ނިއުރޭޑިއަންޓްގެ އާ ކޯޗަކަށް ސްޕެއިންގެ އޮސްކާ ބުރުޒޮން ބަރޭރާ

ނިއުރޭޑިއަންޓް ސްޕޯޓްސް ކުލަބުގެ ހުސްވެފައިވާ ކޯޗް ކަމުގެ މަގާމަށް ސްޕެއިންގެ އޮސްކާ ބުރުޒޮން ބަރޭރާ ހަމަޖައްސައިފިއެވެ.

ޔޫއެފާ ހެޑް ކޯޗިން ޕްރޯ ލައިސަންސް އޮންނަ އުމުރުން 40 އަހަރުގެ އޮސްކާ ވަނީ މިއަހަރު އިންޑިއާގެ މުމްބާއީ އެފްސީއަށް އިރުޝާދު ދީފައެވެ. މިއަހަރުގެ މާޗް މަހު މުމްބާއީ އެފްސީ އާއި ހަވާލުވި އޮސްކާއަށް އެޓީމާއެކު އިކަޝީގެންވާ ވަގުތު ނުލިބުމުގެ ސަބަބުން މާ އެދެވޭ ނަތީޖާއެއް ނެރެވިފައެއް ނުވެއެވެ. މުމްބާއީ އެފްސީ އާއި ހަވާލުވުމުގެ ކުރިން އޭނާ ހުރީ ސްޕެއިންގެ މަޔޯކާގެ އެސިސްޓެންޓް ކޯޗުކަމުގެ މަގާމުގައެވެ.

އޮސްކާ ކޯޗިން ކެރިއަރު ފަށާފައިވަނީ 2009 ވަނަ އަހަރު ސްޕެއިންގެ ސެލްޓާ ވީގޯގެ ޔޫތް ޓީމުންނެވެ. އޭގެފަހުން 2011 އިން 2013 އަށް އޭނާ މަސައްކަތް ކޮށްފައިވަނީ އިންޑިއާގެ އެކަޑަމީއެއް ކަމަށްވާ އެސްޕީޓީ ސްޕޯޓްސް އޭޝިއާގެ ހެޑް ކޯޗަކަށެވެ. އެއަށްފަހު އޭނާ ސީނިއާ ކޯޗިން ކެރިއަރު ފެށީ 2013 ވަނަ އަހަރު އިންޑިއަން އައި ލީގުގެ ސްޕޯޓިން ކްލަބް ޑި ގޯއާ އިންނެވެ. އެޓީމުގައި ދެ އަހަރު މަސައްކަތް ކުރުމަށްފަހު އޭނާ ބަދަލުވީ އިންޑިއަން ސުޕާ ލީގުގެ މުމްބާއީ ސިޓީ އެފްސީގެ އެސިސްޓަންޓް ކޯޗަކަށެވެ. އެއަށްފަހު ފާއިތުވި އަހަރު ސްޕެއިންގެ ދެވަނަ ޑިވިޝަނުގެ މަޔޯކާގައި މަސައްކަތް ކުރުމަށްފަހު އޭނާ ދެވަނަ ފަހަރަށް މުމްބާއީ ސިޓީއަށް ބަދަލުވީ މިއަހަރުގެ މާޗު މަހުގައެވެ.

ނިއުރޭޑިއަންޓްގެ ކޯޗުކަމުގެ މަގާމު ހުސްވީ އެމަގާމުގައި ހުރި ޕޯޗުގަލްގެ ބެނާޑޯ ޓަވަރޭޒް މަގާމުން ދުރު ކުރުމުންނެވެ. އޭނާ މަގާމުން ދުރުކޮށްފައިވަނީ މީގެ ދެދުވަސް ކުރިންނެވެ. ނިއުއިން މައުލޫމާތު ދީފައިވާ ގޮތުގައި އޭނާ މަގާމުން ދުރުކޮށްފައިވަނީ ނިއުގެ މެނޭޖްމަންޓުން ބޭނުންވާފަދަ ޕާފޯމެންސްއެއް އޭނާގެ ފަރާތުން ނުފެންނާތީއެވެ.

ބޮޑެތި ޙަރަދު ތަކަކާއި އެކު ނިއުއިން މިސީޒަނަށް ކުރިމަތި ލާފައިވަނީ ސީޒަނުގެ ހުރިހާ ތައްޓެއް ކާމިޔާބުކުރުމަށް އަމާޒު ހިފައިގެންނެވެ. މާލެ ލީގުގައި ނިއުއަށް ބާކީ 4 މެޗު އޮތްއިރު އެޓީމު މިވަގުތު އޮތީ ތާވަލުގެ 2 ވަނަ މަގާމުގައެވެ. ކޯޗް ޓަވަރޭޒްއަށް ބޮޑަށް ފާޑުކިއުންތައް އަމާޒުވީ މާލެ ލީގުގެ ފުރަތަމަ ބުރުގެ ފަހު މެޗުން ގްރީން ސްޓްރީޓް އަތުން ނިއު ބަލިވި މެޗަށްފަހުގައެވެ. އެހިސާބުން ފެށިގެން އޭނާ މަގާމުން ދުރުކޮށް އާ ކޯޗަކު ގެންނަން އުޅޭކަމުގެ އަޑު ވަނީ ފެތުރިގެން ގޮސްފައެވެ.

ނިއުއާއި އަލަށް ހަވާލުވާ ސްޕެއިންގެ އޮސްކާ ބުރުޒޮން ހޯމަ ދުވަހު މާލެ އައިސްފައި ވާއިރު، މައުލޫމާތު ލިބޭގޮތުގައި އަންނަ ހަފްތާގެ އަންގާރަ ދުވަހު ހަވީރު މާލެ ލީގުގައި ޔުނައިޓެޑް ވިކްޓްރީ އާއި ދެކޮޅަށް ނިއު ކުޅޭމެޗުގައި އޭނާ ޓީމަށް އިރުޝާދު ދޭނެއެވެ.