އިރުމަތީ ޣޫތާގެ ބައެއް ބައްޝާރުގެ ފައުޖުތަކުގެ ބާރުގެ ދަށަށް ގެންގޮސްފި

އިދިކޮޅު ހަނގުރާމަވެރިންގެ ބާރުގެ ދަށުގައިވާ ސީރިއާގެ އިރުމަތީ ޣޫތާގެ ބައެއް، ސީރިއާގެ ރައީސް ބައްޝާރުލް އަސަދުގެ ފައުޖުތަކުގެ ބާރުގެ ދަށަށް ގެންގޮސްފި އެވެ.

ސީރިއާގެ މަޝްރަޚަށް ފާރަވެރިވާ ސީރިއަން އޮބްޒަވޭޓްރީ ފޯ ހިއުމަން ރައިޓްސް އިން ހޮނިހިރު ދުވަހު ބުނީ، އިރުމަތީ ޣޫތާގައި ސީރިއާގެ އަސްކަރީ ފައުޖުތަކާއި ބައްޝާރަށް ވާގިވެރިވާ ބޭރުގެ ފައުޖުތަކުން އިދިކޮޅު ހަނގުރާމަވެރިންނާއި ދެކޮޅަށް ދެމުންދާ ހަމަލާތަކުގައި އިރުމަތީ ޣޫތާގެ 10 އިންސައްތަ ސަރުކާރުގެ ފައުޖުތަކުގެ ބާރުގެ ދަށަށް ގެންގޮސްފައިވާ ކަމަށެވެ.

ސީރިއާގެ ވެރިރަށް ދިމިޝްޤުގެ ކައިރީގައި އޮންނަ އިރުމަތީ ޣޫތާގެ އަލް-ޝައިފޫނިޔާ ސަރަހައްދުގެ ފުރިހަމަ ކޮންޓްރޯލް ސަރުކާރުގެ ފައުޖުތަކުން ހޮނިހިރު ދުވަހު ނަގާފައިވާ ކަމަށް ސީރިއަން އޮބްޒަވޭޓަރީ އިން ބުނެއެވެ.

އިދިކޮޅު ހަނގުރާމަވެރިންގެ ތަރުޖަމާނަކު ވަނީ، ސަރުކާރުގެ ފައުޖުތަކުން އަލް-ރަޙްޔާން ހިފުމަށް ކުރި މަސައްކަތް ނާކާމިޔާބުވެފައިވާކަން ހާމަކޮށްފައެވެ. އެހެން ނަމަވެސް އަލް-ޝައިފޫނިޔާގެ މައުލޫމާތު އޭނާ ހާމަކޮށްފައެއްނުވެއެވެ.

ސީރިއާގެ ރައީސް ބައްޝާރުލް އަސަދަށް ވާގިވެރިވާ ގުޅިފައިވާ ފައުޖުތަކުން އަލް-ޝައިފޫނިޔާ ހިފުމަށް މަސައްކަތް ކުރަމުންދާކަން އެ ފައުޖުތަކުގެ ކޮމާންޑަރަކު ކަށަވަރު ކޮށްދީފައިވެއެވެ. އެހެން ނަމަވެސް އެ އޮޕަރޭޝަނާއި ގުޅޭ އިތުރު ތަފްޞީލް ދީފައެއްނުވެއެވެ.

އިދިކޮޅު ފަރާތްތަކުގެ ބާރުގެ ދަށުން އިރުމަތީ ޣޫތާ ހިފުމަށް ސީރިއާގެ ރައީސް ބައްޝާރުލް އަސަދަށް ވާގިވެރިވާ ފައުޖުތަކުން ފަށާފައިވާ އޮޕަރޭޝަނުގައި މިހާތަނަށް 674 މީހަކު މަރުވެފައިވާއިރު، އޭގެ ތެރޭގައި 150 އެއްހާ ކުޑަކުދިން ހިމެނޭ ކަމަށް ރިޕޯޓްތައް ބުނެއެވެ.

ސީރިއާގެ އިރުމަތީ ޣޫތާގެ ހާލަތާއިމެދު ބައިނަލްއަޤްވާމީ މުޖުތަމައު އިން ކަންބޮޑުވުން ފާޅު ކުރަމުންދާއިރު، ކުރިމަތިލުންތަކުގެ ސަބަބުން ޣޫތާގައި ހާލުގައި ޖެހިފައިވާ އާއްމުންނަށް އެހީތެރިކަން ފޯރުކޮށްދިނުމަށް މަސައްކަތް ކުރާ ފަރާތްތަކުގެ މަސައްކަތް ކުރިއަށް ގެންދިޔުމަށް ހުރަސްތަކާއި ކުރިމަތިލާން ވަނީ ޖެހިފައެވެ.

ހަތަރު ލައްކަ އެއްހާ މީހުން ދިރިއުޅޭ އިރުމަތީ ޣޫތާގެ އާބާދީގެ ބޮޑު ބަޔަކީ ސީރިއާގެ ދާޚިލީ ހަނގުރާމައިގެ ސަބަބުން އެހެން ސަރަހައްދުތައް ދޫކޮށް އެސަހަރަށް ހިޖުރަކޮށްފައިވާ ފަރާތްތަކެވެ.

ސީރިއާގެ ރައީސް ބައްޝާރުލް އަސަދުގެ ސަރުކާރާއި ދެކޮޅު ހަނގުރާމަވެރި ގްރޫޕްތަކުން ކޮންޓްރޯލް ކުރާ އިރުމަތީ ޣޫތާ އަކީ ވެރިރަށް ދިމިޝްޤުގެ ރަށް ބޭރުގައި އޮންނަ ސަހަރެކެވެ. ގާތްގަނޑަކަށް ހަތަރު ލައްކައެއްހާ މީހުން ދިރިއުޅޭ އިރުމަތީ ޣޫތާ އިދިކޮޅު ހަނގުރާމަވެރިންގެ ބާރުގެ ދަށަށް ދިޔުމާއެކު، ސީރިއާގެ ސިފައިން ވަނީ 2013 ވަނަ އަހަރުން ފެށިގެން އެސަހަރު ވަށާލައި، ހިސާރުކޮށްފައެވެ. ބައްޝާރުގެ ފައުޖުތަކުގެ ހަނގުރާމަވެރިން އިރުމަތީ ޣޫތާ އަށް ވަދެވެން އޮންނަ މަގުތައް ބަންދުކުރުމާއި ގުޅިގެން އެސަހަރުގެ ތެރެއަށް ކާބޯތަކެތި ފޯރުކޮށްދިނުމުގައި ދަތިތަކާއި ކުރިމަތިލާން ޖެހިފައިވާއިރު، އެކަމާއި ގުޅިގެން އެސަރަހައްދުގެ ތަކެތީގެ އަގު ބޮޑުވެ، އިންފްލޭޝަން ރޭޓް ވަނީ އިންތިހާއަށް މައްޗަށް ގޮސްފައެވެ.