ކުއްލި ނުރައްކަލުގެ ޙާލަތު އުވާލައިފި
އިޢުލާނުކުރީ ފެބްރުއަރީ 5 ވަނަ ދުވަހު
ރައީސުލްޖުްމޙުރިއްޔާ އުއްތަމަ ފަނޑިޔާރާއި އެކު
ސުޕްރީމް ކޯޓުގެ ފުރިހަމަ ބެންޗުން ނެރުނު އަމުރަކަށް ތަބާނުވުމަށް ބަހަނާ ދައްކައި، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިޢުލާނު ކުރެއްވި ކުއްލި ނުރައްކަލުގެ ހާލަތު ނިމުމަކަށް ގެނެސްފިއެވެ.
ކުއްލި ނުރައްކަލުގެ ހާލަތު ނިމުމަކަށް ގެނެސްފައިވަނީ ބުރާސްފަތި ދުވަހުގެ މެންދުރު 12:00 ގައެވެ.
ފެބްރުއަރީ މަހުގެ ފުރަތަމަ ދުވަހުގެރޭ ސުޕްރީމް ކޯޓުން ނެރުނު އަމުރާއި ގުޅިގެން ރައީސް ޔާމީން ކުއްލި ނުރައްކަލުގެ ހާލަތު އިޢުލާނު ކުރެއްވީ ފެބްރުއަރީ މަހުގެ 5 ވަނަ ދުވަހުގެރެއެވެ. 15 ދުވަހުގެ މުއްދަތަށް އިޢުލާނުކުރެއްވި އެ ހާލަތަށް، ރައްޔިތުންގެ މަޖިލީހުގައި ތިއްބެވި ސަރުކާރަށް ތާޢީދުކުރާ މެންބަރުން ވަނީ ފެބްރުއަރީ 20 ވަނަ ދުވަހު އިތުރު 30 ދުވަސް އިތުރުކޮށްދީފައެވެ. އަދި ޤާނޫނީ ގޮތުން ސުވާލު އުފެދޭ ފަދަ ވޯޓަކުން އިތުރުކުރި އެ 30 ދުވަސް އިތުރުކޮށްފައިވަނީ ރަނގަޅަށް ކަމަށް، ސުޕްރީމް ކޯޓުގެ 3 ފަނޑިޔާރުން ވަނީ ފެބްރުއަރީ މަހުގެ 26 ވަނަ ދުވަހު ނިންމަވާފައެވެ.
44 ދުވަހާއި 16 ގަޑިއިރަށްފަހު ކުއްލި ނުރައްކަލުގެ ހާލަތު ނިމުމަކަށް ގެނެސްފައިވާއިރު، ކުއްލި ނުރައްކަލުގެ ޙާލަތުގެ ތެރެއިން ސަރުކާރުން ވަނީ އެތައް ސަތޭކަ ބަޔަކު ހައްޔަރުކޮށްފައެވެ. މީގެ ތެރެއިން ގިނަ ބަޔަކު މިހާރު މިނިވަންކޮށްފައިވާއިރު، ކުއްލި ނުރައްކަލުގެ ހާލަތުގެ ތެރެއިން ހައްޔަރުކުރި ދައުލަތުގެ ބައެއް ވެރިންނާއި އިއްޒަތްތެރިންގެ މައްޗަށް އެކިއެކި ދައުވާތައް އުފުލައި، އެފަރާތްތައް ޝަރީޢަތް ނިމެންދެން ވަކި މުއްދަތެއް ނެތްގޮތަށް ބަންދުގައި ބޭތިއްބުމަށް ކްރިމިނަލް ކޯޓުގެ ފަނޑިޔާރަކު ވަނީ އަމުރު ކުރައްވާފައެވެ.
ކުއްލި ނުރައްކަލުގެ ހާލަތުގެ ތެރެއިން ހައްޔަރު ކުރެވުނު ފަރާތްތަކުގެ ތެރޭގައި، ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމާއި، އުއްތަމަ ފަނޑިޔާރު ޢަބްދުﷲ ސައީދާއި، ސުޕްރީމް ކޯޓުގެ ފަނޑިޔާރު އަލީ ހަމީދާއި، ރައްޔިތުންގެ މަޖިލީހުގެ މެންބަރުންނާއި، ދައުލަތުގެ އެކި މުއައްސަސާތަކުގެ ވެރިން ހިމެނިވަޑައިގަންނަވައެވެ. އަދި އެ ބޭފުޅުންގެ މައްޗަށް އެކި ކަހަލަ ތުޙުމަތުތައްކޮށް، އެކި ދައުވާތައް ވަނީ އުފުލާފައެވެ.
