ހަސަން ސައީދަށް ދައުވާކޮށްދޭން އެދުނު މައްސަލައާ ގުޅިގެން ރިޔާޒްގެ ސުވާލުތަކެއް!
1 މާރިޗު 2018 | ބުރާސްފަތި 06:04ފިލައިގެން އުޅުނުކަމުގެ ތުހްމަތުގައި މީގެ ކުރިން މީހެއްގެ މައްޗަށް ދައުވާ ކޮށްފައިވޭތޯ ސުވާލު ކުރެއްވި
ކިނބިދޫ ދާއިރާގެ ރައްޔިތުންގެ މަޖިލީހުގެ މެމްބަރު އަބްދުﷲ ރިޔާޒް
ރިޝްވަތުގެ ތުހުމަތުގައި ފުލުހުން ހޯދަމުން ދިޔަ ޖުޑީޝަލް އެޑްމިނިސްޓްރޭޓަރު ހަސަން ސައީދު ހުސައިންގެ މައްޗަށް ދައުވާ ކޮށްދޭން ފުލުހުން ފޮނުވި މައްސައާ ގުޅިގެން ކިނބިދޫ ދާއިރާގެ ރައްޔިތުންގެ މަޖިލީހުގެ މެމްބަރު އަބްދުﷲ ރިޔާޒް ގިނަ ސުވާލުތަކެއް އުފައްދައިފިއެވެ.
ފުލުހުންނަށް ފިލައިގެން އުޅުނު މައްސަލައިގައި ޖުޑީޝަލް އެޑްމިނިސްޓްރޭޓާ ހަސަން ސައީދު ހުސައިންގެ މައްޗަށް ދައުވާކޮށްދިނުމަށް އެދި ޕްރޮސިކިއުޓާ ޖެނެރަލްގެ އޮފީހުގައި އެދުނު ކަން ފުލުހުން ހާމަ ކުރީ މިދިޔަ ބުދަ ދުވަހުއެވެ.
އެއާ ގުޅިގެން ކުރީގެ ޕޮލިސް ކޮމިޝަނަރު އަބްދުﷲ ރިޔާޒް ކުރެއްވި ޓްވީޓްގައި ފިލައިގެން އުޅުނުކަމުގެ ތުހްމަތުގައި މީގެ ކުރިން މީހެއްގެ މައްޗަށް ދައުވާ ކޮށްފައިވޭތޯ ސުވާލު ކުރައްވާފައިވެއެވެ. އަދި މީގެ ކުރިން ކިތައް މީހުން ހޯދަން ފުލުހުން އިއުލާން ކުރިތޯ އެ ޓްވީޓްގައި ފުލުހުނަށް ސުވާލު އަމާޒުކުރައްވާފައިވެއެވެ. އެ ސުވާލުތަކާ އެކު ދެން ވިދާޅުވެފައި ވަނީ ހަސަން ސައީދުގެ މައްޗަށް ފިލައިގެން އުޅުނުކަމުގެ ދައުވާ ކުރަން ފޮނުވުމުން ތުހްމަތުކުރާ މައްސަލައިގައި އެކަށީގެންވާ ހެކި ނެތްކަން ހާމަވާ ކަމަށެވެ.
ހަސަން ސައީދު ހޯދަނީ ރިޝްވަތު ހިފިކަމުގެ ތުހްމަތެއްގައި ކަމަށް އޭރު ފުލުހުން ބުނެފައި ވެއެވެ. އަދި އެ މައްސަލައާ ގުޅިގެން ފުލުހުން މިހާތަނަށް ހޯދި ހޯދުމުން މާލޭގައި އިމާރާތް ކޮށްފައިވާ ކޮމާރޝަލް ހައުސިންގ އެޕާޓްމަންޓް ޕްރޮޖެކްޓްގެ ދަށުން އިމާރާތްކޮށްފައިވާ ފްލެޓްތަކުން ފްލެޓެއް ގަތުމަށް ދާދި ފަހުން ހަސަން ސައީދު ހުސެއިން ކޮށްފައިވާ މުއާމަލާތެއްގެ ކިތާބީ ހެކި ހިމެނޭ ގޮތުން، ރިޝްވަތުގެ މުއާމަލާތެއްގައި ބައިވެރިވެފައިވާ ކަމުގެ ކިތާބީ ހެކި ލިބިފައިވާ ކަމަށް ފުލުހުން ބުނެފައި ވެއެވެ.
މީގެ އިތުރުން މި މައްސަލާގައި ބެލިބެލުމުން ރާއްޖޭގެ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ އާއިލާގެ ދެ ބޭފުޅުން ވެސް ފްލެޓްތައް ބައްލަވައިގަތުމަށްޓަކައި މުއާމަލާތް ކުރެއްވި ކަމުގެ ހެކި ލިބިފައިވާ ކަމަށް ވެސް އެ ބަޔާނުގައި ވެއެވެ.
ނަމަވެސް އެ މައްސަލާގައި އަދި މިހާތަނަށް ދައުވާކޮށްދޭން ފުލުހުން އެދިފައިނުވެއެވެ. ފުލުހުން ހޯދަން އިއުލާނުކުރުމަށް ފަހު ހަސަން ސައީދު ހައްޔަރުކޮށްފައި ވަނީ ކުއްލި ނުރައްކަލުގެ ހާލަތު އިއުލާނުކޮށް ސުޕްރީމް ކޯޓު ފުރާޅުމަތިން އަރައި އުއްތަމަ ފަނޑިޔާރާއި އެ ސުޕްރީމް ކޯޓުގެ ފަނޑިޔާރު އަލީ ހަމީދު ވެސް ހައްޔަރުކުރުމަށް ސިފައިންނާއި ފުލުހުންގެ ހިންގި އޮޕަރޭޝަނުގައެވެ.
