ކުނީގެ މައްސަލަ ޙައްލު ކުރުމަށް "އެންވަޔަރަންމަންޓް ޕޮލިސް" ގެ ހިދުމަތް ފަށައިގަތުމާ ބެހޭގޮތުން މޯލްޑިވްސް ޕޮލިސް ސަރވިސް އާއި މިނިސްޓްރީ އޮފް އެންވަޔަރަންމަންޓް އެންޑް އެނަރޖީ އަދި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާދެމެދު ފަހުމުނާމާއެއްގައި ސޮއި ކޮށްފިއެވެ.
އާދިއްތަ ދުވަހު މިނިސްޓްރީ އޮފް އެންވަޔަރަންމަންޓް އެންޑް އެނަރޖީގައި ބޭއްވި ރަސްމިއްޔާތުގައި މިނިސްޓްރީ އޮފް އެންވަޔަރަންމަންޓް އެންޑް އެނަރޖީގެ ފަރާތުން ސޮއި ކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ތޯރިގް އިބްރާހިމް އެވެ. މޯލްޑިވްސް ޕޮލިސް ސަރވިސްގެ ފަރާތުން ސޮއި ކުރެއްވީ އެކްޓިންގ ކޮމިޝަނަރ އޮފް ޕޮލިސް، ޑެޕިއުޓީ ކޮމިޝަނަރ އޮފް ޕޮލިސް އަބްދުﷲ ނަވާޒް އެވެ. ވޭސްޓް މެނޭޖްމަންޓް ކޯޕަރޭޝަންގެ ފަރާތުން މިފަހުމުނާމާގައި ސޮއި ކުރެއްވީ އެކުންފުނީގެ މެނޭޖިންގ ޑިރެކްޓަރ މުހައްމަދު ޝިފާއު އެވެ.
ފަހުމުނާމާގައި ސޮއިކުރެއްވުމަށް ފަހު ވާހަކަ ދައްކަވަމުން މިނިސްޓަރ ތޯރިގް ވިދާޅުވީ މާލޭ ބައެއް ސަރަޙައްދުތަކުގެ މަގުމައްޗަށް ކުނިއެޅުމާއި ގަވާއިދާ ހިލާފަށް ކުނިއުފުލުމުގެ ކަންކަން އަދިވެސް ފާހަގަކުރެވިފައިވާ ކަމަށާއި މިކަމުގެ ސަބަބުން އެފަދަ ފަރާތްތައް ހޯދައި، ގަވާއިދުގެ ދަށުން ފިޔަވަޅު އެޅުމުގެ މަސައްކަތްކުރެވިގެންދާނެ ކަމެއް ކަމަށެވެ. އަދި ފަހުމާނާގެ ދަށުން ސްޕެޝަލް ކޮންސްޓެބްލަރީގެ ހިދުމަތް ވަރަށް އަވަހަށް ފެށިގެންދާނެ ކަމަށް އުއްމީދު ކުރައްވާ ކަމަށާއި ފުލުހުންނަށް ބޭނުންވާ އެހީތެރިކަން ލިބިގެންދާނެ ކަމަށް ވެސް ތޯރިގް ވިދާޅުވިއެވެ.
މިރަސްމިއްޔާތުގައި އެކްޓިންގ ކޮމިޝަނަރ އޮފް ޕޮލިސް، ނަވާޒް ވިދާޅުވީ މި ފަހުމުނާމާގެ ސަބަބުން ރައްޔިތުންނަށް ރަނގަޅު ބަދަލުތަކެއްފެނި، ރައްޔިތުންނަށް ގިނަ ފައިދާތަކެއް ވެގެންދާނެ ކަމަށާއި ކުރިއަށް އޮތްތަނުގައި އެންވަޔަރަންމަންޓް ޕޮލިސްގެ ހިދުމަތް އެހެން ސިޓީތަކަށާއި އަތޮޅުތެރެއަށް ތައާރަފްކުރުމުގެ ވިސްނުން ގެންގުޅުއްވާ ކަމަށެވެ. މީގެއިތުރުން ފަހުމާނާމާގެ ސަބަބުން ފުލުހުންނާއި މިނިސްޓްރީ އާދެމެދު އޮތް ގުޅުން މިހާރަށް ވުރެ ބަދަހިވެ، ރައްޔިތުންގެ ލާބަޔާއި މަންފާއަށް ކުރެވެން ހުރި މަސައްކަތްތައް ބަލައި މަޝްވަރާކޮށް، ކުރިއަށް އޮތްތަނުގައި އިތުރު މަސައްކަތްތަކެއް ކުރެވިގެންދާނެ ކަމަށް ވެސް ނަވާޒު ވިދާޅުވި އެވެ.