އެގޮތުން، ރައީސް މައުމޫންގެ މައްޗަށް ޓެރަރިޒަމާއި، އަދުލު އިންސާފު ޤާއިމް ކުރުމަށް ހުރަސްއެޅުމުގެ ދައުވާ އުފުލާފައިވާއިރު، އުއްތަމަ ފަނޑިޔާރުގެ މައްޗަށް މައްޗަށް ޓެރަރިޒަމާއި، ދައުލަތުގެ މަސައްކަތަށް ހުރަސްއެޅުމާއި، އަދުލު އިންސާފު ޤާއިމް ކުރުމަށް ހުރަސްއެޅުމުގެ ދައުވާ ވަނީ އުފުލާފައެވެ. ފަނޑިޔާރު އަލީ ހަމީދުގެ މައްޗަށް ޓެރަރިޒަމާއި، ރިޝްވަތު ހިފުމާއި، އަދުލު އިންސާފު ޤާއިމް ކުރުމަށް ހުރަސްއެޅުމުގެ ދައުވާ އުފުލާފައިވާއިރު، ޖުޑީޝަލް އެޑްމިނިސްޓްރޭޓަރ ޙަސަން ސައީދުގެ މައްޗަށް މައްޗަށް ރިޝްވަތު ހިފުމާއި، ޤާނޫނު ހިންގުމަށް ހުރަސްއެޅުމުގެ ދައުވާ ވަނީ އުފުލާފައެވެ. މީގެ އިތުރުން ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ދަރިކަލުން، އަދި ވިލާ ކުންފުނީގެ މެނޭޖިންގ ޑިރެކްޓަރ އިބްރާހިމް ސިޔާދް ޤާސިމްގެ މައްޗަށް ދައުލަތުން ވަނީ ރިޝްވަތު ދިނުމުގެ ދައުވާ އުފުލާފައެވެ.
މި ހުރިހާ ބޭފުޅުންވެސް ޝަރީޢަތް ނިމެންދެން ބަންދުގައި ބޭތިއްބުމަށް ކްރިމިނަލް ކޯޓުގެ ގާޒީއަކު ވަނީ އަމުރު ކުރައްވާފައެވެ.
މި ފަރާތްތަކުގެ އިތުރުން ރައްޔިތުންގެ މަޖިލީހުގެ މެންބަރުން ކަމުގައިވާ ފާރިސް މައުމޫނާއި، އިލްހާމް އަޙުމަދާއި، ޢަބްދުﷲ ސިނާން އަދި ޢަބްދުﷲ ރިޔާޒްގެ އިތުރުން ކުރިގެ ޕޮލިސް ކޮމިޝަނަރު އަޙުމަދު އަރީފާއި، ޔުމްނާ މައުމޫންގެ ފިރިކަލުން މުޙައްމަދު ނަދީމްގެ މައްޗަށްވެސް ސަރުކާރުން ވަނީ ޓެރަރިޒަމްގެ ދައުވާ ކޮށްފައެވެ. މީގެ ތެރެއިން ގިނަ ބޭފުޅުންވެސް ޝަރީޢަތް ނިމެންދެން ބަންދުގައި ބައިތިއްބަން ކްރިމިނަލް ކޯޓުގެ ގާޒީއަކު ވަނީ އަމުރު ކުރައްވާފައެވެ.
ކުއްލި ނުރައްކަލުގެ ހާލަތުގައި މަހަކަށްވުރެ ގިނަދުވަސް ވޭތުވެގެން ދިޔައިރު، އެ ހާލަތު އުވާލުމަށް ދުނިޔޭގެ ގިނަ ޤައުމުތަކަކުން ވަނީ ގޮވާލާފައެވެ. އަދި މި މުއްދަތުގައި ހައްޔަރުކުރެވުނު ފަރާތްތަކަށް އެކިއެކި ލާއިންސާނީ އަނިޔާދީފައިވާ ކަމުގެ ތުޙުމަތު އެފަރާތްތަކުން ކުރާއިރު، އެކަމާއި ގުޅިގެންވެސް އެކި ފަރާތްތަކުން ދަނީ ކަންބޮޑުވުން ފާޅުކުރަމުންނެވެ.
