ހަނީމޫނަށްފަހު މެސީ ބާސާއާއެކު އާ އެއްބަސްވުމެއްގައި ސޮއިކުރަނީ!

ދާދި ފަހުން ކައިވެނިކުރި ލިއޮނެލް މެސީ ހަނީމޫނަށްފަހު، ބާސެލޯނާއާއެކު އާ އެއްބަސްވުމެއްގައި ސޮއިކުރާނެކަމަށް ރިޕޯޓްތައް ބުނެފި އެވެ.

މިދިޔަ ހުކުރު ދުވަހު ކައިވެނި ކުރި މެސީ ހަނީމޫނަށްފަހު މި ހަފްތާ ތެރޭގައި އެނބުރި ސްޕެއިން އަށް އަންނާނެ ކަމަށް ބެލެވުނު ނަމަވެސް އޭނާ އަނބުރާ ސްޕެއިން އަށް އަންނާނީ މި މަހުގެ 12 ވަނަ ދުވަހު ކަމަށް ރިޕޯޓްތައް ބުނެއެވެ.

ހަނީމޫނަށް އަންހެނުން އެންޓޮނެލާ ރޮކުޒޯއާ އެކު މިވަގުތު ކެރީބިއަން އައިލޭންޑްސްގެ އެންޓިގުއާ އަދި ބާބިއުޑާ ހުރި މެސީ އަނބުރާ މި މަހުގެ 12 ވަނަ ދުވަހު ސްޕެއިން އަށް އައިސް ބާސާއާއެކު ފަރިތަކުރުން ފަށާނެ ކަމަށްވެސް ރިޕޯޓްތައް ބުނެއެވެ.

އެގޮތުން ފަރިތަކުރުންތަކާ ގުޅުމަށްފަހު މެސީ އޭނާގެ އެއްބަސްވުން 2021 ވަނަ އަހަރުގެ ނިޔަލަށް އާކުރާނެ ކަމަށާއި، ޓެކްސް ނުލާ އަހަރެއްގެ މައްޗަށް އޭނާ އަށް 22 މިލިއަން ޔޫރޯ އާ އެއްބަސްވުމުގެ ދަށުން ލިބޭނެ ކަމަށް ރިޕޯޓްތައް ބުނެއެވެ.

މެސީގެ އެއްބަސްވުމާ ގުޅިގެން ބާސާގެ ރައީސް ޖޯސެފް މާރިއޯ ބާޓަމައު ދާދި ފަހުން ވިދާޅުވީ، މެސީގެ އެއްބަސްވުމާ ގުޅިގެން ކްލަބާއި މެސީއާ ދެމެދު ހިޔާލުތަފާތުވުންތަކެއް ހުރި ނަމަވެސް އެކަން ވަރަށް ގާތުން ބަލަމުން އަންނަ ކަމަށާއި، އާ އެއްބަސްވުމުގެ ކަންތައް ވަރަށް އަވަހަށް ނިމޭނެކަމަށެވެ.

އެގޮތުން އޭނާ ވިދާޅުވީ މެސީގެ ބައްޕަ އާއި އެކު ގަވައިދުން ބައްދަލުވުންތަކެއް ބާއްވަމުން އައިސް ދެފަރާތުން ބޭނުންވާގޮތަށް އެއްބަސްވުން ނިންމާލެވޭނެ ކަމަށާއި، މި އެއްބަސްވުމާއިއެކު އަންނަ ސީޒަނުގައި ޓީމުގެ އާ ކޯޗް ވަލްވޭޑޭއަށް ކާމިޔާބީތަށް ހޯދަން ބޮޑު ހިތްވަރެއް ލިބިގެންދާނެ ކަމަށެވެ.

އުމުރުން 30 އަހަރުގެ މެސީ މިހާތަނަށް ބާސާގައި 13 ސީޒަން ހޭދަކޮށްފައި ވާއިރު، އޭނާ ވަނީ އެކުލަބަށް 507 ލަނޑު ކާމިޔާބުކޮށްދީފައެވެ.