ވެނެޒުއޭލާގެ އިންތިޚާބު ފަސްކޮށްފި
އޭޕްރީލް 22 ގައި އެގައުމުގައި ބާއްވަން ތާވަލު ކުރި އިންތިޚާބު ފަސްކުރީ މެއި 20 އަށް
ދެވަނަ ދައުރަކަށްވެސް ވާދަކުރައްވާ ވެނެޒުއޭލާގެ މިހާރުގެ ރައީސް ނިކޮލަސް މަޑޫރޯ
މިއަންނަ އޭޕްރީލް 22 ގައި ވެނެޒުއޭލާގައި ބާއްވަން ތާވަލު ކުރި އިންތިޚާބު އެގައުމުގެ އިންތިޚާބާ ބެހޭ "ނެޝެނަލް އިލެކްޓޯރަލް ކައުންސިލް (ސީއެންއީ)" އިން ފަސްކޮށްފިއެވެ.
މިހާރު އިންތިޚާބު ބާއްވަން ތާވަލު ކޮށްފައި ވަނީ މެއި 20 ގައެވެ. ރިޕޯޓުތައް ބުނާގޮތުން އިންތިޚާބު ފަސްކޮށްފައި ވަނީ ސަރުކާރާއި އަދި ބައެއް ސަރުކާރާ އިދިކޮޅު ޕާޓީތަކާ އެކު ކުރެވުނު މަޝްވަރާތަކަށް ފަހު އެއްބަސްވުމަކަށް އާދެވުމުންނެވެ.
ވެނެޒުއޭލާގެ މިހާރުގެ ރައީސް ނިކޮލަސް މަޑޫރޯ ވަނީ އެގައުމުގެ ބާއްވާ ރިޔާސީ އިންތިޚާބުގައި ބައިވެރިވެވަޑައިގަންނަވަން އިންތިޚާބަށް ރަޖިސްޓްރީވެސް ކުރައްވާފައެވެ.
ވެނެޒުއޭލާ އިންތިޚާބު އޮންނަން ޖެހޭ ތާރީޚަށް ވުރެ އަވަހަށް އިންތިޚާބު ބާއްވާއިރު، އާންމުކޮށް ވެނެޒުއޭލާގައި އިންތިޚާބު ބާއްވަނީ ޑިސެމްބަރު މަހުއެވެ. އެހެން ނަމަވެސް ނިމިދިޔަ ފެބްރުއަރީގައި ވެނެޒުއޭލާގެ އިންތިޚާބާ ބެހޭ އިދާރާ އިން ބުނެފައި ވަނީ އިންތިޚާބު އަވަސްކޮށްފައިވާ ކަމަށާއި އިންތިޚާބު އޮންނާނީ 22 އޭޕްރީލް ގައި ކަމަށެވެ.
ވެނެޒުއޭލާގެ ރިޔާސީ އިންތިޚާބު އަވަސް ކުރުމުން ބައިނަލްއަގުވާމީ ގޮތުން އެގައުމަށް ދަނީ ފާޑުކިޔުން އަމާޒުވަމުންނެވެ. އެގޮތުން އާޖެންޓީނާ، ބްރެޒިލް، ޗިލީ، ކޮލަމްބިއާ، މެކްސިކޯ އަދި ޕެރޫ އިން ވަނީ އިންތިޚާބުގެ ނަތީޖާ ގަބޫލް ނުކުރާނެ ކަމަށް ބުނެފަ އެވެ. އެމެރިކާ އިން ވަނީ އިންތިޚާބު އަވަސް ކުރާ ނަމަ ވެނެޒުއެލާއާ ދެކޮޅަށް އިގްތިސާދީ ދަތިކުރުމުގެ ފިޔަވަޅުތައް އަޅާނެކަމުގެ އިންޒާރުވެސް ދީފައެވެ.
ވެނެޒުއޭލާގެ ސިޔާސީ މަސްރަހު ވަރަށް ބޮޑަށް ހަލަބޮލިވެފައިވާ އިރު އެގައުމުގެ އިގްތިސާދީ ހާލަތު ދަނީ އެއްދުވަހުން އަނެއް ދުވަހަށް ދަށްވަމުންނެވެ. ސަރުކާރަށް ފާޑުކިޔާ ފަރާތްތަކުން ބުނަމުންދަނީ އިންތިޚާބު އަވަސްކުރުމުގައި ސަރުކާރުގެ އެއްވެސް އިޚްލާސްތެރިކަމެއް ނެތް ކަމަށެވެ.
