ކުއްލި ހާލަތުގެ ދަށުން ދޫނިދޫގައި ބަންދުކޮށްފައިވާ އެންމެން ނަވާޒާއި ހަމްދޫނާއި ބައްދަލުކުރަން އެދިއްޖެ
13 މާރިޗު 2018 | އަންގާރަ 07:23ކުއްލި ނުރައްކަލުގެ ހާލަތުގެ ދަށުން 44 މީހަކު ބަންދުކޮށްފައި
ނަވާޒުއާއި ހަމްދޫން ހިމެނޭ ގޮތަށް ފުލުހުންގެ އިސްވެރިންތައް
ކުއްލި ނުރައްކަލުގެ ހާލަތުގެ ދަށުން ހައްޔަރުކޮށް، ދޫނިދޫގައި ބަންދުކޮށްފައިވާ އެންމެން، އެކްޓިންގ ޕޮލިސް ކޮމިޝަނަރު އަބްދުﷲ ނަވާޒާއި އެސިސްޓެންޓް ކޮމިޝަނަރ ހަމްދޫން ރަޝީދުއާ ބައްދަލުކުރަން އެދިއްޖެ އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ކުއްލި ނުރައްކަލުގެ ހާލަތުގެ ދަށުން ހައްޔަރުކޮށް، ދޫނިދޫގައި ބަންދުކޮށްފައި ތިބި އެންމެން ނަވާޒާއި ހަމްދޫނާއި ބައްދަލުކުރަން އެދުނީ، އެ މީހުން ބަންދުކޮށް އަމަލުކުރަމުންދާ ގޮތާއި ގުޅިގެން ހުރި ކަންބޮޑުވުންތައް ހިއްސާކުރުމަށެވެ.
ކުއްލި ނުރައްކަލުގެ ހާލަތުގެ ދަށުން 44 މީހަކު ބަންދުކޮށްފައިވެއެވެ. އޭގެ ތެރޭގައި، ކުރީގެ ރައީސް މައުމޫން އަބްދުލްގައްޔޫމާއި، އުއްތަމަ ފަނޑިޔާރު އަބްދުﷲ ސައީދުއާއި ފަނޑިޔާރު އަލީ ހަމީދުގެ އިތުރުން، އެމްޑީޕީގެ ނައިބު ރައީސް މުހައްމަދު ޝިފާޒު އާއި ޖުމްހޫރީ ޕާޓީގެ ޑެޕިއުޓީ ލީޑަރު އަބްދުﷲ ރިޔާޒު ވެސް ހިމެނިވަޑައިގަންނަވައެވެ.
މި ބޭފުޅުންގެ އިތުރުން، ރައްޔިތުންގެ މަޖިލީހުގެ ގިނަ އަދަދެއްގެ މެންބަރުންނާއި ގުޅިފައިވާ ޕާޓީތަކުގެ އިސް މެންބަރުންނާއި އެކްޓިވިސްޓުންނާއި ފުލުހުންގެ ސްޕެޝަލިސްޓް އޮޕަރޭޝަންސްގައި މަސައްކަތް ކުރަމުންދިޔަ ފުލުހުންތަކެއް ވެސް ހިމެނެ އެވެ.
ރާއްޖެއެމްވީއަށް މައުލޫމާތު ދެއްވި ގިނަ ވަކީލުންތަކެއް ވަނީ، މުވައްކިލުންގެ އެދުމުގެ މަތިން ނަވާޒުއާއި ހަމްދޫންއާ ބައްދަލުކުރުމަށް އެދި ސިޓީ ފޮނުވާފައިވާކަން ކަށަވަރުކޮށްދީފައެވެ. ނަމަވެސް، އެ ދެ ބޭފުޅުންނާ ބައްދަލުކުރަން މުވައްކިލުން އެދޭ ސަބަބު ނޭނގޭ ކަމަށް ވަކީލުން ބުނެ އެވެ.
ކުއްލި ނުރައްކަލުގެ ހާލަތު އިއުލާނުކޮށް ހައްޔަރުކޮށްފައިވާ ގިނަ މީހުންގެ މައްޗަށް ކުރަނީ ގާނޫނާ ޚިލާފަށް ސަރުކާރު ވައްޓާލަން އުޅުމުގެ ތުހުމަތެވެ. ހައްޔަރުކޮށްފައިވާ ބައެއް ފަރާތްތަކާ އަދި މިހާތަނަށް ތަހުގީގުގައި ސުވާލުކޮށްފައި ވެސް ނުވެ އެވެ.
