ބޯކޮށް ސްނޯ ފޭބުމުގެ ސަބަބުން އިނގިރޭސި ގިނަ ކުޅިވަރުތަކެއްގެ މެޗްތަކެއް ކެންސަލް

އިނގިރޭސިވިލާތަށް ފިނިގަދަވެ ބޯކޮށް ސްނޯ ފޭބުމުގެ ސަބަބުން ގިނަ ކުޅިވަރު މެޗްތަކެއް ފަސްކުރަން ޖެހިއްޖެއެވެ.

އެގޮތުން ސްޓޭޑިއަމްގެ ވަށައިގެންވާ ސަރަހައްދަށް ބޯކޮށް ސްނޯވެހި، ރައްކާތެރި މާހައުލެއް ނެތުމުގެ ސަބަބުން ޑާރބީ ކައުންޓީ އާއި ކާޑިފް ސިޓީ ބައްދަލުކުރަން ހަމަޖެހިފައިވާ ޗެމްޕިއަންޝިޕްގެ މެޗްވެސް ވަނީ ލަސްކޮށްފައެވެ.

އަންހެނުންގެ އެފްއޭ ކަޕްގެ ކުއާޓަރ ފައިނަލްގެ 3 މެޗެއްވެސް ވަނީ ލަސްކޮށްފައެވެ. އެއީ އާސެނަލް އާއި ޗާލްޓަން ބައްދަލުކުރާ މެޗާއި، ޑަރހަމް އާއި އެވަރޓަން ބައްދަލުކުރަން ހަމަޖެހިފައިވާ މެޗްގެ އިތުރުން ސަންޑަރލޭންޑާއި މެންޗެސްޓަރ ސިޓީ ބައްދަލުކުރަން ހަމަޖެހިފައިވާ މެޗްވެސް ވަނީ ލަސްކޮށްފައެވެ. އެފްއޭ ކަޕްގެ އަންހެން ކުއާޓަރ ފައިނަލްގެ އިތުރުން އަންހެނުންގެ ލީގުގެ ދެވަނަ ޑިވިޝަންގެ މެޗެއްވެސް ވަނީ ފަސްކޮށްފައެވެ.

އެހެން ކުޅިވަރުތަކަށް ބަލާއިރު ރަގްބީ ޔޫނިއަންގެ އެންގްލޯ-ވެލްޝް ކަޕްގައި ބާތު އާއި އެގްޒެޓަރ ބައްދަލުކުރަން ހަމަޖެހިފައިވާ މެޗްވެސް ވަނީ ލަސްކޮށްފައެވެ. އަދި އަޔަލެންޑްގެ ރަގްބީ ގްރޭންޑް ސްލޭމް ކާމިޔާބުކުރި ޓީމުގެ އުފާފާޅުކުރުންތައް ވަނީ ލަސްކޮށްފައެވެ. ރަގްބީ ސުޕަރކަޕްގައި ކާސްލްފޯޑާއި ވިގަން ބައްދަލުކުރަން އޮތް މެޗްވެސް 'ކުޅުންތެރިންނާއި ކުޅި ބަލަން ވަންނަ މީހުންގެ ސަލާމަތަށްޓަކައި' ވަނީ ލަސްކޮށްފައެވެ.

ދަނޑުގެ ފަސްގަނޑު ފިނީގެ ސަބަބުން ގަނޑުވެފައިވާތީ ސްކޮޓިޝް ލީގް ވަންގައި ރެއިތު ރޯވަރސް އާއި އީސްޓް ފައިފްގެ ބައްދަލުކުރުންވެސް ވަނީ ލަސްކޮށްފައެވެ.