އަމީތު ފުލުސް އޮފީހަށް ހާޒިރުކޮށްފި
2 މާރިޗު 2018 | ހުކުރު 00:04ތަހުގީގު ކުރަނީ ސަސްޕެންޑް ކުރެވިފައިވާ ޤާނޫނެއްގެ ދަށުން
ފުލުހުން އަމީތު ގެންދަނީ
ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވަކީލަކާއެކު ފުލުހުންގެ އިދާރާއަށް ބުރާސްފަތި ދުވަހުގެރޭ ހާޒިރުކޮށްފިއެވެ.
ބުރާސްފަތި ދުވަހުގެރޭ 10:00 އިރު ފުލުސް އޮފީހަށް ހާޒިރުވުމަށްފަހު ނިކުމެވަޑައިގެން މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވީ، ފުލުހަށް ހާޒިރުކޮށްފައިވަނީ މިމަހުގެ 26 ވަނަ ދުވަހުގެރޭ މ ކުނޫޒް ސަރަހައްދުގައި ބަޔަކު އިސްނަގައިގެން މާލެތެރޭގެ އަމަން އަމާންކަން ނަގާލައި ހަމަނުޖެހުން އުފެއްދުމަށް މަސައްކަތްކޮށް، މާލެ ތެރޭގެ އެކި ސަރަހައްދުތަކަށް އެއްވެ، އާންމު ޓްރެފިކަށް ދަތިވާ ގޮތަށް މުޒާހަރާކޮށް ފުލުހުންގެ ދައުރަށް ހުރަސްއަޅާ ކަމަށް ތުހުމަތު ކުރެވޭ މައްސަލައިގަ ކަމަށެވެ.
އަމީތު ވިދާޅުވީ މާލެ ތެރޭގެ އަމަން އަމާންކަން ނަގާލުމަށް އެއްވެސް މަސައްކަތްތަކެއް ނުކުރައްވާ ކަމަށާއި ހައްޔަރުކުރީ ސައިކަލް ޕާކް ކުރުމަށްފަހު ކުނޫޒަށް ވަންނަން ދިޔަ މަގުމަތީގައި ކަމަށެވެ. އަދި ފުލުހުން އަތް އަނބުރާލުމުގެ ސަބަބުން އަތުގައި އޮތް ފޯނު ވެއްޓި ތަޅައިގެން ގޮސްފައިވާ ކަމަށްވެސް އަމީތު ވިދާޅުވިއެވެ.
އަމީތު ވިދާޅުވީ ފުލުހުން ތުހުމަތު ކުރައްވަނީ ޖިނާއީ އިޖުރާއަތުގެ ޤާނޫނުގެ ދަށުންކަމަށް ބުނެފައިވާއިރު އެޤާނޫނަކީ މިހާރު އިއުލާން ކޮށްފައިވާ ޣައިރު ޤާނޫނީ ކުއްލި ނުރައްކަލުގެ ޙާލަތުގެ ޤަރާރުން ސަސްޕެންޑް ކުރެވިފައިވާ ޤާނޫނެއް ކަމަށެވެ. އަދި އެވާހަކަ އެގޮތަށް ވިދާޅުވުމުން ފުލުހުން އެއްވެސް އެއްޗެއް ނުބުނާ ކަމަށް އަމީތު ވިދާޅުވިއެވެ.
އަމީތު ވިދާޅުވީ މިކަމަކީ މަގުމައްޗަށް އެއްވެ ސަރުކާރުން ކުރާ ޣައިރު ޤާނޫނީ ޢަމަލްތަކާ ދެކޮޅަށް އަޑު އުފުލާތީ ކުރާ ކަމެއް ކަމަށާއި ކިތަންމެ ވަރަކަށް ޖެއްސުންކޮށް ބިރުދެއްކި ނަމަވެސް އެކަން ހުއްޓާ ނުލައްވާނެ ކަމަށެވެ.
