ރައީސް ޔާމީނު: ސިހިސިހިސިހި އެކަނިވެފާ!

" ބޯހާސްވެ ދަންވަރު ގޭގައި އެކަނި، ހޯދާބަލާ ވިސްނާއެކަނި ، ސިހިސިހިސިހި އެކަނިވެފާ" މިއީ ދިވެހި ޅެންވެރިޔެއްގެ ހިޔާލެއް ނޫނެވެ. މިއީ ގައުމުތަކުގައި ވެރިކަން ކުރި ޚުދުމުހުތާރު ވެރިން ތަޖްރިބާ ކޮށްފައިވާ ކަންކަމެވެ. މިވާހަކަތައް ޅެންވެރިކަމުގެ ހަމަތަކަށް ފެތި ހިމުންވެ ، ތަރުތީބުވެފައި ހުއްޓެއް ކަމަކު މިއީ ދޮގުވާހަކަތަކެއް ނޫނެވެ.

މިކަން ތަޖުރިބާ ކުރި ޚުދުމުހުތާރު ވެރިންގެ ތެރޭގައި ހިޓްލަރާ، ސައްދާމު ހުސެއިންގެ ނަން ފާހަގަ ކޮށްލާނަމެވެ. އެއީ އެނޫން ނަންތަކެއް ނެތިގެން ލިސްޓް ކުރުވެގެން އަޅުގަނޑު ކުރަން ނިންމި ކަމެއް ނޫނެވެ. އެވަރުން ވެސް ފުދޭނެ ކަމަށް ގަބޫލު ކުރާ ހިތް އޮތްލެއް ބޮޑުކަމުންނެވެ. ހިޓްލަރަކީ އޭނާގެ އަނިޔާވެރިކަމުގައި އެގާރަ މިލިޔަން މީހުން މަރާފައިވާ ވެރިޔެކެވެ. އޭނާގެ ވެރިކަމާ، މުށުތެރޭގައި މުތުލަގަށް އޮތް ބާރު ގެއްލި ދިޔައީ ގޮތް ހުސްވެ، އަމިއްލަ އުނަގަނޑުގައި އޮތް ފިސްތޯލަ ނަގައި އަމިއްލަ އަތުން ބޮލަށް ޖަހައިގެންނެވެ.

އިރާގުގައި ވެރިކަން ކުރި ސައްދާމު ހުސެއިން ނިމުން އައި ގޮތް ގިނަ ބޭފުޅުން ހަނދާން ނެތޭހާ ދުވަހެއް ނުވެއެވެ. އާރާއިބާރުގައި ސިފައިންގެ ބޮޑު ލަޝްކަރަކާއި އެކު ނަން ހުސްކޮށް މެޑަލް ޖަހައިގެން ތިބި ސިފައިންގެ ހިމާޔަތުގައި އެ ގައުމުގައި ވެރިކަން ކުރި ރައީސް ސައްދާމު ހުސެއިން، ގުޅިފައިވާ ލަޝްކަރުން އަތުލައިގަނެގެން ހައްޔަރުކުރި އިރު އޮތީ މަގުމަތީގައި ހަދައިފައިވާ ޖަންކްޝަނެއް ގައި ގިނިކަންޏާއެވެ. މިއީ ގައިމުވެސް މި ދުނިޔެ ދައްކައިފައިވާ ހަގީގަތެވެ.

