ސީރިޔާގެ އިރުމަތީ ޣޫތާ ގައި ހަނގުރާމަވެރިންނާ ދެކޮޅަށް ސަރުކާރު ސިފައިން ހޯމަ ދުވަހުގެ ރޭ ދިން ހަމަލާތަކެއް ސްުކޫލަކަށް އަމާޒުވެ މަދުވެގެން 16 ކުޑަކުދިން މަރުވެއްޖެއެވެ. 

ރިޕޯޓުތައް ބުނާގޮތުން ހޯމަ ދުވަހުގެ ރޭ ސަރުކާރު ސިފައިން އިރުމަތީ ޣޫތާގެ އެކި ޓައުންތަކަށް ދިން ހަމަލާތަކުގައި ޖުމްލަ 32 މީހުން މަރުވެފައިވެއެވެ. 

އދ އިން ބުނާގޮތުން ސީރިޔާ ސަރުކާރު ސިފައިންނާ އަދި ސަރުކާރަށް ވާގިވެރިވާ ރަޝިއާ ގުޅުން އޮންނަ ހަނގުރާމަވެރިން، އިރުމަތީ ޣޫތާ އިން ހަނގުރާމަވެރިން ފައްސާލުމަށް ދޭ ހަމަލާތަކާ ގުޅިގެން މިހާތަނަށް އެތައްސަތޭކަ އާންމުން ވަނީ މަރުވެފައެވެ. އެކްޓިވިސްޓުންނާއި އެކި މޮނިޓަރިން ގްރޫޕްތައް ބުނާގޮތުން މިހާތަނަށް 1400 އަށްވުރެ ގިނަ އާންމުން ވަނީ މަރުވެފައެވެ. 

ސީރިޔާގެ އިރުމަތީ ޣޫތާގައި ހަނގުރާމަ ކުރަމުންދާ ސަރުކާރު ސިފައިންނަށް ހިތްވަރު ދެއްވުމުގެ ގޮތުން ރައީސް ބައްޝާރުލް އަސަދު އެ ސަރަހައްދަށް ދާދިފަހުން ވަނީ ވަޑައިގެންފައެވެ. 

ސަރުކާރާ ދެކޮޅު ހަނގުރާމަވެރިންގެ ބާރުގެ ދަށުގައި އޮތް އިރުމަތީ ޣޫތާ އަށް ސީރިއާ ސިފައިން ހަމަލާދޭން ފަށާފައި ވަނީ މިދިޔަ މަހު ކަމަށްވާއިރު މިހާރު އެ ސަރަހައްދުގެ 80 ޕަސެންޓް ވަނީ ސީރިއާ ސިފައިންގެ ބާރުގެ ދަށަށް ގެނެސްފަ އެވެ. މިދިޔަ ފެބްރުއަރީ 18 ވަނަ ދުވަހު ދޭން ފެށި ހަމަލާތަކުގައި މިހާތަނަށް އިރުމަތީ ޣޫތާގެ އާންމުންގެ 1،400 އަށް ވުރެ ގިނަ މީހުން މަރުވެފައިވާއިރު، ސީރިޔާގެ ރައީސް ބައްޝާރުލް އަސަދުގެ ސަރުކާރާއި ދެކޮޅު ހަނގުރާމަވެރި ގްރޫޕްތަކުން ކޮންޓްރޯލް ކުރާ އިރުމަތީ ޣޫތާ އަކީ ވެރިރަށް ދިމިޝްޤުގެ ރަށް ބޭރުގައި އޮންނަ ސަހަރެކެވެ. ގާތްގަނޑަކަށް ހަތަރު ލައްކައެއްހާ މީހުން ދިރިއުޅޭ އިރުމަތީ ޣޫތާ އިދިކޮޅު ހަނގުރާމަވެރިންގެ ބާރުގެ ދަށަށް ދިޔުމާއެކު، ސީރިއާގެ ސިފައިން ވަނީ 2013 ވަނަ އަހަރުން ފެށިގެން އެސަހަރު ވަށާލައި، ހިސާރު ކޮށްފައެވެ.