އިބޫ ހައްޔަރުކޮށް ދޫނިދޫގައި!
17 މާރިޗު 2018 | ހޮނިހިރު 04:31ހައްޔަރުކުރީ ކޮން ތުޙުމަތެއްގައިކަން އަދި ފުލުހުން ސާފުކޮށެއް ނުދޭ
ހުކުރު ދުވަހުގެ ރޭގެ މުޒާހަރާގެ ތެރެއިން އިބޫ، ޖުމްހޫރީ މައިދާނުގައި
ރައްޔިތުންގެ މަޖިލީހުގެ އަޣުލަބިއްޔަތު މެންބަރުން ޕީޖީ ލީޑަރުގެ ގޮތުގައި ޤަބޫލުކުރާ، ދިވެހިރައްޔިތުންގެ ޑިމޮކްރެޓިކް ޕާޓީގެ ޕީޖީ ލީޑަރު އަދި އެ މަޖިލީހުގެ ހިންނަވަރު ދައިރާގެ މެންބަރު އިބްރާހިމް މުޙައްމަދު ޞާލިޙު (އިބޫ) ހައްޔަރުކޮށް، ދޫނިދޫގައި ބަންދުކޮށްފިއެވެ.
އިބޫ ހައްޔަރުކޮށްފައި ވަނީ "ހުއްޓުވާ" ގެ ނަމުގައި ގުޅިފައިވާ ޕާޓީތަކުން ހުކުރު ދުވަހުގެރޭ ކުރި މުޒާހަރާގެ ތެރެއިންނެވެ.
އިބޫ ހައްޔަރުކުރި ޚަބަރު ފުރަތަމަ ފެތުރިގެން ދިއުމުން، އެމްޑީޕީގެ އިސް ފަރާތްތަކުން އޭރު އިބޫ ހައްޔަރު ނުކުރާކަން ހާމަ ކުރި ނަމަވެސް، ފަހުން އިބޫ ހައްޔަރުކުރިކަން އެމްޑީޕީގެ ސެކްރެޓޭރިއޭޓުން ވަނީ ޔަޤީންކޮށްދީފައެވެ. ޖުމްހޫރީ މައިދާނުގައި އިބޫ ހުންނަވަނިކޮށް ނަގާފައިވާ ފޮޓޯތަކެއް ސޯޝަލް މީޑިއާގައި ދަނީ ދައުރުވަމުންނެވެ.
އިބޫ ހައްޔަރުކުރީ ކޮން ތުޙުމަތެއްގައި ކަމެއް ފުލުހުން ހާމަކޮށްފައެއް ނުވެއެވެ. އަދި އިބޫ ހައްޔަރުކުރެވުނީ ކުއްލި ނުރައްކަލުގެ ހާލަތުގެ ދަށުންކަން ނުވަތަ ނޫންކަން ވެސް ފުލުހުން ހާމަކޮށްފައެއް ނުވެއެވެ.
ހުކުރު ދުވަހުގެރޭ މާލެގައި ކުރި މުޒާހަރާގައި ފަހުގެ ތާރީޚެއްގައި މުޒާހަރާތަކުގައި ބައިވެރިވެފައި ނުވާ މިންވަރަށް ރައްޔިތުން ބައިވެރިވިއިރު، މުޒާހަރާއިން ގިނަ އަދަދެއްގެ ރައްޔިތުން ވަނީ ހައްޔަރުކޮށްފައެވެ. މުޒާހަރާގެ ބައިވެރިން ޖުމްހޫރީ މައިދާނަށް ވެސް ވަދެފައިވާއިރު، މުޒަހަރާ ކޮންޓްރޯލް ކުރުމަށް ފުލުހުން ވަނީ ވަރަށް ބޮޑަށް ބާރުގެ ބޭނުންކޮށްފައެވެ.
މުޒާހަރާއިން ހައްޔަރުކުރި މީހުންގެ އަދަދު ފުލުހުން އަދި ކަށަވަރުކޮށްދީފައި ނުވާއިރު، ފުލުހުންގެ ފަރާތުން ގިނަ އަދަދެއްގެ ރައްޔިތުންނަށް ހުކުރު ދުވަހުގެރޭ ވަނީ އެކި ވަރުގެ އަނިޔާ ލިބިފައެވެ.