ރައީސް ޔާމީނު ވެރިކަމުގެ ގާނޫނީ ހުވާ ކުރެއްވި ދަރުބާރުގައި ކޯލިޝަން ޕާޓުނަރުންގެ ގޮތުގައި ފެންނަން ތިއްބެވީ ރާއްޖޭގައި ސިޔާސީ ގޮތުން ބުރަދަން ހުރި ބޭފުޅުންނެވެ. ގާސިމް އިބްރާހިމާއި، ރައީސް މައުމޫނާއި އިމްރާން އަބުދުﷲ ފަދަ ބޭފުޅުންނެވެ. މިއަދު އެބޭފުޅުން ކޮބައި ހެއްޔެވެ؟ ނެތެވެ. ރައީސް މައުމޫނު ޖަލުގެ ތޭރިތަކުގެ ބިއްދޮށުގައެވެ. އިމްރާނު ވެސް ޖަލުގައެވެ. ގާސިމް އިބުރާހިމް އަތުޖެހިފައި ނެތުމުން އެމަނިކުފާނުގެ ދަރިކަލުން ޖަލުގައި ބަންދުކޮށްފިއެވެ. އެދުވަހު ރައީސް ޔާމީނަށް ގާނޫނީ ހުވާ ލައިދެއްވަން ހުންނެވި އުއްތަމަފަނޑިޔާރު އަލްއުސްތާޒް އަހުމަދު ފާއިޒް ހުސެއިންގެ މަގާމު ވަނީ ގެއްލުވާލާފައެވެ. ފާއިޒަށް ކުރެއްވުނު ކުށެއް ވެސް އަދިއަދަށް ދާންވެސް ނޭނގެއެވެ.

ގައުމެއްގައި ސިފައިންނާ ފުލުހުންގެ ދައުރަކީ މުހިންމު ދައުރެކެވެ. 1 ފެބްރުއަރީ 2018 އިން ފެށިގެން މިގައުމުގައި ސިފައިންނާ ފުލުހުންގެ ތެރެއިން ސަސްޕެންޑް ކުރެވުނު މީހުންނާ ބަންދު ކުރެވުނު މީހުންނާ، ވަޒީފާއިން ވަކިކުރެވުނު ފަރާތްތަކުގެ ލިސްޓް އެހުރީ ފެންނާށެވެ. ސިއްރެއް ނުވިއެވެ. ރައީސް ޔާމީނުގެ ވެރިކަން ނަގަހައްޓަން ތިބި މީހުންނާ މެދު ސަރުކާރުގެ ވެރިންގެ ހިތުގައި ޝައްކު އުފެދިފައި ނެތް ނަމަ މިގޮތަށް މިކަމެއް ނުހިނގާނެއެވެ. އަދި 1 ފެބްރުއަރީ 2018 ގެ ސުޕްރީމް ކޯޓުގެ އަމުރު ތަންފީޒު ކުރަން މަސައްކަތް ކުރި ކަމަށް ބުނާ ޕޮލިސް ކޮމިޝަނަރު މަގާމުން ވަކިކޮށް މިއަދު އޭނާ ވެސް އެހުރީ ކުޑަގޮޅިއަށް ލައިފައެވެ.

ގާނޫނޭ، ގާނޫނު އަސާސީއޭ، ތިންބާރު މުތުލަގަށް ލިބުނީއޭ ގޮވާނަގަމުން ގޮސް މިއަދު އެވަނީ ސުޕްރީމް ކޯޓުގެ ފަނޑިޔާރުންގެ ތެރެއިން ފަނޑިޔާރަކާ، އުއްތަމަފަނޑިޔާރު ވެސް ކުޑަގޮޅިއަށް ލައިފައެވެ. ހާސްކަމާ ކަންބޮޑުވުމުގެ ނަތީޖާއެއްގެ ގޮތުން ކުއްލި ނުރައްކަލުގެ ހާލަތު އިއުލާންކޮށް ވެރިކަމުގެ ކައްތިރިއަކަށް ކުއްލި ނުރައްކަލުގެ ހާލަތުހަދައިފައެވެ. ބިތަށްތެޅެމުންދާ މި ސަރުކާރުގެ 5 އަހަރުގެ ދައުރު ހަމަކުރުމަށް ބޭނުންވާނެ ހަކަތަ ދިނުމަށް މަޖިލިސް މެމްބަރުން ލައްވާ ކުރުވާ ކަންކަމަކީ ސިކުނޑި އަރައިރުންވާ ކަންކަމެވެ. އެންމެ ފަހުން މަޖިލިސް މެމްބަރުން އަރާތިއްބެވި ގޮފިގަނޑު އެބޭފުޅުން އަތުން ކީހާލުމަށް މަޖުބޫރު ކުރާ ހިސާބަށް ދިޔުމުން ވެރިޔަކު " ސިހިސިހިސިހި އެކަނިވަނީ" ކަމުގެ ކުލަވަރު މިދަނީ ފެންނަމުންނެވެ.