ރައީސް ޔާމީން ވަނީ އެ އެއް މިލިއަން ޑޮލަރު ނަގާ ހުސްކޮށްފަ: އަލީ ޒާހިރު
އެއް ފަހަރު ނިހާނު ވިދާޅުވަނީ އެ އެއް މިލިއަން ޑޮލަރު ވީ އޭސީސީގެ ބެލުމުގެ ދަށުގައޭ
ރައީސް ޔާމީންގެ މައްޗަށް ތުހުމަތު ކުރެވޭ ކޮރަޕްޝަން މައްސަލަތަކުގެ ޕޯސްޓަރެއް
އެމްއެމްޕީއާރުސީގެ ހިޔާނާތުގެ ފައިސާގެ ތެރެއިން ރައީސް އަބްދުﷲ ޔާމީން އަބްދުލްގައްޔޫމްގެ އެކައުންޓަކަށް ޖަމާކުރި އެއް މިލިއަން ޑޮލަރު ނަގާ ހުސްކޮށްފައިވާ ކަމަށް އަދާލަތު ޕާޓީގެ ނައިބު ރައީސް އަލީ ޒާހިރު ވިދާޅުވެއްޖެއެވެ.
އަލީ ޒާހިރު ކުރެއްވި ޓްވީޓެއްގައި ވިދާޅުވެފައިވަނީ މޯލްޑިވްސް އިސްލާމިކް ބޭންކުގައި ރައީސް ޔާމީން ހުޅުވާފައިވާ އެކައުންޓަށް ވެދެފައިވާ އެއް މިލިއަން ޑޮލަރު، ރައީސް ޔާމީން ވަނީ ނަގާ ހުސްކޮށްފަ ކަމަށެވެ. އަދި އެންޓި ކޮރަޕްޝަން ކޮމިޝަން (އޭސީސީ)ގައި އެ ބޭންކު އެކައުންޓްގެ ސްޓޭޓްމަންޓް އޮންނާނެ ކަމަށާއި އޭސީސީ ވަނީ އެފައިސާ ދައުލަތަށް ދެއްކުމަށް ރައީސް ޔާމީންއަށް އަންގަވާފައި ކަމަށްވެސް އަލީ ޒާހިރު ވިދާޅުވެފައި ވެއެވެ.
ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިން މަނިކު ޓެގް ކުރައްވާ އަލީ ޒާހިރު އެ ޓްވީޓް ކުރެއްވީ ފަހަރެއްގައި ނިހާނަށް އެކަން އެނގިވަޑައިގަނެފައިނުވާނަމަ އެކަން އަންގައި ދިނުމުގެ ގޮތުން ކަމަށް އެޓްވީޓްގައި އަލީ ޒާހިރު ވިދާޅުވެފައި ވެއެވެ.
ބުދަ ދުވަހު ޕީޕީއެމްއިން ބޭއްވި ނޫސްވެރިންގެ ބައްދަލުވުމެއްގައި ނިހާނު ވިދާޅުވީ އެ އެއް މިލިއަން ޑޮލަރު ރައީސް ޔާމީންގެ އެކައުންޓަށް ޖަމާކުރި ފަރާތަކުން ޖަމާކޮށްފައިވަނީ ރައީސް ޔާމީންއަށް އެނގިވަޑައިގަތުމަކާ ނުލާ ކަމަށާއި، އެފައިސާ ރައީސް ޔާމީން ބޭނުންފުޅު ނުކުރައްވާ ކަމަށެވެ. އަދި އެ އެއް މިލިއަން ޑޮލަރު ހުރީ އޭސީސީގެ ބެލުމުގެ ދަށުގައި ކަމަށްވެސް ނިހާނު ވިދާޅުވިއެވެ.
ނިހާނު އެގޮތަށް ވިދާޅުވުކުން އޭސީސީން ބުނެފައިވަނީ ރައީސް ޔާމީންގެ އެކައުންޓަށް ޖަމާކުރި އެ އެއް މިލިއަން ޑޮލަރު އޭސީސީގެ ބެލުގެ ދަށުގައި ނެތްކަމަށެވެ.
އޭސީސީން އެގޮތަށް ބުނުމުން ނިހާނު ވިދާޅުވީ އެ އެއް މިލިއަން ޑޮލަރު ހުރީ އޭސީސީގެ ބެލުމުގެ ދަށުން ރައީސް ޔާމީންގެ އެކައުންޓްގައި ކަމަށެވެ.
އެ އެއް މިލިއަން ޑޮލަރުގެ އިތުރުން ރައީސް ޔާމީން ވަނީ އެމްއެމްޕީއާރުސީގެ ހަރާމް ފައިސާ އެމަނިކުފާނުގެ ގެކޮޅު "ދޫވެހި"އަށްވެސް ވަދެފައިވާ ކަމަށް އިއުތިރާފް ވެވަޑައިގަންނަވާފައެވެ.
ހިޔާނާތުގެ ފައިސާ ރައީސް ޔާމީންއާ ހަވާލުކުރެއްވުމުގައި އުޅުއްވި ކުރީގެ ނައިބު ރައީސް އަހުމަދު އަދީބުގެ އަރިސް ބައެއް ފަރާތްތައް ވަނީ އަލްޖަޒީރާއިން ތައްޔާރުކުރި ތަހުގީގީ ޑްކިއުމެންޓްރީ "ސްޓީލިންގ ޕެރަޑައިސް" ގައި ކިޔައިދީފައެވެ.
