ޑިސެމްބަރު މަހުގެ 11 ވަނަ ދުވަހު ކައިވެނި ކުރި ކްރިކެޓް ކުޅުންތެރިޔާ ވިރާތު ކޯލީ އާއި އޭނާގެ އަންހެނުން އަދި ބޮލީވުޑްގެ ފިލްމީ ތަރި އަނުޝްކާ ޝަރުމާ ވެފައިވަނީ އާންމުންގެ ސަޕޯޓް ލިބިގެންދާ ދެމަފިރިންނަށެވެ.
ދާދި ފަހަކުން ވިރާތު ކޮށްފައިވާ ޓްވީޓެއް މިވަނީ މިހާރު ވައިރަލް ވެފައެވެ.
މިދިޔަ ހަފްތާތެރޭގައި ވިރާތު ކޮށްފައިވާ ޓްވީޓެއްގައި ބުނެފައިވަނީ ދިރިއުޅުމުގައި ވަރަށް ގިނަ ކަންތައްތަކެއް ހިނގަމުން އެބަ އަންނަ ކަމަށާއި، އަދި ވަރަށް އަވަހަށް އެ ވާހަކަތައް ސަޕޯޓަރުންނާ ހިއްސާ ކުރާނެ ކަމަށެވެ.
މި ޓްވީޓާއި އެކު ޓްވިޓަރުންގެ އެތަކެއް ސުވާލުތަކެއް ވިރާތަށް އަމާޒުވިއެވެ. އެހެން ނަމަވެސް އެއްވެސް ޖަވާބެއް އަދި ދީފައެއް ނުވެއެވެ.
There’s a lot that’s happening right now. Fill you guys in real soon!
— Virat Kohli (@imVkohli) March 9, 2018
އެ ޓްވީޓާއި ގުޅިގެން ވިރާތުގެ އަންހެނުން އަނުޝްކާ ބަލިވެއިނީތޯ އަދި ވިރާތަށް ކުއްޖަކު ލިބެން އުޅެނީތޯ ވަނީ އަހާފައެވެ. އިންޑިއާގެ ނޫސްތަކުގައި މިޓްވީޓާއި ގުޅިގެން ވަނީ އަނުޝްކާ ބަލިވެއިންތޯ ސުވާލު އުފައްދާފައެވެ.
ވިރާތު ވަނީ މީގެ ކުރިން އޭނާ ދީފައިވާ އިންޓަވިއުއެއްގައި ކުއްޖަކު ލިބުން އެއީ މިދުނިޔޭގައި ލިބޭނެ އެންމެ ބޮޑު އުފާކަމަށް ބުނެފައެވެ.
ވިރާތާއި އަނުޝްކާގެ ކައިވެނީގެ އުފަލުގައި ވަނީ ދެޕާޓީއެއް ބާއްވާފައެވެ. އޭގެ ތެރެއިން އެއް ޕާޓީ ބާއްވާފައި ވަނީ އިންޑިއާގެ ނިއުދިއްލީގައެވެ. ދެވަނަ ޕާޓީ ބާއްވާފައި ވަނީ އިންޑިއާގެ މުމްބާއީގައެވެ. ދިއްލީގައި ބޭއްވި ޕާޓީގައި އިންޑިއާގެ ބޮޑުވަޒީރު ނަރެންދުރަ މޯދީ ވަނީ ބައިވެރިވެވަޑައި ގަންނަވާފައެވެ. މުމްބާއީ ގައި ބޭއްވި ޕާޓީގައި ވަނީ ގިނަ އަދަދެއްގެ ފަންނާނުން ބައިވެރިވެފައެވެ.
