބަދަލުނުވާނެ ކަމަށް އެ ޓީމުގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެއެވެ.

ރޮނާލްޑޯ ޗައިނާއަށް ބަދަލުވާން އުޅޭކަމުގެ އަޑުތައް ފެތުރިފައި ވަނީ ޕޯޗުގަލްގެ ކުރީގެ ކޯޗު އަދި ގުއަންގުޒޫ އެވަގްރާންޑޭގެ ކޯޗު ލުއިޒް ފެލިޕޭ ސްކޮލާރީ އެފަދަ ވާހަކަތަކެއް މީޑިއާއާ ހިއްސާކުރުމާ ގުޅިގެންނެވެ. އޭނާ ބުނީ ޗައިނާގެ ލީގުގެ ފެންވަރާއާ ގުޅޭ ގޮތުން ރޮނާލްޑޯ ސުވާލުކޮށްފައިވާ ކަމަށާއި ޗައިނާގެ ލީގުގައި ކުޅުމުގެ ޝައުގު ރޮނާލްޑޯގެ ކިބައިގައި އެބަހުރި ކަމަށެވެ. ރެއާލްއާ އެކު އުމުރުން 33 އަހަރުގެ ރޮނާލްޑޯ ހަދާފައިވާ ކޮންޓްރެކްޓްގެ މުއްދަތު ހަމަވާނީ 2021 ވަނަ އަހަރުގެ ނިޔަލަށެވެ.

މިކަމާ ގުޅޭ ގޮތުން ވާހަކަ ދައްކަމުން ރެއާލްގެ ރައީސް ޕެރޭޒް ވިދާޅުވީ ރެއާލް ދޫކޮށްލުމުގެ އެއްވެސް ވާހަކައެއް ރޮނާލްޑޯ ދައްކާފައިނުވާ ކަމަށާއި އޭނާގެ ކޮންޓްރެކްޓްގައި އަދިވެސް ބާކީ އަހަރުތަކެއް އެބައޮތް ކަމަށެވެ. އޭނާ ބުނީ ސްކޮލާރީއަކީ ރޮނާލްޑޯގެ އެކުވެރިއެއް ކަމަށާއި ސްކޮލާރީއަކީ ހޮންގްކޮންގްގައި ދިރިއުޅޭ މީހަކަށް ވުމާ އެކު ރޮނާލްޑޯ އެފަދަ ވާހަކައެއް ދެއްކުމަކީ އޭނާ ރެއާލް ދޫކޮށްލުން ކަމުގައި ބެލެވެން ނެތް ކަމަށެވެ.

ރޮނާލްޑޯ ވަނީ މި ސީޒަނުގެ މިހާތަނަށް ރެއާލްއަށް ކުޅުނު 35 މެޗުގައި އެ ޓީމަށް 37 ލަނޑު ޖަހައިދީފައެވެ.