ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އަދި ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ނާޒިމް އާއި ގުޅޭ މައްސަލަތަކެއްގެ އަޑުއެހުންތަކެއް ސުޕްރީމް ކޯޓުގައި ހޯމަ ދުވަހަށް ތާވަލް ކޮށްފި އެވެ.
ދައުލަތުގެ ފަރާތުން ޕްރޮސެކިއުޓަރ ޖެނެރަލްގެ އޮފީހުން ދައުވާ އުފުލާފައިވާ މި ތިން މައްސަލައަކީ ވެސް މަކަރާއި ހީލަތް ހެދުމުގެ ތިން މައްސަލަ ކަމަށް ސުޕްރީމް ކޯޓުން ބުނެފައި ވެ އެވެ.
ހޯމަ ދުވަހު ވިދިވިދިގެން މި ތިން މައްސަލަ ތާވަލް ކޮށްފައިވާއިރު ފުރަތަމަ މައްސަލަ މެންދުރު ފަހު 14:00 އަށް ތާވަލު ކޮށްފައިވާއިރު ދެވަނަ މައްސަލަ ތާވަލު ކޮށްފައިވަނީ 14:30 އަށެވެ. އަދި ތިން ވަނަ މައްސަލަ ތާވަލު ކޮށްފައިވަނީ 15:00 އަށެވެ.
ރައީސް ޔާމީންއާ ކުރިން ވަރަށް އަރިސް ބޭފުޅެއް ކަމުގައިވާ އަހުމަދު ނާޒިމަކީ އުމުރު ދުވަހުގެ ޖަލު ހުކުމެއް ތަންފީޒު ކުރައްވަމުން ގެންދަވާ ބޭފުޅެކެވެ. ސިއްހީ ފަރުވާ ހޯދުމަށް މޯލްޑިވްސް ކަރެކްޝަނަލް ސާވިސްގެ ހުއްދަ ލިބިގެން 10 ޑިސެމްބަރު 2015ގައި ސިންގަޕޫރަށް ވަޑައިގެންނެވުމަށް ފަހު ނާޒިމްވަނީ ވަނީ ރާއްޖެ ވަޑައިނުގެން ފިއްލަވާފައެވެ. އޭގެފަހުން ދިރިއުޅުއްވަމުން ގެންދަވަނީ ރާއްޖެއިން ބޭރުގައެވެ.