ބާސެލޯނާ ދޫކޮށްލުން ވެގެންދާނީ ވަރަށް އުނދަގޫ ނިންމުމަކަށް ކަމަށް އެ ޓީމުގެ ކެޕްޓަން އަންދްރޭސް އިނިއެސްޓާ ބުނެފިއެވެ.
ޗައިނީޒް ސުޕާ ލީގުގައި ވާދަކުރަމުން އަންނަ ޓިއަންޖިން ކުއަންޖިއާން އަށް އިނިއެސްޓާ ބަދަލުވާން އުޅޭކަމުގެ އަޑުތަކެއް ވަނީ ފެތުރިފައެވެ. އެހެން ނަމަވެސް އެ ކްލަބުން ވަނީ މިއީ ދޮގު ޚަބަރުތަކެއް ކަމަށާއި އެ ޚަބަރުތައް ފަތުރަމުންދާ ފަރާތްތަކާ ދެކޮޅަށް ފިޔަވަޅު އަޅާނެ ކަމަށް ބުނެ އިންޒާރުދީފައެވެ. ބާސާގެ ވެބްސައިޓުގައި މިދިޔަ އަހަރުގެ އޮކްޓޯބަރު މަހު އާންމުކުރި ބަޔާނެއްގައި ވަނީ އިނިއެސްޓާ އެ ކްލަބާ އެކު އުމުރު ދުވަހުގެ ކޮންޓްރެކްޓެގައި ސޮއިކޮށްފައިވާ ކަމަށާއި، އެ އެއްބަސްވުމާ އެކު އޭނާގެ ކެރިއަރު ނިންމާލާނީ ބާސާގައި ހުރެގެން ކަމަށެވެ.
އިނިއެސްޓާ ބުނެފައިވަނީ އޭނާގެ ކުރަމަގާއި މެދު އެޕްރީލް މަސް ނިމުމުގެ ކުރިން ގޮތެއް ނިންމާނެ ކަމަށެވެ. ރޭޑިއޯ ސްޓޭޝަނަކާ ވާހަކަ ދައްކަމުން އޭނާ ބުނީ ބާސާއާ ދެކޮޅަށް ކުޅޭނެ ފުރުސަތު އޮންނާނޭ ޓީމަކަށް ބަދަލުނުވާނެ ކަމަށާއި އެ ނޫން ކޮންމެ ޓީމަކުން ވެސް އޭނާ ފެނުމަކީ އެކަށީގެންވާ ކަމެއް ކަމަށެވެ. އޭނާ ބުނީ ވަރަށް ގިނަ ކަންކަން އޭނާއަށް ވިސްނޭ ކަމަށާއި ގޮތެއް ނިންމުމަށް ބާކީ އޮތީ މަދު ހަފްތާތަކެއް ކަމަށެވެ.
އިނިއެސްޓާ ބުނީ މިއީ އޭނާގެ ހަޔާތުގެ އެންމެ މުހިންމު ނިންމުން ކަމަށާއި މިހާރު އޭނާގެ އުމުރުގެ ސަބަބުން ވަރަށް ގިނަ ފުރުސަތުތައް ލިބެމުންދާ ކަމަށެވެ. އޭނާ ބުނީ މިއީ ކްލަބަށް އޮންނަ ލޯތްބެއްގެ ސަބަބުން ނިންމާ ނިންމުމެއް ނޫން ކަމަށާއި މިއީ އޭނާގެ ފިޓްނެސްއަށް ބެލުމަށް ފަހު ނިންމާ ނިންމުމެއް ކަމަށެވެ. ހަމައެހެންމެ އިންޖަރީ ނުވާ ނަމަ ބާސާގެ ފުރަތަމަ އެގާރައިން ކުރިޔަށް އޮތް ދެ އަހަރު ވެސް ފުރުސަތު ލިބޭނެ ކަމަށް އިނިއެސްޓާ ބުނެފައި ވެއެވެ.
އިނިއެސްޓާ ބުނީ އޭނާ ބާސާ ދޫކޮށްލާނީ އެ ޓީމަށް ކުޅުންތެރިޔެއްގެ ގޮތުގައި 100 އިންސައްތަ ނުދެވޭނެކަން ކަށަވަރުވުމުން ކަމަށާއި އެ ނިންމުން ވެގެންދާނީ ވަރަށް އުނދަގޫ ނިންމުމަކަށް ކަމަށެވެ. އޭނާ ބުނީ ނިންމުން ކިތަންމެ އުނދަގޫވި ނަމަވެސް އެކަމާ މެދު މާ ބޮޑަށް ނުވިސްނާ ކަމަށާއި ވިސްނަމުންދަނީ މި ސީޒަނުގައި ކާމިޔާބު ހޯދުމަށް ކަމަށެވެ.
އިނިއެސްޓާ މިފަދައިން ވާހަކަ ދައްކާފައިވާއިރު ބާސާގެ ކޯޗު އާނެސްޓޯ ވަލްވާޑޭ ބުނީ އިނިއެސްޓާ ނެތް ބާސާއަކާ މެދު ނުވިސްނާ ކަމަށާއި ހަގީގަތަކީ މިވަގުތު އިނިއެސްޓާއަކީ ބާސާގެ ކުޅުންތެރިއެއް ކަމަށެވެ.
އިނިއެސްޓާއަކީ639 މެޗާ އެކު ބާސާއަށް ދެވަނައަށް އެންމެ ގިނަ މެޗު ކުޅެދިން ކުޅުންތެރިޔާއެވެ. އަދި 2002 ވަނަ އަހަރުގެ އޮކްޓޯބަރު މަހުގެ 29 ދުވަހުން ފެށިގެން ބާސާގެ ޓީމުގައި ހިމެނިގެން ކުޅެމުން އަންނަ އިނިއެސްޓާ ވަނީ އެ ޓީމަށް 55 ލަނޑު ޖަހައިދީފައެވެ. އަދި 2015 ވަނަ އަހަރުން ފެށިގެން އެ ކްލަބުގެ ކެޕްޓަނަކީ ވެސް އިނިއެސްޓާއެވެ. ބާސާއާ އެކު އިނިއެސްޓާ ހޯދާފައިވާ ކާމިޔާބީތަކުގެ ތެރޭގައި ސްޕެނިޝް ލީގު ޗެމްޕިއަންކަން 8 ފަހަރު، އަދި ޔުއޭފާ ޗެމްޕިއަންސް ލީގުގެ ތަށި 4 ފަހަރު ހޯދުން ފާހަގަ ކޮށްލެވެއެވެ.