ފުލުހުންނާއި އެންވަޔަރަންމަންޓް މިނިސްޓްރީން އަދި ވޭސްޓް މެނޭޖްމަންޓް ކޯޕަރޭޝަންއާ ދެމެދު ސޮއިކުރެވުނު މިފަހުމުނާމާއަކީ ތިން މުއައްސަސާއަށް ގާނޫނީ ގޮތުން ހަވާލުކުރެވިފައިވާ ޒިންމާ އާއި މަސްއޫލިއްޔަތު އަދާކުރުމުގައި ތިން މުޢައްސަސާއަށް ލިބިގެންވާ އިލްމާއި ތަޖުރިބާގެ އަލީގައި އެއްބާރުލުންދީ ތިން މުޢައްސަސާގެ ތަރައްގީއަށާއި ކުރިއެރުމަށް އަދި މިނިސްޓްރީ އޮފް އެންވަޔަރަންމަންޓް އެންޑް އެނަރޖީން ކުރިއަށް ގެންދާ "ސާފު ރާއްޖެ" އިނިޝިއޭޓްގެ ދަށުން ރާއްޖޭގެ ރަށްތައް ސާފު ރަށްތަކެއްގެ ގޮތުގައި ބޭއްވުމަށް ކުރަމުންދާ މަސައްކަތްތަކުގައި އެއްބާރުލުންދިނުމުގެ މަޤުޞަދުގައި ސޮއިކުރި ފަހުމުނާމާއެކެވެ. އަދި ކުނި މެނޭޖްކުރުމުގެ ޤަވާއިދުގެ ދަށުން ފިޔަވަޅު އަޅައި، އެޤަވާއިދު ތަންފީޒްކުރުމުގެ މަސައްކަތް ކުރުމަކީވެސް މިފަހުނާމާގެ މަގުސަދުތަކުގެ ތެރޭގައި ހިމެނޭ ކަމެކެވެ.
މި ފަހުމުނާމާގެ ދަށުން އެންވަޔަރަންމަންޓް މިނިސްޓްރީ އާއި ވެމްކޯގެ ގުޅިގެން ކުރިއަށް ގެންދާ މަސައްކަތްތަކަށް ހާއްސަކުރެވޭ ސްޕެޝަލް ކޮންސްޓަބްލަރީ ހިދުމަތް ހަމަޖެހިގެން ދާނެއެވެ. އަދި ގަވާއިދާ ހިލާފަށް ކުނި ޖަމާކުރުން ހުއްޓުވުމަށްޓަކައި މާލެތެރެ ޕެޓްރޯލްކޮށް ބެލެހެއްޓުމާއި ކުނި މެނޭޖްކުރުމަށް ވޭސްޓް މެނޭޖްމަންޓް ކޯޕަރޭޝަނަށް ހާއްސަކުރެވިފައިވާ ޒޯންތަކުގެ ރައްކާތެރިކަމުގެ ފިޔަވަޅު އެޅުމާއި، ގަވާއިދާ ހިލާފަށް އެޒޯންތަކުގައި ޕާކުކުރާ ފަރާތްތަކާމެދު ޤާނޫނީ ފިޔަވަޅު އެޅުމުގެ އިތުރުން ގަވާއިދާ ޚިލާފަށް ކުނި އުފުލާ ފަރާތްތަކާމެދު ގަވާއިދުގައިވާ ގޮތުގެ މަތިން ފިޔަވަޅު އަޅައި، ބައިސްކަލުގައްޔާ ގާޑިޔާތަކުގައި ގަވާއިދާ ހިލާފަށް ކުނި އުފުލަމުންދާނަމަ އެކަންކަން ހުއްޓުވުމަށްޓަކައި މަސައްކަތްތައް ކުރެވޭނެއެވެ.
މީގެއިތުރުން ވެމްކޯއަށް ކުނި މެނޭޖްކުރުމުގައި ސެކިއުރިޓީ ގޮތުން ދިމާވާ ކަންތައްތައް ހައްލުކުރުމުގައި އެހީތެރިކަން ފޯރުކޮށްދިނުމުގެ އިތުރުން ތަންފީޒް ކުރަންޖެހޭ ގަވާއިދުތައް ތަންފީޒްކުރުމަށްޓަކައި އެއްބާރުލުންދީ، ގަވާއިދާ ހިލާފުވާ ފަރާތްތަކާމެދު އެޅޭ ފިޔަވަޅުތައް ތަންފީޒް ކުރުމަށް އެންވަޔަރަންމަންޓަލް ޕްރޮޓެކްޝަން އެޖެންސީ (އޭޕީއޭ) މެދުވެރިކޮށް ކުރަންޖެހޭ މަސައްކަތްތައް ކުރެވިގެންދާނެއެވެ.
