އޭއެފްސީ ކަޕްގައި ބަންގްލަދޭޝްގެ ޑާކާ އަބްހާނީއާ ދެކޮޅަށް ނުކުންނާނީ އިތުބާރާއެކު ކަމަށް ނިއު ރޭޑިއަންޓް ސްޕޯޓްސް ކްލަބްގެ ކޯޗު އޮސްކާ ބްރޫޒޯން ބުނެފިއެވެ.

ބަންގްލަދޭޝްގެ ނޫސްވެރިންނާއި ވާހަކަ ދައްކަމުން އޮސްކާ ބުނެފައިވަނީ މެޗާއި ކުރިމަތިލާނީ އިތުބާރާއެކު ކަމަށާއި ކުޅެން ބޭނުންވާ ގޭމް ކުޅެވޭނެ ކަމުގެ ޔަގީންކަން އެބައޮތް ކަމަށެވެ. ހަމައެހެންމެ މިދިޔަ އަހަރު ތިން ތަށި ކާމިޔާބުކުރީ 17 މެޗު ޖެހިޖެހިގެން ކާމިޔާބު ކުރުމަށްފަހު ކަމަށާއި މި ސީޒަން ފެށިގެން ވެސް ޓީސީ އަދި މާޒިޔާއާ ދެކޮޅަށް ކުޅެ އެ މެޗުތައް ކާމިޔާބުކުރެވިފައިވުމަކީ ލިބޭ އިތުރު އިތުބާރެއް ކަމަށެވެ. އަދި މި މެޗަށް ނުކުންނާނީ ޖެހިޖެހިގެން 20 މެޗު ކާމިޔާބުކުރުމުގެ އުއްމީދުގައި ކަމަށް ވެސް އޮސްކާ ބުނެފައިވެއެވެ.

އޮސްކާ ބުނީ މި މެޗަކީ ވަރަށް އުނދަގޫ މެޗަކަށް ވާނެ މެޗެއް ކަމަށާއި ގައުމުގައި ކުޅޭ މުބާރާތްތަކަށް ވުރެ ސަރަހައްދީ މުބާރާތްތައް އުނދަގޫ ވާނެ ކަމަށެވެ. އޭނާ ބުނީ އަބްހާނީގެ ކުރިޔަށް ކުޅެމުން އަންނަ ދެ ނައިޖީރިއާ ކުޅުންތެރިން ތިއްބަސް ނިއުއަށް ވުރެ އެ ޓީމު ވަރުގަދަ ކަމަށް ގަބޫލުނުކުރާ ކަމަށާއި ވަކި ގައުމެއްގެ ކުޅުންތެރިންތަކެއް ތިބުމަކީ ޓީމެއް ވަރުގަދަވާން ޖެހޭ ސަބަބެއް ނޫން ކަމަށް އޮސްކާ ބުނެފައިވެއެވެ. އޭނާ ބުނީ އެ ދެ ކުޅުންތެރިން ބޮޑަށް ފަރިތަވާނީ ފިޒިކަލް ގޭމެއް ކުޅެން ކަމަށް ގަބޫލުކުރެވޭ ކަމަށާއި އެހެން ނަމަވެސް ނިއުއިން މަސައްކަތްކުރަނީ ރީތި ގޭމެއް ކުޅެން ކަމަށެވެ.

މި ނޫސްވެރިންގެ ބައްދަލުވުމުގައި އޮސްކާ ބުނީ ނިއުއިން މަސައްކަތްކުރާނީ މުޅި މެޗު ވެސް ކޮންޓްރޯލްކޮށް ޕޮޒިޝަން ދެމެހެއްޓުމަށް ކަމަށެވެ. އަދި ދަނޑުގެ ވިނަގަނޑުގެ ހާލަތާއި މެދު ވިސްނަން ޖެހޭ ކަމަށާއި ނިއުއިން ރަނގަޅަށް ފަރިތަކުރުންތައް ކުރިޔަށް ގެންގޮސްފައިވާ ކަމަށެވެ.

އަބްހާނީއިން ވަނީ މީގެކުރިން ރާއްޖޭގެ ދެ ޓީމު ކަމަށްވާ މާޒިޔާ ސްޕޯޓްސް އެންޑް ރެކްރިއޭޝަން އަދި ޓީސީ ސްޕޯޓްސް ކްލަބާއި ދެކޮޅަށް މެޗުތައް ކުޅެފައެވެ. މިހާތަނަށް ރާއްޖޭގެ އެއްވެސް ޓީމަކާއި ދެކޮޅަށް ކުޅުނު މެޗުން އަބްހާނީ މޮޅުވެފައިނުވުމަކީ އޮސްކާއަށް ލިބޭނެ ހިތްހަމަޖެހުމެކެވެ.

މި ދެ ޓީމު ބައްދަލުކުރާ އޭއެފްސީ ކަޕްގެ މެޗު ކުޅުމަށް ހަމަޖެހިފައިވަނީ ބުދަ ދުވަހުގެ މެންދުރުފަހު 15:15 ގައެވެ.