ފަޒީން ހައްޔަރުކުރެވިފައި ވަނީ ކުއްލި ނުރައްކަލުގެ ހާލަތުގެ ދަށުން ކަމަށް އަންގައިފި

ރާއްޖެޓީވީގެ ނޫސްވެރިޔާ މުހައްމަދު ފަޒީން ހައްޔަރުކުރެވިފައި ވަނީ، ކުއްލި ނުރައްކަލުގެ ހާލަތުގެ ދަށުން ކަމަށް އަންގައިފިއެވެ.

ފަޒީން ހައްޔަރުކޮށްފައި ވަނީ ހުކުރު ދުވަހުގެ ރޭ އިދިކޮޅު ފަރާތްތަކުން މާލޭގައި ބޭއްވި މުޒާހަރާ ކަވަރު ކުރުމުގައި ހަރަކާތްތެރިވަނިކޮށެވެ. ބިޑިއަޅުވައިގެން ފަޒީން ހައްޔަރުކޮށްގެން ގެންދިޔައީ ޓްރެފިކް ފުލުހުންތަކެކެވެ.

ފަޒީންގެ ގާނޫނީ ވަކީލު މުހައްމަދު ނިޝާން ވިދާޅުވީ ފަޒީން ހައްޔަރުކޮށްގެން ގެންދިޔައީ ކުއްލި ނުރައްކަލުގެ ހާލަތުގެ ދަށުން ނޫން ކަމަށާއި އެހެންނަމަވެސް، އޭނާ ހައްޔަރުކޮށްފައި ވަނީ އެ ހާލަތުގެ ދަށުން ކަމަށް ހޮނިހިރު ދުވަހު ފުލުހުން އަންގާފައިވާ ކަމަށެވެ.

ބަންދުގެ މުއްދަތު ޖެހުމަށް ފަޒީން ހާޒިރުކުރުމާ މެދު އަދި މިހާތަނަށް ފުލުހުން ގޮތެއް ނުނިންމާ ކަމަށް ވެސް ނިޝާން ވިދާޅުވި އެވެ.

ފަޒީންގެ އިތުރުން، ރާއްޖެޓީވީގެ ނޫސްވެރިޔާ މުހައްމަދު ވިސާމާއި ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ވެސް ވަނީ ހައްޔަރުކޮށްފައެވެ. ވިސާމާއި އާމިރު ހައްޔަރުކޮށްފައި ވަނީ ވީޑިއޯއެއް ހަދައި އެ އަޕްލޯޑް ކުރި ކަމަށް ތުހުމަތުކޮށް ކޯޓު އަމުރެއްގެ ދަށުންނެވެ.

އާމިރާއި ވިސާމްގެ ބަންދުގެ މުއްދަތު ޖެހުމަށް ހޮނިހިރު ދުވަހުގެ މެންދުރު 3:00 އަށް ކްރިމިނަލް ކޯޓަށް ހާޒިރުކުރާނެއެވެ.