ނަޒީރަށް ވަކީލަކު ހަމަ ޖައްސަން އަނެއްކާވެސް އިތުރު ފުރުސަތެއް
އޭނާއަށް ވަކީލަކު ހަމަ ޖައްސަން ދިން މިއީ ދެވަނަ ފަހަރު
އަދާލަތު ޕާޓީގެ މީޑިއާ ކޮމެޓީގެ ޗެއާ އަލީ ނަޒީރު
މިދިޔަ ހުކުރު ދުވަހުގެ އެއްވުމަށް ގޮވާލާފައިވާތީ ފުލުހުން އަދާލަތު ޕާޓީގެ މީޑިއާ ކޮމެޓީގެ ޗެއާ އަލީ ނަޒީރު މައްޗަށް ހިންގާ ތަހްގީގުގައި ބަޔާން ނެގުމަށް ވަކީލަކު ހަމަ ޖައްސަން އިތުރު ފުރުސަތު ދީފި އެވެ.
އޭނާ އެންމެ ފުރަތަމަ ފުލުސް އޮފީހަށް ހާޒިރުކުރީ ހޮނިހިރު ދުވަހުގެ ރޭ 9 ޖެހިއިރު އެވެ. ނަމަވެސް ގާނޫނީ ވަކީލަކު ބޭނުންވާ ކަމަށް އޭނާ ވިދާޅުވުމުން ފުލުހުން އެންގީ އާދިއްތަ ދުވަހު މެންދުރު ފަހު ވަކީލަކާއެކު ހާޒިރުވުމަށެވެ. ނަމަވެސް އާދިއްތަ ދުވަހުވެސް އޭނާ ހާޒިރުވެވަޑައިގެންނެވީ ވަކީލަކާ ނުލަ އެވެ. ރާއްޖެއެމްވީއަށް މައުލޫމާތު ދެއްވަމުން ނަޒީރު ވިދާޅުވީ ވަކީލުން ހޯދުމުގައި ވަރަށް ދަތިތައް މި ދުވަސްވަރު އެބަހުރި ކަމަށާއި އެހެން ކަމުން އަދިވެސް ވަކީލަކު ހަމަ ނުޖެހެނީ ކަމަށެވެ. ފުލުހުން މިހާރު އަންގާފައިވަނީ ވަކީލަކާއެކު ހޯމަ ދުވަހު ހާޒިރު ވުމަށެވެ.
ނަޒީރު ހާޒިރުކޮށްފައި ވަނީ ކުއްލި ނުރައްކަލުގެ ޙާލަތު އިއުލާންކޮށްފައިވަނިކޮށް މިދިޔަ ހުކުރު ދުވަހު ބޭއްވި ޕްރެސް ކޮންފަރެންސެއްގައި، ރާއްޖޭގެ ހުރިހާ ރަށްތަކަކުން މަގުތަކަށް މީހުން ނުކުތުމަށާއި ސަރުކާރާ ދެކޮޅަށް އަޑުއުފުލައި މުޒާހަރާ ކުރުމަށް ހިތްވަރުދީ ވާހަކަ ދައްކާފައިވާ ކަމަށް ތުހުމަތު ކުރެވޭތީ ކަމަށް ބުނެއެވެ.
ނަޒީރަކީ ފަހަކަށް އައިސް ގުޅިފައިވާ ޕާޓީތަކުން ބާއްވާ ޕްރެސް ކޮންފަރެންސްތަކުގައި ޢަދާލަތު ޕާޓީގެ ފަރާތުން ބައިވެރިވެވަޑައިގެން ސަރުކާރަށް ވަރަށް ބޮޑަށް ފާޑު ވިދާޅުވާ ބޭފުޅެކެވެ.
