ސްޕެނިޝް ލަލީގާގައި މި ސީޒަނުގައި މިހާތަނަށް ކުޅުނު އެއްވެސް މެޗަކުން ބަލިނުވުމުގެ ރެކޯޑު ބާސެލޯނާއިން ދަމަހައްޓައިފިއެވެ.
ބާސާއިން މި ރެކޯޑު ދެމެހެއްޓީ ރަށުން ބޭރުގައި 2-0 ގެ ނަތީޖާއަކުން ތާވަލުގެ ފުލުގައި އޮތް މަލާގާ ބަލިކޮށްގެންނެވެ. މި މެޗާއި ބާސާއިން ކުރިމަތިލިއިރު މިދިޔަ ސީޒަނުގައި މަލާގާގެ ދަނޑުގައި ކުޅުނު މެޗުން ބަލިވި ފަހުން އެ ޓީމު ލަލީގާގައި ކުޅުނު އެއްވެސް މެޗަކުން ބަލިވެފައެއް ނުވެއެވެ. މި މެޗުގައި އަމިއްލަ ސަބަބުތަކަށްޓަކައި ބާސާގެ ފޯވާޑް ލިއޮނެލް މެސީ ކުޅެފައިނުވާއިރު އަނިޔާގެ ސަބަބުން އަންދްރޭސް އިނިއެސްޓާ ވެސް ކުޅެފައެއް ނުވެއެވެ. މި ކުޅުންތެރިންގެ ބަދަލުގައި މި މެޗުގައި ފެނިގެންދިޔައީ ޒުވާން ފޯވާޑް އުސްމާން ޑެމްބޭލޭ އަދި ޕައުލީނިއޯއެވެ.
ފުރަތަމަ ހާފު ފެށިގެން ބާސާއިން ވަނީ ގިނަ ވަގުތު ބޯޅަ ކޮންޓްރޯލްކޮށް މަލާގާގެ ގޯލަށް ނުރައްކާކުރުމަށް މަސައްކަތްކޮށްފައެވެ. މަލާގާގެ ގޯލު ބާސާއިން ހުޅުވާލީ މެޗުގެ 15 ވަނަ މިނެޓުގައެވެ. ޖޯޑީ އަލްބާ ނަގައިދިން ހިތްގައިމު ހުރަހަކުން ބާސާގެ ފުރަތަމަ ލަނޑު އެ ޓީމަށް ޖަހައިދިނީ އިތުބާރު ފޯވާޑް ލުއިސް ސުއަރޭޒްއެވެ. ބާސާއިން ތަކުރާރުކޮށް އުފައްދަމުންދިޔަ ހަމަލާތަކުގެ ނަތީޖާއަކަށް ވެގެންދިޔައީ މެޗުގެ 28 ވަނަ މިނެޓުގައި ޑެމްބެލޭ ތަނަވަސްކޮށްދިން ފުރުސަތެއްގައި ކުޓީނިއޯ އެ ޓީމުގެ ލީޑު އިތުރަށް ފުޅާކޮށްދިނުމެވެ.
އޭގެ ދެ މިނެޓު ފަހުން މަލާގާއަށް އިތުރު ހުރަސްތަކެއް ކުރިމަތިވެގެންދިޔައީ އަލްބާއަށް ކުރި ނުރައްކާތެރި ފައުލަކާއި ގުޅިގެން އެ ޓީމުގެ ސެމުއެލް ގާސިއާއަށް ސީދާ ރަތް ކާޑު ދައްކައި ދަނޑުން ފޮނުވާލުމާއެކުއެވެ.
ދެ ލަނޑުގެ ލީޑެއްގައި އޮވެ ބާސާއިން ފުރަތަމަ ހާފު ނިންމާލިއިރު އެ ޓީމުން ވަނީ ފުރަތަމަ ހާފެކޭ އެއްގޮތަށް ދެވަނަ ހާފުގައި ވެސް މެޗުގެ ކޮންޓްރޯލް ދަމަހައްޓާފައެވެ. އެއް ކުޅުންތެރިޔަކު މަދުކޮށް ކުޅެމުންދިޔަ މަލާގާއަށް ބާސާގެ ގޯލާއި އަމާޒުކޮށް ނުރައްކާތެރި ހަމަލާއެއް ފޮނުވާނުލެވުނުއިރު ބާސާއަށް ވެސް އެ ޓީމަށް ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.
ބާސާގެ ކޯޗު އާނެސްޓޯ ވަލްވާޑެ ބުނީ މި މެޗުން މޮޅުވި ނަމަވެސް ލަލީގާ ލިބުނު ކަމަށް ނުނިންމާނެ ކަމަށާއި އަދިވެސް ކުޅެން ޖެހޭ މެޗުތައް އެބަހުރި ކަމަށެވެ. އޭނާ ބުނީ ކުޅުންތެރިންގެ ފަރާތުން ފެނުނީ ވަރަށް މޮޅު ކުޅުމެއް ކަމަށާއި ހާއްސަކޮށް ޑެމްބެލޭގެ ފަރާތުން ފެނުނު ކުޅުން ފާހަގަކުރެވޭ ކަމަށެވެ.
ސްޕެނިޝް ލަލީގާގެ ޕޮއިންޓް ތާވަލުގެ އެއްވަނައިގައި ކުޅުނު 28 މެޗުން ލިބުނު 72 ޕޮއިންޓާއެކު ބާސެލޯނާ އޮތްއިރު މަލާގާ އޮތީ 13 ޕޮއިންޓާއެކު ތާވަލުގެ ފުލުގައެވެ.
