ދިވެހި ފިލްމް އެވޯޑްގެ ގިނަ އެވޯޑްތަކަކާއިއެކު، އަހަރުގެ އެންމެ ކާމިޔާބު ސްޓޫޑިއޯގެ ގޮތުގައި 2017 ވަނަ އަހަރު ނިންމައިލި ޑާކް ރެއިން އެންޓަރޓެއިންމަންޓްއިން މި އަހަރު ފުރަތަމަ ރިލީޒް ކުރުމަށް ތައްޔާރުވަމުންދާ ފިލްމު، 'ވަކިން ލޯބިން' ގެ އޮންލައިން ބުކިންގ ހުޅުވާލައިފިއެވެ.

ރާއްޖެއެމްވީއަށް މަޢުލޫމާތު ދެމުން ފިލްމުގެ އެއް ޕްރޮޑިއުސަރު، މުޙައްމަދު އަލީ (މޮގަރ) ބުނީ، ވަކިން ލޯބިންގެ އޮންލައިން ޓިކެޓް ބުކިންގ ހުޅުވާލީ ހޮނިހިރު ދުވަހުގެރޭ ކަމަށާއި، ފޭސްބުކް މެދުވެރިކޮށް މިހާރު އެ ފިލްމުގެ ޓިކެޓް ބުކް ކުރެވޭނެ ކަމަށެވެ.

ޓިކެޓް ބުކްކުރަން ބޭނުންވާ ފަރާތްތަކުން ބޭނުންވާ ޓިކެޓުގެ އަދަދާއި، ޓިކެޓު ބުކްކުރަން ބޭނުންވާ ތާރީޚާއި، ގުޅޭނެ ފޯނު ނަންބަރު 'ވަކިން ލޯބިން' ފިލްމުގެ ފޭސްބުކް ޕޭޖަށް މެސެޖުކުރުމުން އެކަން ހަމަޖެހޭނެ ކަމަށް މޮގަރ ބުންޏެވެ.

ފިލްމުގެ އޮންލައިން ބުކިން ހުޅުވާލިއިރު، ޑާކްރެއިން އެންޓަރޓެއިންމަންޓުން ދަނީ މި ފިލްމުގެ ފުރަތަމަ ޕްރޮމޯޝަނަލް ވީޑީއޯ ރިލީޒް ކުރުމަށްވެސް ތައްޔާރުވަމުންނެވެ.

ފިލްމުގެ ފުރަތަމަ ޕްރޮމޯޝަނަލް ވީޑީއޯގެ ގޮތުގައި، ފިލްމުގައި ހިމެނޭ ލަވައެއް ކަމުގައިވާ 'ޕަރީ' ރިލީޒްކުރުމަށް ހަމަޖެހިފައިވަނީ މި ޖަނަވަރީ މަހުގެ 18 ވަނަ ދުވަހުއެވެ.

'ޕަރީ' އަކީ މަޝްޙޫރު މިއުޒިކް ބޭންޑް، އިކުއެޓިކް ވައިބްގެ ރީތި އަމިއްލަ ރާގުގެ ލަވައެކެވެ. މި ލަވައިގެ ވީޑިއޯ ނެރުމަށް ޑާކްރެއިން އެންޓަރޓެއިންމަންޓުން ތައްޔާރުވެފައިވާއިރު، އެ ސްޓޫޑިއޯއިން މީގެ ކުރިން ވަނީ އެ ލަވައިގެ އޯޑިއޯ ސައުންޑްކްލައުޑްގައި އާންމުކޮށްފައެވެ.

'ވަކިން ލޯބިން' ގެ ވާހަކަ އާއި ގުޅޭގޮތުން ޑާކްރެއިން އެންޓަރޓެއިންމަންޓުން މާބޮޑު މަޢުލޫމާތެއް ހާމަކޮށްފައި ނުވާއިރު، މި ފިލްމުގެ ލީޑު ދެ ކެރެކްޓަރގެ ރޯލުން ފެނިގެންދާނީ ޑާކްރެއިން އެންޓަރޓެއިންމަންޓްގެ އެންމެ މަޤުބޫލު ލޯޑް ޖޯޑު ކަމުގައިވާ މުޙައްމަދު ޖުމައްޔިލް (ޖުމަލް) އާއި މަރިޔަމް މަޖުދާ (މަޖޫ) އެވެ.

ޑާކްރެއިން އެންޓަރޓެއިންމަންޓުން، މޮގަރ އާއި އެކު އައިޝަތު ފުވާދް ޕްރޮޑިއުސްކުރާ މި ފިލްމުގައި ޖުމަލް އައި މަޖޫގެ އިތުރުންވެސް ގިނަ ފަންނާނުންތަކެއް ފެނިގެންދާނެއެވެ. އެގޮތުން ނުޒުހަތު ޝުއައިބް، ޚަދީޖާ އިބްރާހިމް ދީދީ (ކުޑަ ހައްޖަ)، އަޙުމަދު ސުނީ، ޢަބްދުﷲ ޝާފިއު އިބްރާހިމް، މަރިޔަމް ޔާލާ ޝިފާއު، ޢައިޝަތު ޝްއުއާ ޝާނިޒް އަދި ހަސަން މަނިކުގެ އިތުރުން އާދަމް ރިޒްވީ، މާރިއާ ޓެރޭސާ، އިބްރާހިމް އަމާން ޙުސައިން، އަޙުމަދު ޝާކިރު، މާއިޝާ އަޙުމަދާއި މަރިޔަމް ސާޖިޔަތުވެސް މި ފިލްމުން ފެނިގެން ދާނެއެވެ. މީގެ އިތުރުންވެސް މި ފިލްމުން ބައެއް ފަންނާނުން ފެނިގެން ދާނެއެވެ. 

އައިޝަތު ފުވާދް ލިޔެފައިވާ ވާހަކައަކަށް ހަދާ މި ފިލްމު ޑައިރެކްޓް ކޮށްފައިވަނީ އަލީ ޝިފާޢު (ޗިއްޕެ) އެވެ. ޑާކްރެއިން އެންޓަރޓެއިންމަންޓްގެ ގިނަ ފިލްމުތަކޭވެސް އެއްގޮތަށް މި ފިލްމުގެ ވިޜުއަލް އިފެކްޓްސް ހަދާފައިވަނީވެސް އަޙުމަދު ޝިނާނެވެ. މި ފިލްމަށް ޙުސައިން ޝަދިޔާން (ސޭންޑީ) ކޮސްޓިއުމް ޑިޒައިން ކޮށްދީފައިވާއިރު، މި ފިލްމުގެ މިއުޒިކް ހަދާފައިވަނީ މުޙައްމަދު އިކްރާމްއެވެ.

ފިލްމު ރިލީޒްކުރުމަށް ނިންމާފައިވަނީ މި އަހަރުގެ މާރިޗު މަހުގެ 5 ވަނަ ދުވަހުގެރޭ އޮލިމްޕަހުގައެވެ.