ސާފް ޗެމްޕިއަންޝިޕްގައި ކުޅުމާ މެދު ދަގަނޑޭ ގޮތެއް ނުނިންމާ

މިއަހަރުގެ ސެޕްޓެމްބަރު މަހުގެ ހަތަރުވަނަ ދުވަހު ބަންގްލަދޭޝްގައި ފެށުމަށް ހަމަޖެހިފައިވާ ސާފް ޗެމްޕިންޝިޕްގައި ކުޅުމާ މެދު ގޮތެއް ނުނިންމާ ކަމަށް ރާއްޖޭގެ ގައުމީ ޓީމުގެ ކެޕްޓަން އަލީ އަޝްފާގު (ދަގަނޑޭ) ބުނެފިއެވެ.

އޭއެފްސީ ކަޕްގައި ބަންގްލަދޭޝްގެ ޑާކާ އަބްހާނީއާ ދެކޮޅަށް ކުޅުމަށް ނިއު ރޭޑިއަންޓް ސްޕޯޓްސް ކްލަބާއެކު މިވަގުތު ބަންގްލަދޭޝްގައި ހުރި ދަގަނޑޭ އެ ގައުމުގެ މީޑިއާތަކަށް ދިން އިންޓަވިއުއެއްގައި ބުނެފައިވަނީ އޭޝިއަން ކަޕް ކޮލިފައިންގައި ބޫޓާންއާ ދެކޮޅަށް ކުޅޭ މެޗަކީ އޭނާ ގައުމީ ޓީމަށް ކުޅެދޭ އެންމެ ފަހު މެޗަށް ވުމަކީ އެކަށީގެންވާ ކަމެއް ކަމަށާއި ޑާކާގައި މިއަހަރު އޮންނަ ސާފް ޗެމްޕިއަންޝިޕަށް ރާއްޖޭގެ ގައުމީ ޓީމާއެކު އެ ގައުމަށް ދިޔުމާ މެދު އަދި ގޮތެއް ނުނިންމާ ކަމަށެވެ.

އަޝްފާގް ބުނެފައިވަނީ ބަންގްލަދޭޝްގެ ފުޓްބޯޅަ މިވަގުތު އޮތް ހާލަތާމެދު އޭނާއަށް މާ ރަނގަޅަށް މައުލޫމާތު ލިބިފައިނުވާ ކަމަށެވެ. އުމުރުން 33 އަހަރުގައި ވެސް ދައްކަމުންދާ މޮޅު ކުޅުމާއި އަދި އެއްވަރެއްގައި ކުޅުމުގެ ފެންވަރު ހިފެހެއްޓުމުގެ ސިއްރަކީ ރަނގަޅު ޑައިޓެއް ގެންގުޅެ ބުރަކޮށް މަސައްކަތްކޮށް ޑިސިޕްލިން ދެމެހެއްޓުން ކަމަށެވެ.

ބަންގްލަދޭޝްގެ ޓީމަކާ ދެކޮޅަށް ދަގަނޑޭ ނުކުންނައިރު އޭނާއަކީ އެ ގައުމާ ދެކޮޅަށް މޮޅު ކުޅުންތަކެއް ފާއިތުވެދިޔަ މެޗުތަކުގައި ދައްކާފައިވާ ކުޅުންތެރިޔެކެވެ. އެގޮތުން 2011 ވަނަ އަހަރުގެ ސާފް ޗެމްޕިއަންޝިޕާއި 2015 ވަނަ އަހަރުގެ ސާފް ޗެމްޕިއަންޝިޕްގެ ގްރޫޕް ސްޓޭޖުގައި ބަންގްލަދޭޝް އަތުން 3-1 ގެ ނަތީޖާއަކުން ރާއްޖެ މޮޅުވި މެޗުތަކުގައި އޭނާ ވަނީ އެ ޓީމުގެ ކޮޅަށް ލަނޑު ޖަހާފައެވެ.

ދަގަނޑޭ ވަނީ ރާއްޖޭގެ ގައުމީ ޓީމު 2008، 2009، 2011، 2013 އަދި 2015 ވަނަ އަހަރުގެ ސާފް ޗެމްޕިއަންޝިޕްގައި ވެސް ތަމްސީލު ކޮށްފައެވެ. ރާއްޖޭގެ ގައުމީ ޓީމުން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބު ކުރިއިރު އެ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދީ ދަގަނޑޭއެވެ. ހަމައެހެންމެ 20 ލަނޑާއެކު ސާފް ޗެމްޕިއަންޝިޕްގެ ތާރީހުގައި ވެސް އެންމެ ގިނަ ލަނޑު ޖެހި ކުޅުންތެރިޔަކީ ދަގަނޑޭއެވެ.