ކަސޯޓީގެ 2 ވަނަ ސީޒަނަކަށް އެކްތާ ތައްޔާރު ވަނީ
19 މާރިޗު 2018 | ހޯމަ 04:36ފުރަތަމަ ސީޒަނުން ފެނިގެން ދިޔަ ތަރިން ދެވަނަ ސީޒަނުނުގައި ނުފެންނާނެ ކަމަށް ޚަބަރުތައް ބުނޭ
އެކްތާ ކަޕޫރު
ދިވެހިންގެ ތެރޭގައި ވެސް މަގުބޫލުކަން ހޯދި ހިންދީ ޑްރާމާ ސީރީޒް "ކަސޯޓީ ސިންދަގީކޭ"ގެ ދެވަނަ ސީޒަނެއް ގެނެސްދިނުމަށް އެ ސީރީޒްގެ ޕްރޮޑިއުސަރ އެކްތާ ކަޕޫރު ތައްޔާރު ވެއްޖެއެވެ.
ސްޓާޕްލަސް އިން 2001 އިން ފެށިގެން 2008 ވަނަ އަހަރާ ހަމައަށް ގެނެސްދިން "ކަސޯޓީ"ގެ ދެވަނަ ސީޒަނެއް ފަށާނެ ކަމަށް އެކްތާ ކަޕޫރު ބުނެފައި ވަނީ އޭނާގެ އިންސްޓަގްރާމް މެދުވެރިކޮންނެވެ.
އެކްތާ ބުނީ "ކަސޯޓީ"ގެ ކޮންސެޕްޓަކީ ޒަމާން ބަދަލުވިކަމުގައި ވިއަސް އަދިވެސް މި ޒަމާނާ އެއްގޮތަށް ގެނެވިދާނެ ކޮންސެޕްޓެއް ކަމަށެވެ. އެހެން ކަމުން އެކަމަށް އޭނާ ވިސްނަމުންދާ ކަމަށެވެ. އެކްތާ ކަޕޫރުގެ "ކަސޯޓީ" ގެންނަން އުޅޭ ޚަބަރު މީޑިއާގައި ވެސް ވަނީ މީގެ ކުރިން ފެތުރިފައެވެ. އަދި މި ސީރީޒްގެ މުހިއްމު ރޯލުތަކުން ކުޅޭނެ ތަރިންނާ ބެހޭ ގޮތުން ވެސް މީޑިއާގައި ވަނީ އެކި ވާހަކަތައް ފެތުރިފައެވެ.
އެކްތާ ބުނީ "ކަސޯޓީ"ގެ ދެވަނަ ސީޒަން ގެނެސްދިނުމަށް ތައްޔާރު ވަމުންދާ ކަމަށެވެ.
ބެލެވޭ ގޮތުގައި "ކަސޯޓީ"ގެ ފުރަތަމަ ސީޒަނުން ފެނިގެން ދިޔަ ތަރިންނެއް ދެވަނަ ސީޒަނުންނެއް ނުފެންނާނެއެވެ. މީޑިއާ ރިޕޯޓްތައް ބުނާ ގޮތުގައި "ކަސޯޓީ"ގެ ފުރަތަމަ ސީޒަނުން ފެނިގެންދިޔަ އަނޫރާގްގެ ރޯލު ކުޅޭނީ ސޮނީން ދެއްކި ޑްރާމާ ސީރީޒް ކަމަށްވާ "ކުޗް ރަންގް ޕިޔާރް ކޭ އެއިސޭ ބީ"ގެ އެކްޓަރ ޝަހީރް ޝެއިހްއެވެ.
އިންޑިއާގެ ޕްރޮޑިއުސަރުންގެ ތެރެއިން އެންމެ ގިނަ ބައެއްގެ ތާއީދު ލިބިފައިވާ ޑްރާމާ ސީރީޒްތައް ޕްރޮޑިއުސް ކޮށްފައިވާ އެކްތާ ވަނީ ވަރަށް މަގުބޫލް ސިލްސިލާތަކެއް ބެލުންތެރިންނަށް ގެނެސް ދީފައެވެ. އޭނާ ސްޓާޕްލަސްއަށް ޕްރޮޑިއުސްކޮށްދިން "ކިޔޫންކީ ސާސް ބީ ކަބީ ބަހޫ ތީ" އާއި "ކަހާނީ ގަރް ގަރް ކީ"، "ކަސައުޓީ" ވެގެންދިޔައީ އެންމެން ބަލައިގަންނަ ޕްރޮޑިއުސަރަށް އޭކްތާ ވުމަށް މެދުވެރި ސަބަބަށެވެ.
