ގޮނޑި ގެއްލޭ ބިލާ ސަލީމް ދެކޮޅު، ވިދާޅުވީ މެމްބަރުން ތަސައްރަފު ފުދުމަށް!
12 މާރިޗު 2018 | ހޯމަ 07:41ބިލު އޮތްނަމަ، ސަރުކާރަށް މެޖޯރިޓީއެއް ނުލިބޭނެ: ސަލީމް
ޕީޕީއެމް ޕާލަމެންޓްރީ ގްރޫޕުގެ މެމްބަރު ސަލީމް: ބިލަށް ފާޑުވިދާޅުވި
މަޖިލީހުގެ މެމްބަރުންގެ ގޮނޑި ގެއްލުވާލުމުގެ ބާރު ޕާޓީތަކަށާއި އިލެކްޝަންސް ކޮމިޝަނަށް ލިބޭ ގޮތަށް މަޖިލީހަށް ހުށަހަޅާފައިވާ އެންޓި ޑިފެކްޝަން ބިލަށް އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) ދެކޮޅު ހައްދަވައި ވާހަކަ ދައްކަވައިފިއެވެ.
ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ހުށަހެޅުއްވި އެންޓި ޑިފެކްޝަންގެ ބިލަށް ސަލީމް ދެކޮޅު ހައްދަވައި ވާހަކަ ދެއްކެވީ އެ ބިލުގެ ބަހުސް މަރުހަލާގައެވެ. ސަލީމް ވިދާޅުވީ އެ ބިލު އޮތްނަމަ، ސަރުކާރު ހިންގާ ޕާޓީއަށް މެޖޯރިޓީ ވެސް ނުލިބޭނެ ކަމަށާއި މި ބިލު ވުޖޫދުވެފައި އޮތްނަމަ، ޕީޕީއެމްގެ މެމްބަރުންގެ އަދަދަކީ 33 ކަމަށެވެ.
"މި ބިލާމެދު ފުންކޮށް ވިސްނަންޖެހޭ ސަބަބަކީ މިސާލަކަށް މިބިލު ފާސްވެފައި އޮތްނަމަ، އަޅުގަނޑުމެންގެ ޕާޓީގައި ތިބޭނީ 33 މީހުން. އަޅުގަނޑުމެންނަކަށް މެޖޯރިޓީއެއް ނޯންނާނެ. އެހެންވީމަ މި ބިލު ނެތުމުގެ ސަބަބުން އަޅުގަނޑުމެންނަށް މެޖޯރިޓީ ހޯދަން ފުރުސަތު ލިބިގެން ދިޔައީ. އެހެންވީމަ މިއީ ވެސް މިބިލު ފަސްކުރާއިރުގައި ވިސްނަންޖެހޭނެ ކަންތައްތަކެއް. އަޅުގަނޑުމެން އެއް ސިސްޓަމަކަށް ވާހަކަ ދައްކައިގެން ހަގީގަތަކާ ހަމައަކަށް ނުދެވޭނެ،" ރެޑްވޭސް ސަލީމް ވިދާޅުވިއެވެ.
ސަލީމް ވިދާޅުވީ އޭނާ އިންތިހާބުވި ޕާޓީން އެހެން ޕާޓީއަކަށް ބަދަލުވެއްޖެނަމަ، ގޮނޑި ގެއްލުމަކީ މައްސަލައެއް ނޫން ކަމަށެވެ. ނަމަވެސް ޕާޓީގެ ލީޑަރަކު އެ މެމްބަރަކާމެދު ހިތްހަމަނުޖެހިގެން ގޮނޑި ގެއްލުވާލަފާނެތީ އެކަމަށް އޭނާ ކަންބޮޑުވުން ފާޅުކޮށްފައިވެ އެވެ.
މަޖިލީހުގެ މެމްބަރުންގެ ގޮނޑި ގެއްލުވާލުމުގެ ބާރު އިލެކްޝަންސް ކޮމިޝަނަށް ބިލުގައި ދީފައިވާތީ، އެކަމަށް ފާޑުވިދާޅުވެ ސަލީމް ވިދާޅުވީ ރައްޔިތުންގެ އިންތިހާބުކޮށްފައިވާ މެމްބަރުންގެ މަގާމުތަކާ ބެހޭ ގޮތުން އިލެކްޝަންސް ކޮމިޝަނަށް ބަސް ނުބުނެވޭނެ ކަމަށެވެ. މެމްބަރުންނާ ބެހޭ ގޮތުން ވާހަކަ ދެއްކުމުގެ ބާރު އެ ކޮމިޝަނަށް ނޯންނާނެ ކަމަށާއި ބިލުތައް މަޖިލީހަށް ހުށަހަޅާއިރު، މަޖިލީހުގެ މެމްބަރުންނަކީ ތަސައްރަފު ފުދޭ ބަޔަކަށް ވާންޖެހޭނެ ކަމަށް އޭނާ ވިދާޅުވިއެވެ.
"އިލެކްޝަންސް ކޮމިޝަންގައި ހުންނަ މީހަކަށް އަޅުގަނޑުމެން ދޭންވީ އަޅުގަނޑުމެންނާ ބެހޭނެ ބާރެއް. މިއީ ރައްޔިތުން ހޮވި މަގާމެއް. މި ރައްޔިތުން ހޮވި މަގާމަކަށް އިލެކްޝަންސް ކޮމިޝަނަށް ކޮން ބާރެއްތޯ އޮންނާނީ އަޅުގަނޑުމެންނާ ބެހޭނެ ގޮތުން ވާހަކަ ދައްކަން. އެއްވެސް ބާރެއް ނޯންނާނެ. އެހެންވީމަ ގާނޫނު ހަދާ މަޖިލީގުގައި ތިބޭ މީހުންނަކީ ތަސައްރަފު ފުދޭ، އަޅުގަނޑުމެން އެއާމެދު ވިސްނައި، ހަމައެކަނި އަޅުގަނޑުމެންގެ އަމިއްލަ އެދުން އިސްނުކޮށް، މުޅި ގައުމުގެ މަސްލަހަތަށް ވިސްނައިގެން ކަންކަން ކުރަންޖެހޭނެ،"
ސަލީމް ވިދާޅުވީ އެއްވެސް ސަރުކާރެއް ވައްޓާލުމަކީ ތާއީދު ކުރެވޭނެ ކަމެއް ނޫން ކަމަށާއި ނަމަވެސް ރައީސުލްޖުމްހޫރިއްޔާ ގޯސްކޮށް ކަންތައްތަކެއްކޮށްފިނަމަ މަޖިލީހުން އެމަނިކުފާނު ވަކިކުރެވޭނެ ކަމަށެވެ.
