ބޮލީވުޑްގެ ކުރީގެ ބަތަލާ ޝައްމީ މަރުވެއްޖެ
އޭނާ މަރުވީ މުސްކުޅި ބަލީގައި
ޝައްމީގެ ނަމުން މަޝްހޫރުވެފައިވާ ނަރުގިސް ރަބާދި
ބޮލީވުޑްގެ ކުރީގެ ބަތަލާ ނަރްގިސް ރަބާދީ (ޝައްމީ) އަންގާރަދުވަހު މަރުވެއްޖެއެވެ.
އޭނާ މަރުވިއިރު އުމުރަކީ 89 އަހަރެވެ.
ނަރްގިސް މަރުވީ މުސްކުޅި ބަލީގައި ގިނަދުވަހު އުޅުމަށް ފަހުގައެވެ.
ނަރްގިސް ވަނީ 100 އަށް ވުރެ ގިނަ ފިލްމުތަކުން ފެނިގެން ގޮސްފައެވެ. އޭނާގެ މަރާ ގުޅިގެން ގިނަ ފަންނާނުންތަކެއް ހިތާމަ ފާޅުކުރަމުންދާއިރު މަޝްހޫރު އެކްޓަރ އަމީތާބް ބައްޗަން ބުނެފައި ވަނީ ނަރްގިސްއަކީ އާއިލީ ރަހުމަތްތެރިއެއް ކަމަށެވެ.
ގިނަ ފިލްމްތަކެއްގައި ހަރަކާތްތެރިވެފައިވާ ޝައްމީ
އޭނާ ކުޅެފައިވާ ފިލްމުތަކުގެ ތެރެއިން "ޑޯލީ"، "އިއްތިފާގު" އަދި "އިޝާރާ" ފާހަގަކޮށްލެވެއެވެ. އަދި "ހަމް" އާއި "ކޫލީ ނަމްބަރު 1"، "ހަމް ސާތު ސާތު ހޭ"، "ގޯޕީ ކިޝަން" އަދި "އިމްތިހާން" ފަދަ ފިލްމްތަކުގައި ވެސް އޭނާ މުހިންމު ބައިތަކެއް އަދާކޮށްފައި ވެއެވެ. އޭނާ އެންމެ ފަހުން ފެނިގެން ގޮސްފައި ވަނީ 2013 ވަނަ އަހަރު ރިލީޒްކުރި ފަރާ ޚާން ލީޑް ރޯލުން ފެނިގެން ދިޔަ ކޮމެޑީ ފިލްމެއް ކަމަށްވާ "ސީރީން ފަރުހާދު ކީ ނިކަލް ޕަޅީ" އިންނެވެ.
ފިލްމުތަކުގެ އިތުރުން ނަރްގިސް ވަނީ ޓީވީ ސީރީޒްތަކުން ވެސް ފެނިގެން ގޮސްފައެވެ. އޭގެ ތެރެއިން "ކަބީ ޔޭ ކަބީ ވޯ" އަދި "ޗައްކަރު" އެއީ ބެލުންތެރިންގެ ތަރުހީބު ލިބުނު ޓީވީ ސީރީޒްތަކެވެ.
