ކުއްލި ނުރައްކަލުގެ ހާލަތުގެ ދަށުން ހައްޔަރުކޮށްފައިވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހްމަދު މަހްލޫފްގެ ބަންދަށް 13 ދުވަސް ޖަހައިފިއެވެ.
މަހްލޫފްގެ ޤާނޫނީ ވަކީލް ނާޒިމް ޢަބްދުއްސައްތާރު ރާއްޖެ އެމްވީއަށް ވަނީ އެކަން ކަށަވަރުކޮށް ދެއްވާފައެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި މަހްލޫފްއާއި ކުއްލި ނުރައްކަލުގެ ހާލަތުގެ ދަށުން ހައްޔަރުކޮށްފައި ތިބި އިތުރު ބަޔަކުވެސް ކޯޓަށް ހާޒިރުކުރި އެވެ. ކުއްލި ނުރައްކަލުގެ ހާލަތުގެ ދަށުން ޖަލުގައި ޖަލުގައި ހައްޔަރުކޮށްފައި ބެހެއްޓުމަށް ފަހު ގޭބަންދަށް ބަދަލުކޮށްފައިވާ ސުޕްރީމް ކޯޓުގެ ފަނޑިޔާރު ޢަލީ ހަމީދުގެ އަނބިކަނބަލުން ފާތިމަތު ނާސިރާގެ ގޭބަންދުގެ މުއްދަތައް 15 ދުވަސް ވެސް ހޮނިހިރު ދުވަހުގެ ރޭ ކޯޓުން އިތުރުކުރި އެވެ.
އެސްއޯއީގެ ދަށުން ހައްޔަރުކޮށްފައިވާ ބަޔަކު މުއްދަތު ޖެހުމަށް ކްރިމިނަލް ކޯޓަށް ހާޒިރު ކުރަން ނިންމާފައި މިވަނީ، އެސްއޯއީގެ މުއްދަތު ހަމަވިއަސް އެމީހުން ދޫ ނުކުރާނެ ކަމަށް ޕީޕީއެމްގެ ޕީޖީ ލީޑަރ އަހުމަދު ނިހާން ވިދާޅުވެފައި ވަނިކޮށެވެ.
ކުއްލި ނުރައްކަލުގެ ހާލަތު ނިމުނު ނަމަވެސް އެ ހާލަތުގެ ދަށުން ހައްޔަރު ކޮށްފައިވާ މީހުން މިނިވަން ނުވާނެ ކަމަށާއި އެ މީހުންގެ މައްސަލަ ބާރަށް ކުރިއަށް ދާނެ ކަމަށް ނިހާނު ވަނީ ވިދާޅުވެފަ އެވެ.
