ކަނޑުމަހުގެ އަގު ރާއްޖޭން ބޭރުގެ ބާޒާރުގައި ދަށްވެފައި ވާކަމަށް ތަފާސް ހިސާބުތަކުން ދައްކައިފިއެވެ.
މިނިސްޓްރީ އޮފް ފިޝަރީޒް އެންޑް އެގްރިކަލްޗަރގެ ފަރާތުން ރާއްޖެ އާއި ރާއްޖޭއިން ބޭރުގެ ބާޒާރުގައި ކަނޑު މަހުގެ އަގު ހުރި މިންވަރު ހާމަކޮށްދިނުމަށް ހޯމަ ދުވަހު ނެރުނު ރިޕޯޓުގައި ބަޔާންކޮށްފައިވާގޮތުން، ޖަޕާނުގެ މެޓްރޮޕޮލިޓަން ނީލަން ބާޒާރުގައި ލޯބޮޑު ކަންނެލި ކިލޯއެއް މިދިޔަ ހަފްތާގައި 249.74 ރުފިޔާއަށް ވިއްކަން ހުރިއިރު، މި ހަފްތާގައި ލޯބޮޑު ކަންނެލި ކިލޯއެއް ވިއްކަން ހުރީ 191.57 ރުފިޔާއަށެވެ.
ތައިލެންޑްގައި ކަޅުބިލަމަހުގެ ޓަނަކަށް މިދިޔަ މަހު 35،466 ރުފިޔާ ލިބުނުއިރު މި މަހު ކަޅުބިލަ މަހުގެ ޓަނެއްގެ އަގުވަނީ 27،756 ރުފިޔާ އަށް ދަށްވެފައެވެ. އެހެންނަމަވެސް ސްޕެއިންގެ މާރކަމެޑްރިޑް މާރުކޭޓުގައި ފިނިކުރި ރީދޫ އުރަހަ ކަންނެލި ކިލޯއެއް މިދިޔަ ހަފްތާގައިވެސް އަދި މި ހަފްތާގައިވެސް ވިއްކަމުންދަނީ 155.64 ރުފިޔާއަށެވެ.
ރާއްޖޭގެ މަސްގަންނަ ކުންފުނިތަކުން ނިމިގެން ދިޔަ ހަފްތާގައި ފިނިކުރި ކަޅުބިލަ މަސް ކިލޯއެއް އެވްރެޖްކޮށް 20 ރުފިޔާއަށް ގަންނަމުންދިޔައިރު، ފިނި ނުކުރާ ކަޅުބިލަމަސް ކިލޯއެއް ގަންނަމުން ދިޔައީ 18 ރުފިޔާ އަށެވެ. ކުންފުނިތަކުން ރީދޫ އުރަހަ ކަންނެލި ގަންނަ އަގަށް މި ހަފްތާ އަދި މިދިޔަ ހަފްތާގައިވެސް ބަދަލު އައިސްފައެއް ނުވެއެވެ.
ފާއިތުވި ހަފްތާގައި އެވްރެޖްކޮށް މާލޭގެ މާރުކޭޓުގައި މަސް ވިއްކަން ހުރި އަގުތަކަށް ބަލާއިރު މަހުގެ ކިލޯއެއް ހުރި މިންވަރަކީ:
- ގޮދާ – 50.00 ރުފިޔާ
- ކަނޑުމަސް – 37.50 ރުފިޔާ
- ކަންނެލި – 35 ރުފިޔާ
- ބޮޑުކަންނެލި – 70 ރުފިޔާ
- ލައްޓި – 40 ރުފިޔާ
- ގިއުޅު – 55 ރުފިޔާ
- ރާގޮނޑި – 20 ރުފިޔާ
- މާނިޔަ މަސް – 42 ރުފިޔާ
- ރަތްމަސް – 60 ރުފިޔާ
- ރިތްމަސް – 20 ރުފިޔާ
- ވަޅޯމަސް – 95 ރުފިޔާ
- ލޮނުމަސް – 105 ރުފިޔާ
- ހިކިމަސް – 82 ރުފިޔާ
މި ދުވަސްވަރަކީ ރާއްޖެއަށް މަސްވެރިކަން ރަނގަޅު ދުވަސްވަރެކެވެ. އެހެންނަމަވެސް ގިނަ އަދަދަކަށް މަސް ބާނަމުންދާ މިދުވަސްވަރު، މަސް ކުންފުނިތަކުން މަސް ނުކިރާކަމަށްބުނެ ބައެއް މަސްވެރިން ދަނީ ޝަކުވާ ކުރަމުންނެވެ. އަހަރުގެ ބޮޑުބައިގައި މަސްވެރިކަން ހާނަރުކޮށް އޮތުމަށްފަހު މަސްވެރިކަން ތިޔާގިވި ދުވަސްވަރު ބާނާ މަސްކޮޅު ނުކިރި ނުއަގުގައި ވިއްކަން ޖެހުމުން މަސްވެރިން ތިބީ ވަރަށް ބޮޑަށް ކަންބޮޑުވެފައެވެ.
