ސްކެންޑަލްގެ ފަހު އެޕިސޯޑު ޝޫޓުކޮށް ނިންމައިފި

އޭބީސީގެ މަޝްހޫރު ޑްރާމާ ސީރީޒް ސްކެންޑަލްގެ އެންމެ ފަހުގެ އެޕިސޯޑްގެ ޝޫޓިން ނިންމާލައިފިއެވެ.

ޓީވީ ޕްރޮޑިއުސަރ ޝޮންޑާ ރައިމްސްގެ ޝޮންޑަލޭންޑުން އޭބީސީއާއި ގުޅިގެން ގެނެސްދޭ ސްކެންޑަލްގެ އެންމެ ފަހު އެޕިސޯޑް ޝޫޓުކޮށް ނިންމައިފިކަމަށް އެފިލްމުގެ ލީޑުރޯލުން ފެންނަ ތަރި ކަމަށްވާ ކެރީ ވޮޝިންޓަން(އޮލިވިއާ ޕޯޕް) ވަނީ އާންމުކޮށްފައެވެ.

މިސީރީޒްގެ އެންމެ ފަހު އެޕިސޯޑް ނިންމުމަށްފަހު ސީރީޒްގެ ޓީމުންވަނީ ނިންމުން ފާހަގަ ކުރުމަށް ވްރެޕް އަޕް ޕާޓީއެއްވެސް ބާއްވާފަ އެވެ.

މިސީރީޒްގެ 7 ވަނަ ސީޒަން މިހާރު ދައްކަމުން އަންނައިރު އެންމެ ފަހު އެޕިސޯޑް ދައްކާނީ އަންނަ މަހުގެ 19 ވަނަ ދުވަހުއެވެ.

ސްކެންޑަލް ނިންމާލާނެކަމަށް އިއުލާންކޮށްފައިވަނީ މިދިޔަ އަހަރުގެ މެދުތެރޭގައެވެ. ސްކެންޑަލް ނިންމާލާނެކަން އިއުލާން ކުރަމުން އޭބީސީގެ ރައީސް ޗަނިން ޑަންގޭ ބުނެފައި ވަނީ ސީރީޒް ނިމުމަކަށް ގެނައުމަށް ނިންމީ ސީރީޒްގެ ޕްރޮޑިއުސަރ ޝޮންޑާ ރައިމްސްއާ ވާހަކަ ދެއްކުމަށް ފަހު އެކަމަށް އެއްބަސްވުމުން ކަމަށެވެ. އަދި ޝޮންޑާ އަށް މި ސީރީޒް ރީތިކޮށް ނިންމާލާނެ އުކުޅު އެނގޭނެ ކަމަށް އޭނާ ބުންޏެވެ. ޑަންގޭ ބުނީ ސްކެންޑަލް ކަހަލަ ސީރީޒްއެއް އޭބީސީ މެދުވެރިކޮށް ދެއްކުން އެއީ އެ ނެޓްވޯކަށް ލިބުނު ވަރަށް ބޮޑު ފަޚުރެއް ކަމަށެވެ.

ސްކެންޑަލް ނިކުތީ 2012 ވަނަ އަހަރެވެ. "ސްކެންޑަލް" ވެގެން ދިޔައީ ގާތްގަނޑަކަށް 30 އަހަރު ފަހުން އެމެރިކާގެ ސީރީޒްތަކުގެ ތެރެއިން ކަޅު ނަސްލުގެ އަންހެނަކު ލީޑް ރޯލުން ފެނިގެންދިޔަ ފުރަތަމަ ސީރީޒްއަށެވެ.

ޝޮންޑާ ބުނީ ބެލުންތެރިންނަށް ކަމުދާނެ ގޮތަށް ސްކެންޑަލް ނިންމާލަން ފަސޭހަވާނެ ކަމަށާއި އެއީ އެކަމަށް އެކަށީގެންވާ ވަގުތު އޭބީސީން ދިނުމުން ކަމަށެވެ.

މި ސީރީޒްގެ މުހިއްމު ތަރިންގެ ތެރޭގައި ކެރީ ވޮޝިންޓަން، ޓޯނީ ގޯލްޑައުންއާ އަދި ސްކޮޓް ފޮލޭ ހިމެނެއެވެ.

ސްކެންޑަލްގެ އެންމެ ފަހުގެ އެޕިސޯޑްގެ ޝޫޓިން ނިންމާލާފައިވާއިރު މަޝްހޫރު ދެ ޝޯވ ކަމަށްވާ ސްކެންޑަލް އާއި ހައު ޓު ގެޓް އަވޭ ވިތު މަރޑަރ ގެ ކްރޮސްއޯވަރ އެޕިސޯޑް ވަރަށް އަވަހަށް ފެންނާނެކަމަށް ދެ ޝޯވ އުފެއްދި، އަދި ޕްރޮޑިއުސަރެއްގެ މަގާމުގައި ހުރި ޝޮންޑާ ރައިމްސް ވަނީ މީގެ ކުރިން ބުނެފައެވެ.