ސްޕެއިންގެ ބާސެލޯނާއާ އެއް ފެންވަރަކަށް ދިޔުމަށް އެތަކެއް އަހަރުތަކެއް ނަގާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.
މި ސީޒަނުގައި އާދަޔާ ހިލާފު މޮޅު ކުޅުމެއް ސިޓީއިން ދައްކަމުން އަންނައިރު އެކަމާއި ގުޅިގެން ގިނަ ބަޔަކު ބުނަމުން އަންނަނީ ބާސާގެ ކޯޗެއްގެ ގޮތުގައި ހުރެ ގާޑިއޯލާ ހޯދި ކާމިޔާބީ އޭނާ ސިޓީގައި ވެސް ތަކުރާރުކުރާނެ ކަމަށެވެ. ސިޓީގެ ކޯޗެއްގެ ގޮތުގައި ގާޑިއޯލާއަށް އެންމެ ފުރަތަމަ ތަށި ލިބިފައިވަނީ މިދިޔަ ހަފްތާގެ ތެރޭގައެވެ. ޕްރިމިއާ ލީގުގެ އެންމެ ކުރީގައި 16 ޕޮއިންޓުގެ ލީޑަކާއެކު ސިޓީ އޮތްއިރު އެ ޓީމު އޮތީ ޗެމްޕިއަންސް ލީގުގެ ކުއާޓާ ފައިނަލުގެ ޖާގައަކާ ވެސް ވަރަށް ކައިރީގައެވެ.
ޗެމްޕިއަންސް ލީގުގެ ދެވަނަ ބުރުގައި ސްވިޓްޒަލޭންޑުގެ އެފްސީ ބަސެލްއާ ދެކޮޅަށް ނުކުތުމަށް ސިޓީ ތައްޔާރުވަމުން އަންނައިރު ގާޑިއޯލާ ވަނީ ކުޅުންތެރިޔެއްގެ ގޮތުގައި ވެސް އަދި ކޯޗެއްގެ ގޮތުގައި ވެސް ޗެމްޕިއަންސް ލީގު އުފުލާލާފައެވެ. ސިޓީއަށް ޗެމްޕިއަންސް ލީގުގައި އެންމެ ކުރިޔަށް ދަތުރުކުރެވިފައިވަނީ 2016 ވަނަ އަހަރުގެ މުބާރާތުގައެވެ. އެ އަހަރުގެ ސެމީއިން އެ ޓީމު ކެޓީ 1-0 ގެ އެގްރިގޭޓް ނަތީޖާއަކުން ރެއާލް މެޑްރިޑް އަތުން ބަލިވެގެންނެވެ.
އުމުރުން 47 އަހަރުގެ ކޯޗު ބުނީ ސިޓީއަކީ ބާސާއާ އެއް ފެންވަރެއްގެ ޓީމެއް ކަމަށް ބުނެވޭނެ އެއްވެސް ސަބަބެއް ނެތް ކަމަށާއި ސިޓީގައި ތިބީ މުޅިން ތަފާތު ކުޅުންތެރިން ކަމަށެވެ. އޭނާ ބުނީ ބާސާގައި ތިބީ ކުރިން ވެސް ތަށި ކާމިޔާބުކޮށްފައިވާ ކުޅުންތެރިން ކަމަށާއި އެހެން ނަމަވެސް ސިޓީގައި ތިބީ އާ ކުޅުންތެރިން ކަމަށެވެ. ސިޓީއަށް އޭނާގެ އިރުޝާދުގެ ދަށުން ކާމިޔާބު ކުރެވުނީ އެންމެ ތަށްޓެއް ކަމަށާއި އެއީ ބާސާއާ އަޅާކިޔަންޖެހޭ ސަބަބެއް ކަމަށް ގަބޫލުނުކުރާ ކަމަށް ގާޑިއޯލާ ބުނެފައިވެއެވެ.
އޭނާ ބުނީ ކޮންމެ ކޯޗެއްގެ ދަށުގައި ވެސް ބާސާއިން ތަށި ހޯދަމުން އަންނަތާ 15 އަހަރުވެއްޖެ ކަމަށާއި އެފަދަ ޓީމަކާއި އެއްވަރު ކުރުމަށް އެތަކެއް އަހަރުތަކެއް ވަންދެން މަސައްކަތްކުރަން ޖެހޭނެ ކަމަށެވެ. އޭނާ ބުނީ ޗެމްޕިއަންސް ލީގަކީ ވަރަށް ތަފާތު މުބާރާތެއް ކަމަށާއި މެޗުތަކުން މޮޅުވުމަށް ވަރަށް ގިނަ ކަންކަމަށް ވިސްނަން ޖެހޭ ކަމަށެވެ.
މި ސީޒަނުގެ ޗެމްޕިއަންސް ލީގު ސިޓީއިން ކާމިޔާބުކުރާނެ ކަމަށް ގިނަ ބަޔަކު އަންނަނީ ބުނަމުންނެވެ. އެކަމާއި ގުޅިގެން ވާހަކަ ދައްކަމުން ގާޑިއޯލާ ބުނީ އެއީ ލިބޭ ފަހުރެއް ކަމަށާއި މުބާރާތް ކާމިޔާބު ނުކުރެވިއްޖެނަމަ މީހުންގެ ފަރާތުން ބޮޑު ފާޑުކިޔުންތަކެއް އަމާޒުވާނެ ކަމަށް ގަބޫލުކުރާ ކަމަށެވެ. އޭނާ ބުނީ ތާރީހުގައި ސިޓީއަށް ޗެމްޕިއަންސް ލީގު ކާމިޔާބުނުކުރެވުމަކީ ވެސް ކުރިމަތިވާ ބޮޑު ގޮންޖެހުމެއް ކަމަށާއި ކުޅުންތެރިން ވެސް ވަރަށް ބޮޑަށް ވިސްނަންޖެހޭ ކަންކަން އެބަހުރި ކަމަށެވެ.
ސިޓީއަށް މި މެޗާއި ކުރިމަތިލާއިރު ލިބިފައިވާ އެންމެ ބޮޑު ކުރިއެރުމަކީ އަނިޔާގައި ތިބި ރަހީމް ސްޓާލިން އާއި ފަނާންޑީނިއޯ ފަރިތަކުރުންތަކުގައި ބައިވެރިވާން ފަށާފައިވުމެވެ. ސިޓީ އޮތީ ޕްރިމިއާ ލީގުގައި ކުޅުނު 29 މެޗުން ލިބުނު 78 ޕޮއިންޓާއެކު ތާވަލުގެ އެންމެ ކުރީގައެވެ.
