ދޫކޮށްލިތާ ކުޑައިރުކޮޅެއްގެ ތެރޭގައި ނައީމާއްތަ އަނެއްކާވެސް ހައްޔަރުކޮށްފި
10 މާރިޗު 2018 | ހޮނިހިރު 02:17ހުކުރު ދުވަހުގެ މުޒާހަރާގައި ވެސް ޕެޕާ ސްޕްރޭ ބޭނުންކުރި
ނައީމާއްތަ
ހުކުރުދުވަހުގެ ރޭ ގުޅިފައިވާ ސިޔާސީ ޕާޓީތަކުން ބޭއްވި މުޒާހަރާގެ ތެރެއިން އެމްޑީޕީ އެކްޓިވިސްޓް ނައީމާ މުހައްމަދު (ނައީމާއްތަ) ހައްޔަރުކޮށްފި އެވެ.
ނައީމާއްތަ ހައްޔަރުކުރިކަން ފުލުހުން ކަށަވަރެއް ނުކޮށްދެއެވެ. ނަމަވެސް އެމްޑީޕީ ޔޫތްވިންގެ ރައީސް މީކާއިލް ނަސީމް ހުކުރު ދުވަހުގެ ފަތިހު ކުރި ޓުވީޓެއްގައި ބުނެފައި ވަނީ ހައްޔަރުން ދޫކޮށްލިތާ އިރުކޮޅެއް ނުވަނީ އަނެއްކާވެސް ހުކުރު ދުވަހުގެ ރޭގައި އޮތް މުޒާހަރާއިން ނައީމާއްތަ ހައްޔަރުކޮށްފައިވާ ކަމަށާއި ނައީމާއްތަ ކޮންމެ ދުވަހަކު ހައްޔަރުކޮށްގެން ފުލުހުންނަށް ލިބޭ އުފަލަކީ ކޮބައިކަމެއް ނޭނގޭ ކަމަށެވެ.
ނައީމާއްތަ އަނެއްކާވެސް ހައްޔަރަށް ގެންގޮސްފައި ވަނީ ބުރާސްފަތި ދުވަހުގެ ރޭގެ މުޒާހަރާއިން ހައްޔަރު ކުރުމަށްފަހު، 24 ގަޑިއިރުވުމުގެ ކުރިން ދޫކޮށްލާފައިވަނިކޮށެވެ. މުޒާހަރާތަކުން ހައްޔަރު ކުރާ މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުގެ ބަދަލުގައި ފުލުހުން އަމަލު ކުރަނީ އެ ގޮތަށެވެ.
ސިޔާސީ ލީޑަރުން މިނިވަން ކުރުމަށް ސުޕްރީމް ކޯޓުން އެކެއް ފެބްރުއަރީގައި ކުރި އަމުރު ތަންފީޒު ކުރުމަށް ގޮވާލައި މުޒާހަރާކުރަމުންދާތާ 37 ދުވަސް ވަނީ ވެފައެވެ.
